السبت، 31 يوليو 2010

Fendi rubber iPhone cover

قبل يومين اختي الكبيره يابتلي هدية

ما شاءالله الله يزيد الهدايا خاصة الي بدون مناسبة ههههههههههه

وكانت طالبة كفرين للآيفون حقها وحقي

وطلبته عن طريق موقع Net-A-Porter

ووصل خلال 5 أيام

وهذا الكرتون


وداخله كرتون


وداخله كرتونين


اخيرا طلع هههههه

من جدام


من الخلف


وهني بعد ما لبست تليفوني


للطلب اضغط هنا

الا صج تحبون الهدية تكون بمناسبة او بدون مناسبة؟

Pottery Barn

هالفوط موجودين في بوتري بارن - الأفنيوز


ذكروني بهيز وهير

الجمعة، 30 يوليو 2010

Banana Split Cone

تحذير: لبسوا كمام قبل لا تقرون البوست

لان البوست حده مغبر ولقيته عندي في قائمة تحرير الرسائل

آآآآآآآآتسووووووووووووو

--------------------------------------

قبل شهر/شهرين كتبت عن بسكويت الايس كريم ماركة CONE

اضغط هنا

وزعفرانه شرت بانانا سبليت كون

والعلبه داخلها 10 حبات


الموزه شطولها هههههه فقصيت منها شوي

وحطيت معاها ايس كريم من باسكن وهاجين داز

وصلصة كاكاو


الثاني حطيت فيه كيكه سارالي

كنت ابي براوني بس على حظي رحت 3 جمعيات ومركز السلطان كله خالص


وحطيت نفس الايس كريم بس مع صلصتين كاكاو وكاراميل

قفشه الايس كريم ما كانت تساعد والايس كريم كان ذايب

المفروض انه يكون مرتب

بس صار بركان وعلى ما صورته جان يصير شوربه ههههه


حبيت البسكوته لانها خفيفه واااايد

واحلى شي بعد ما تخلصون اكلوها عشان توفرون صابون المواعين

أفضل أنواع مجففات الشعر

تحديث: كلولولولولووووولييييييييييييش

اخيرا لابتوبي رد بالسلامة


-------------------------------------

السشوار الي عندي مات الله يرحمه

كنت شاريه واحد من براون حبيته بس بسرعه احترق

وجربت وايد انواع بس اروح وارد على باناسونيك

هذا احسن واحد عندي لانه سرييييييييع ومريح

وجربت ماركة GEEPAS

بسرعه يخترب واذا صار حار يذوب على الشعر!

فنصيحة لحد يستخدم من هالماركه

ابي اسألكم شنو احسن نوع استخدمتوه؟

وشنو ماركته؟


وعندي سؤال ثاني

من زمان وانا ادور على الـ Curling Iron

بس الي يكون واااايد عريض حتى مو نفس الي بالصوره

اعرض منه

مو لاقيته .. ما مر عليكم؟!


واخر شي الي عندها اي اقتراح لافضل انواع مجففات الشعر تفيدنه

الخميس، 29 يوليو 2010

Canon EOS 550D

ونااااسه امس وصلتني هديه واهيا

كاميرا Canon EOS 550D

من زمان وانا بخاطري هالكاميرا وكنت ناويه اشتريها برمضان

وكل ما امر محلات الالكترونيات اروح اجابلها واصور الموظفين واطلع


وصارلي جم يوم احلم فيها هههههه

مره اني شريت الكاميرا


ومره قاعده اصوره امي وخواتي واهما يزفوني يقولون بس لوعتي جبدنه


واخر حلم اني شريت استوديو صغير وقمت اصور


هههههههه احلامي على قدي



امس نمت والكاميرا فوق راسي

قمت الفير صورت امي واهيا نايمه وزعفرانه وكملت نومتي

هههههههههههه

علي بالعافية

الثلاثاء، 27 يوليو 2010

سلطة الناتشوز

هالسلطه احبها وايد وكله اسويها في بيتنه

خذيت الوصفه من رفيجتي ايام الثانوية

المقادير:
خس عادي او أمريكي
ملفوفه بنفسجية
2 شدة جرجير
1 علبة كبيرة ذرة
جبن شيدر مبشور
ناتشوز

الصلصلة:
كوبين صلصة فرنسية
2 ملعقة كبيرة خل أبيض
2 ملعقة كبيرة مايونيز
1/2 ليمونه
1 ملعقة كبيرة اوريغانو
1 ملعقة كبيرة نعناع يابس

ملاحظه:
1. الي يحب الفاصوليا الحمرا يقدر يضيفها
2. احلى صلصة فرنسية بالنسبة لي "كريستال" او "امريكان جاردن"


الطريقة:

نغسل الخس والملفوفه والجرجير


نقطعها قطع متوسطة إلى كبيرة ونخلطهم


نضيف الذرة + جبن شيدر


نخلطهم


وناخذ كل مقادير الصلصة ونخلطهم بصحن ثاني عدل


ونصب الصلصة فوق السلطة

ونتأكد انها انخلطت عدل


نحطها بالثلاجه عشان تبرد

وقبل وقت التقديم نحط فوقها الناتشوز


وبالعافية

الأحد، 25 يوليو 2010

الصحن الي يدور!

من فتره وحده سألتني عن الصحن الي يدور ويغسلون فيه الخس وربعه

كنت رايحه جــيــان (من زمان) وشفت الي تدور عليه

عاد منو كانت تبيه مادري نسيت


في منه لونين احمر والثاني نسيت


وهذا شكله من داخل


وشريت لي واحد قلت بجربه

ونسيته توني تذكرته وقلت احطه لكم

ليلحين ما جربته ومادري شلون يستخدمونه

ليش شاريته مادري

المهم سعره هم نسيت

اتوقع اقل من نص دينار

ياربي مادري شفيني هالايام وايد افقد الذاكره

بس والله ما انلام من اللويه الي انا فيها

الأربعاء، 21 يوليو 2010

سؤال


اذا يتلكم الفرصه انكم تغيرون اسم بلوقكم .. شنو راح تسمونه؟!

ودكم تغيرونه او تخلونه نفس الاسم؟

مقتنعين باسم بلوقكم ولا لأ؟

-----------------------------------------

تحديث: ضحكتوني لما قلتوا بسميه فيول ههههههههههه

ليش متوقعين اني بسميه فيول؟!

عن نفسي ما راح اغير الاسم لانه عاجبني ومو انا الي اخترته

امي الي اختارت اسم البلوق

وحبيته وحسيت انه وايد لايق على شخصية البلوق

لان بشاي الضحى نسولف عن كل شي


Caramel

من فتره سمعت عن محل كراميل وايد ناس مادحينه

واحلى كيكه عندهم كيكة القرع والجزر

واختي يابت لنا قرع وجزر وتوفي وجيزكيك سنيكرز


رايي:

ما حبيت ولا وحده من الي جربتهم

الجزر ما ذقتها بس يقولون حلوه

والقرع ذقت نتفه لوعت جبدي مادري ليش واهما اعجبتهم

والتوفي ثقيله وايد

والجيز كيك اثقل واثقل

باختصار ما عجبني

مكانهم في

بنيد القار - مجمع المنار - قطعة 9 - شارع بور سعيد

تلفون:
22533257/8

وكيكهم تلقونه بجم كافيه وفي واحد بديسكفري نسيت اسمه

------------------------------------------

كنت رايحه حولي وبطريجي مريت كاريبو

على ما يخلص الطلب خذيت جوله سريعه بالمجمع اليديد نسيت اسمه

وطليت تحت ومت من الضحك


هههههههههههههههههههه

شكلهم عجيب شلون صافينهم

واستغلوا مساحة النافوره عدل لوول


يالله الي عاجبتها مطاره حق رمضان تقولي وانا ايبها لها ههههه

الثلاثاء، 20 يوليو 2010

شكرا من القلب

كلامكم وايد فرحني

صج صج استانست لما قريت تعليقاتكم

وان شاءالله اقدر اكمل بالتدوين

واحرجتوني بكلامكم الحلو

مشكورين كلكم وما قصرتوا

---------------------------------------

شكر خاص لـ :

الاخ قلم ومسّاحة

الملقب بمقلمة!



وايد حبيت الكرت

-------------------------------------

شكر خاص لـ :

أعضاء بلوق ليش

على الفيول الحلو


دورت بالايميل يمين يسار

قلت يمكن الاقي العصا السحرية الي تحوله صجي!

بس للأسف ما لقيت ههههههههه

يالله العوض ولا القطيعه

شكرا لكم جميعا

20 يوليو 2009

الحمدلله رب العالمين

ماشاءالله جني امس مسويته!

بسرعة مرت الأيام

وما توقعت اني بتعرف على ناس واااايد من خلاله

ناس اعرفهم ويعرفوني

ناس احبهم ويحبوني

وصار جزء مهم في حياتي!

ورفيجة افتخر اني عرفتها واهيا رورو الشخبوطة
اليوم بلوقي صار عمره سنه


وبهالمناسبة حابة اشكر كل متابعيني

ولو ما انتوا جان ما استمريت بالبلوق

الف شــكــر لكم جميعاً