الاثنين، 29 أغسطس، 2011

مسرحية: زين إلى عالم جميل

اهلا اهلا مرحبتين ... نورت المكان يا زين 

تمت دعوتنا لحضور البروفه النهائية لمسرحية 

زين إلى عالم جميل 

من وحي أوليفر تويست

واهيا مسرحية غنائية باللغة العربية

كتابة: هبة حمادة 

ألحان: جاد الرحباني

بطولة: شجون الهاجري - علي كاكولي - فاطمة الصفي - مبارك سلطان

حمد أشكناني - فاطمة الطباخ - فهد باسم - طلال باسم

للمخرج: سمير عبود

قصة المسرحية: 

طفل اسمه زين يعيش في دار الأيتام ولما حس بظلم انحاش منها وراح للمدينة والتقى بالعصابة وخلوه يبوق بعدها انسجن وتتم محاكمته ويطلع براءة وتتبناه سيده غنيه ويعيش عندها 

شوفوا الصور
















































لما خلصت المسرحية حسيت جنها دعاية من دعايات زين الي نشوفهم بالتلفزيون


بس طويله لوول 


اعجبتني المسرحية وحبيت الاضاءة واااااااايد والديكور كان جميل


ما شاءالله في تطور كبير بمسرح الطفل


واتمنى من زين انها تستمر كل سنه وما تكون هذي اخر مسرحية منهم


واكثر شي عجبني اداء 


علي كاكولي + شجون 


تمثيلهم كان عجييييب خاصة علي كاكولي بدع بحركاته وتعابير ويهه


شكرا للسيد محمد المهيني وشركة زين للاتصالات على الدعوة


مكان المسرحية: صالة التزلج


للحجز: 90007773 - 90007774


راح تنعرض من باجر وتستمر لمدة 10 أيام

عيد سعيد


صلاة العيد الساعة: 5:39 صباحا

الأحد، 28 أغسطس، 2011

LUSCIOUS

باول رمضان كانت رفيجتي واهلي مسيريين علي 

عاد فكرت شنو اييييييييييب 

وتذكرت هالمحل 

دقيت عليهم وطلبت ومريتهم على الساعة 3 العصر 

ومشاءالله كان كل شي خالص

طلبت ميني صاج


فيه انواع 

دجاج مسحب - فلافل - بيديان 

ونسيت


العلبة واااايد طويله بس شكلها حلو حق التقديم 

ومعاه خبز مادري شسمه نوعين 

وصلصتين الاولى زعتر والثانيه البيضة مادري شنو اهيا بالضبط


طعمه حلو بس في انواع ما حبيتها مثل البيديان لاني ما اكله

ونسيت شنو الباجي لوول 

السعر: 18 دينار 

=================

والنوع الثاني الي طلبته اسمه 

فطاير بولز 


هذا وايد استانسنه على فكرته غريبه 

الصلصة تكون بانبوله تضغطونها وتدش داخل الفطاير

فيه انواع 

جبن - لحم - خضار - بيديان - سبانخ 

وهم نسيت 


حبيت العجيبه ترفه 

الي ماحبيتهم البيديان والسبانخ واذكر في شي بعد ما عجبني 

بس كالعادة نسيت لوول

السعر: 18 دينار 

العنوان: شرق - شارع احمد الجابر - جبال دار العوضي

تليفون: 22398912 - 22498913

""اتمنى انهم يسوون خدمة توصيل"" 

السبت، 27 أغسطس، 2011

Mini Cherriez

اول رمضان كنت رايحه بيت امي وله طالبين ميني تشيريز 

حبيت الفكره وقلت اطلبها لما ايون رفيجاتي

طلبت الساعه 6 ووصل 7

وشكله عجيب جنه هدية 

والعلبة فلين داخلها ثلج


وتقدرون تختارون الانواع الي تبونهم 

انا اخترت نص اوريجينال ونص مانجو


واييبون معاه القفاش 

وايد اعجبتني فكرتهم احلى من الحجم العادي 

بس العيب انه ماكو اضافات فرحت الجمعية وشريت فواكة

وقصصتهم ووزعتهم بالصحون


السعر 

درزن اوريجينال: 4.950 دينار

درزن نكهات: 5.950 دينار


خدمة التوصيل: 22474888

LEGO Burj Khalifa

لما كنت بدبي شريت ليقو برج خليفة 


توقعت شكله بكون غير طلع كله دوائر تركبونها على بعض

وفي بعضهم داخلهم عصاة


وهم كنت متوقعه انه بكون طويييل نفس الصجي ههههه 


وتركيبه سهل جدا


شكله النهائي


عيبه ينعوي بسرعه ويصير برج خليفة المائل

خذيته من: At The Top - Dubai Mall 

الأحد، 21 أغسطس، 2011

SNOG

امس كنت رايحه المهلب وبالصدفة شفت محل

سنوغ للفروزن يوقرت 

ولكن للأسف ماجربته لاني كنت تعبانه وابي قهوه 

المهم بقول لكم تجربتي عنه 

جربته قبل فتره بره الكويت 

واذكر كان في بس نوعين

شاي اخضر - اوريجينال 


وكل فتره يتغيرون النكهات وبالكويت مادري شنو موجود

انا طلبت بس اوريجينال 

وكان لذييييييييييييييييييييذ 

احلى فروزن يوغرت ذقته

انصحكم تجربونه 


وان شاءالله بأقرب وقت بروح اطلب منهم 

واذكر طلبت منهم براوني وكوكيز 

الكوكيز كان عادي 

والبراوني ماحبيته 

وقريبا بيفتح في: 

سوق شرق - الافنيوز 

ومادري بعد اذا في مكان غيرهم

الثلاثاء، 9 أغسطس، 2011

كوزمودوم - Cosmodome

وصلتني دعوه من صالون ومعهد كوزمودوم 

وكانت جلسة تنظيف عميق وتغذية للبشرة 



خذيت موعد ووصلت بالموعد وكلمت الاستقبال وكان تعاملهم جيد 

ويتني الخبيرة ورحبت فيني ودشينا للغرفة 

بدت تسولف معاي او بالأصح تقرق معاي

وطلعت مليون عيب ببشرتي بالنهاية فهمت انها تبيني اشتري منتجاتهم 

وقالت كل الي تستخدمينه بالبيت مو زين !!! 

بالله شدراج انا شنو استخدم وانا ما قلت لها شي 

بعدها بدت بتنظيف بشرتي 

وتقرررررررررق 

انا طفارتي الي جذي صج تنرفزت 

بعدها سوتلي سنفره لويهي 

وقامت تفرك فيه جنها تفرك زووووولية

اول مره اروح مكان واسوي تنظيف لبشرتي واحد يفركها جذي 

وكل شوي تقولي تبين احط لج انبوله - كريم ومادري شنو 

ترا ببلاش ما راح تدفعين! 

صج بطت جبدي 

جان اقولها شنو باقي الحين ما سويتيه؟ 

قالت لي بحط لج انبوله وماسك ونسيت شنو واخر شي مرطب 

قلت لها لو سمحتي حطيلي مرطب 

اهيا انصدمت قالت لي ما تبين الباجي ترا ببلاش

رديت عليها لو سمحتي حطيلي مرطب 

حطت لي مرطب وشلت قشي وطلعت

شكرا كوزمودوم على الدعوة

عنوانهم: حولي - شارع بيروت - مجمع المهلب - اخر دور

الجمعة، 5 أغسطس، 2011

Kuwait Flight Simulation Center

امس رحنا نجرب الطيران التشبيهي 

واشوف اذا انفع اصير كابتن او لا 

طبعا حجزنا قبلها بيوم 


الصور مو واضحة لاني مصورة من موبايل 

هني من داخل



الدرايش


وفيه محلين 



كافيه



وفي انواع وايد من الطيايير 


هيليكوبتر


طيارة حربية 

F-18
F-16 



واحنا اخترنا 

A-320 

الساعة: 35 دينار

وهذي الكبينة


وانا الكابتن وزوجي المساعد 

وطرنا من لوس انجلوس الى لاس فيغاس 


طبعا اكو مليون دقمه واشياء غريبه وانا مادري شالسالفه 

اول ما دشيت جان اهون هههههههه 

بعدها قلت يالله اطير والي فيها فيها 


وما قصر صاحب المركز كان معانه من الاقلاع الى الهبوط 

وشرح لنا كل شي بالتفصيل 

وعلمنا شنو نسوي خطوة بخطوة 

الاقلاع كان سهل 

بس لما ييت بنزلها لووووووول 

صارت لوووووويه وانا مو عارفه شسوي 

واذا قالولي يمين لفيتها حيل يمين 

المفروض الفها على الخفيف 

انا عبالي سياره هههههه 

اول مره كانت محاولة فاشله والطيارة طاحت 

بس عادوه لي ورديت نزلتها احسن من المره الاولى 

بس هم غلط مايله ويمكن جناحها انكسر والتاير انفش

ههههههههههه

المهم انه وصلنه بالسلامة 


الصراحة كانت تجربة ممتعة جدا جدا 

وانصح الي يحبون الطيران يجربون 

وراح تعرفون اشياء عن الطياره ماكنتوا تعرفونها من قبل 

وتعرفون شسوي الكابتن عشان يطيرها وينزلها 

وشلون يدخل بيانات الرحلة وخط السير والوزن وغيره 

وان شاءالله بروح مره ثانية واجرب الهيليكوبتر

واخر شي يعطونكم شهادة

مكانه: ديسكفري مول - السرداب

تليفون: 22913700