الاثنين، 28 ديسمبر 2009

تفاح .. بس هالمره غير!

قبل جم يوم وصلني ايميل من زعفرانه دازه فيه جم صوره

ومن بين الصور هالتفاح


هذي اخر هبات كريسمس عندهم هههههههه


ليش ما يسوون لنه تفاح ويكتبون عليه عيدكم مبارك؟!

الخميس، 24 ديسمبر 2009

P.F. CHANG's

خون ين ني فن غون P.F.Chang's

قصدي اهلا وسهلا فيكم في مطعم P.F.Chang's

P.F يعني Paul Fleming

واهوا مطعم صيني وأول فرع له في الولايات المتحدة

والي بالكويت يعتبر اكبر فرع


رحنه على الساعه 4:30 العصر بأيام الأسبوع

قلنه اكيد ماكو احد يمدينه نتغدى ونتسوق وبعدها ندش السينما

لما وصلنه عند المطعم ولا حده زحمممممممممممه

وطبعا ما عندهم حجز بالتليفون الا اذا كنتوا 8 اشخاص او اكثر

قلنا لهم نبي طاوله حق 3

قالوا نطروا ساعه ونص!!!!

شفنه الساعه ولا باقي وايد على الفلم فقلنه خلاص نتسوق على ما ايي دورنه

عقب ما تسوقنه دقوا علينه ورحنه توقعت المطعم راح يكون هادي

لان الساعه صارت 5 وشي بس كان ليلحين زحمه

ما صدقت الناس قاموا جان اصور المكان ههههههههه


المنيو


هذي الصلصات الي موجوده على الطاوله

والصحن الي بالنص الي تشتغل سوت لنه خلطه حلوه


بيبسي


Dumplings Chicken

&

Crab Wontons


Cashew Chicken


Mongolian Beef


Vegetables Noodles


Shrimp Walnuts


Brown Rice


White Rice


الأكل كان عادي في مطاعم صينيه وايد احلى منه

والي ما عجبني بالمطعم ان كبير على غير سنع

يعني مكودين الطاولات بدون ترتيب

كرسيكم بظهر الكرسي الي وراكم ما تقدرون حتى تتحركون وتاخذون راحتكم

وغير هذا الي يدخنون ... المطعم من داخل مقموت وانتوا تدخنون؟!

مادري اذا فيه مكان مخصص للي ما يدخنون بس الي شفته ان بكل المطعم قاعدين يدخنون

والخدمه كانت بطيئة جدا

قلت يمكن من الزحمه

بس لما سألت رفيجاتي راحوا بوقت ماكان زحمه نفس الشي كلهم ذموا خدمتهم


والحساب كله طلع بـ 6 دنانير فقط لا غير :q

والي يبي يعرف ليش يدخل اهني

دزي دجيان

الأحد، 20 ديسمبر 2009

سوالف غبية!


سنه من السنين كنه مسافرين رايحين أمريكا فكنه نعتمد على الخرايط ونشوف الأماكن الي نبي نروح لها وسمعنه عن مول كبير ويعتبر اكبر مول بالمنطقه ورحناله ووقفنه بالمواقف وكانت FREE تسوقنه فيه من الصبح لي العصر لما ملينه من كبره وطلعنه ... عقبها جان نشوف بالخريطه في مول ثاني بنفس المنطقه وقلنه يالله نروحله وصلنه ووقفنه بالمواقف بس كانت بفلوس ونزلنه وتمشينه وتسوقنه وشرينه وعقب ما مشينه مده طويله جان نكتشف ان احنه بنفس المول بس دشينه من الجهة الثانية!!!!

حدنه أغبية ههههههههههه



كنت رايحه فلم مع رفيجتي نسيت شنو كان اسمه بس الي اذكره ان فيه "ماموث" وكنت مندمجه بالفلم جان تسألني رفيجتي

رفيجتي: جااااي هذا مو جنه ماموث؟!

انا: اي ماموث

رفيجتي: بس مو جنه الماموث منقرض؟!

انا: اي انقرض

رفيجتي: عيل شلون يابوووووووووووه؟!!!!

انا: خاشين جم واحد حق الفلم!!

لووووووووووووول



قبل سنتين وتحديدا ايام امتحانات الفاينل بفصل الشتاء البارد جدا كنت قاعده ادرس بالمكتبه لما صارت الساعه 9 بليل طلعت ركبت السياره ولا السكان حده بااااااااااااااااااااااارد مو قادره امسكه ووقتها كنت لابسه سكارف جان امسك السكان بالسكارف وانا لابسته وطول الطريج قاعده امشي جذي لما وصلت عند ""يو تيرن"" ولفيت جان انزنط واقعد اصرخ لان السكارف لف على رقبتي لووووووول

اول ما رديت قلت حق امي السالفه ومن ثاني يوم يابتلي دسوس هههههههه


سألت رفيجتي

انا: يصيرلج فلان الفلاني؟

رفيجتي: اي ... ليش شفيه؟!

انا: لا ما فيه شي بس مات

رفيجتي: @@ !!!!!

لوووووووووووووول الله يرحمه

--------------------------------------------------

امي حبيبتي امس كانت قاعده تخم بمخمتها اليديده

صارلها ســنــه عندها يايبتها لها زعفرانه صوغه

ومتحسفه تستعملها امس مادري شلون اقتنعت وخمت فيها

هههههههههههه

هذي المخمه على أميره


والمكرافه على أمير


مرت عليكم مواقف غبيه؟ .. كتبوها عشان نضحك :>

الثلاثاء، 15 ديسمبر 2009

Brasserie de l'etoile

لمحبي المطاعم الفرنسيه مطعم brasserie de l'etoile

بالأفنيوز

المنيو


اول شي كنه متنحين ماندري شنو نطلب بعدها يه الجارسون وقعد يشرح لنه

صمون وزبده


المقبلات

طلبنه أصابع الجبن (ما عجبني)


ومشروم مع الجبن يمييي

ما اعرف اسامي الأكل الي طلبناهم


سفن اب


بيبسي


دجاج مشوي مع أرز


باستا مع مشروم


وهذا طلبي بطاط مع برجر

البطاط لذيييذ


خدمتهم وايد حلوه

والأكل بسرعه ايبونه

عقب ما خلصنه يه الجارسون وقالنه منو حظه حلو؟

قلناله محد هههههه

جان يقول لا ابي وحده فيكم حظها حلو وتختار وحده من الكوكيز

وتليقفت انا واخترت

جان يقولي انا اقول غيري رايج واخذي الثانيه

(عيل ليش تقول منو حظه حلو وانت بتختار ههههههه)

المهم خذيت الي قال عنها

وشوفوا شنو فزنه فيه


ونااااااااااسه فزنه بـكبون بقيمة 20 دينار من مطعم P.F.CHANG's

وتذكرون بالبوست الي قبل كنت كاتبه ان فزنه بشوربه ههههههه

اضغط هنا

ما كان ودي اروح للمطعم بس الحين قلت لااااااااازم اروح :q

واخر شي بقوله المطعم حلو وقعدته حلوه ويستحق التجربه

والبرجر كانت عملاقه فخذيتها معاي البيت لوول


--------------------------------------------

قبل مده طويله اختي زعفرانه شرت لي فيول من ايكيا

وسمته بـــابـــار

وامس كنت رايحه ايكيا جان اشوف يايبين ولد بابار ولازق فيه حفيده


وهذا حفيد بابار


خذيتهم ويبتهم عند يدهم بابار


ياحلوووووووهم يهبلون

يارب يزيدون :q

الاثنين، 14 ديسمبر 2009

Living Room Lounge

من فتره سمعت عن كافيه ليفنج روم وشفته بعد بالتلفزيون

وقريت الي كاتبينه الفيونكات عنه فحده شوقني وقلت لازم اروح

والحمدلله ما طق علينه مطر لان يومها الجو كان مغيم




داخل كان فاضي الناس كلهم بره



قعدنه بره وكان الجو بااااااااااااارد


الدفايه ما تدفي من كثر الهوا


المنيو


دجاج فاهيتا


وهذي مالتي جبن مازارولا مع صلصة البيستو


ولما خلصنه طلبت قهوه من الجو الاكل والقهوه يمدوا


كريم بروليه


هوت براوني مع آيس كريم (مو وايد حلوه)



الكافيه حلو بس توقعته وايد أحلى