الاثنين، 31 أغسطس 2009

فليك كيك :)

المقادير:
1 باكيت كبير بسكوت بيتي بور
4 علب قيمر
6 ملاعق كبيره كاكاو بودره
1 علبه كبيره حليب مركز ومحلى
1/4 كوب حليب سائل
1 ملعقة كبيره جيلاتين
1/4 كوب ماء حار
4 كاكاو فليك مبشور

انا سويت الكيكه في صحن الجيزكيك الي يتبطل

نسخن نص كوب حليب سائل (بس هذا غير عن الي بالمقادير)

نغمس البسكويت بالحليب

ونصفهم داخل القالب

بعدها نضيف الجيلاتين إلى الماء الساخن ويمزج جيداً
بعدها يخلط مع جميع المقادير عدا الفليك

ونخلطهم بالخلاط الكهربائي جيداً

بعدها يصب نــــــص الخليط على طبقة البسكويت
ويضاف اليها 2 فليك مبشور


ونضيف عليها باقي الخليط

ويخلط باليد بشكل خفيف


بعدها تغطى وتوضع بالفريزر 5 ساعات حتى تجمد

ومن ثم تفصل الكيكه عن القالب
ويضاف إليها 2 فليك مبشور للتزيين
وتوضع بالثلاجه


وهذا شــكــلــهــا الــنــهــائــي


وبـــالـــعـــافــــيـــه


الثلاثاء، 25 أغسطس 2009

الجزء الثاني - Palms Hotel

رجعناااااا لكم مع الجزء الثاني من التقرير

ومثل ما انتوا عارفين طبايع الكويتيين البلعة ضرووووريه في كل مكان وزمان وامي ما قصرت يابت لنا الجمعيه كلها


وطبعا اول ما وصلنا كانت حزة غدا فهذا كان غدانا اول يوم



ولما صار العصر نزلنا خذينا من ستاربكس فرابتشينو وامي زهبت لنا باجي البلعه (إلي يبي يمتن ايي عندنا يوم هههههه)









وبعدها خذيت امي ورحنا نتمشى بالمعرض ... وكان موجود السبا مال نادي تشامبيونز يبيعون شموع فيهم ريحة صابون ومسوين عليهم خصم 50% خذيت جم وحده حقي وحق رفيجتي ... جان اشوف لوحه مكتوب عليها



وقلت يبيييييييييييله جان ابسط واخليهم يسوولي ... حده عجييييب ويريح سوولي 10 دقايق وسألتها جم سعره عندهم قالت النص ساعة بـ 10 دنانير


وبعدها ردينا السويت وقعدنا انا وزعفرانه نستعد للـــــبـــــــحـــــــر حق اليوم إلي وراه




ووصل الحوووووووووووووت

هذوله خلصوا الله يعينه على الياي



وهذي عذاااااب يالله انتفخت


أخيييييرا خلصت بعد عذاب



وثاني يوم قعدنا من الساعة 6 الصبح ... نزلنا نتريق بالمطعم ... وبحط لكم صور ريوق الــ 3 أيام :)











وبعدها انطلقنا للبحر ... وطبعا عانينه على ما ننزل الطفاحيه الكبيره ما تدخل بالاصنصير فخذيتها معاي ونزلتها بالدري


وهذا الحوت وصل عشان يسبح معانا



المايه كانت بااااااااااااارده تهبل والشمس خلتنا نصير جلحان ملحان

.....

واحنا قاعدين نسبح جان نشوف سمجه غريبه عليها قلب الحب (سبحان الله) وطول الوقت تحوس يمنه نحذف عليها صخر عشان تروح ما تخاف ههههه وكل يوم نسبح نلقاها تسبح ويانا شكلها حابتنه هههههه


وقعدنا نسترجع ايام طفولتنا ونلعب بالتراب ونسوي جبل


بس انا سويت كيكه وزينتها ههههههه (تعقدت)
وعقب ما خلصنا رحنا الحمام (وانتوا بكرامه) نغسل عقب التراب وحطينه الطفاحيات بره وكان في مصري يشتغل حده ينرفز مناشبنه على الطفاحيات يقول انتوا شلون شايلينهم احنا حقرناه ودشينا نغسل وعقب ما طلعنه من الحمام ما لقينه الطفاحيه الكبيره !!!!!! انا قلت يمكن اليهال خذوها (ظلمتهم) مشينا شوي جان تقولي زعفرانه شووووووفي ولما شفت مت من الضحك شوفوا إلي شفناه !!!



ولا إلي يشتغل والي طول الوقت مناشبنه شالها وحطها فوق كشك الفوط صج ضحكت على شكل الطفاحيه واهيا فوق الكشك بس هم غثني على حركته لا ومعصب يقول انا خذيتها صارت مالتي ... طبعا حقرناه ومشينا

وعقب ما تسبحنا شربنا "جاي الضحى"



والغدا شرينا من ستاربكس لان امي كان بخاطرها تجرب الفلافل وكانوا يايبين سلطات يديده




وللأسف الفلافل طلعت مو شي ما اعجبتنا
...

والعصر طلبنا بسبوسه من لقيمه لان اهلنا كانوا بسيرون علينا





الصراحه طعمها واااااايد حلو ولذيذ وعجبتني العاديه إلي مافيها كاكاو



وزهبنا الجاي وبخرنا بانتظار الاهل


وعقب ما وصلوا خذينا اليهال ونزلناهم يلعبون بالألعاب



وبعدها سبحوا بحمام السباحه مال اليهال



وهذي حضانه حق اليهال

وآخر ليلة وصلتنا رساله (طرده بشكل محترم هههههه)


وأخيراً عقب 5 أيام شلنا قشنا عشان نرد بيتنا :(



ولا تزال الجنطه متروسه أكل هههههههه