الثلاثاء، 30 نوفمبر، 2010

حوض للسمك

الي عندهم هواية تربية الأسماك 

ويحبون يهتمون فيهم ويدلعونهم

ويبون يغيرون عن الأحواض العادية 

لقيت في THE One هالحوض 

شكله وايد حلو وله استخدامات عديده 

- حوض للسمك 
- ديكور 
- ويصير طابقين 


كل جهه شكلها مختلف عن الثاني


وهذي طريقة الحوض شلون يصير طابقين

لازم تشترون 2


ما شريته لاني ما احب السمج 

السعر:  12.950 دينار

الاثنين، 29 نوفمبر، 2010

The Next Three Days


نبذة عن الفلم:

تنقلب حياة زوجين رأسا على عقب عندما يتم اتهام الزوجة بارتكابها جريمة قتل

رايي بالفلم: 

استانست على الفلم احب هالنوعية من الأفلام  واتوقع احسن الموجود حاليا

نوع الفلم:

جريمة ودراما


للحجز 

الأحد، 28 نوفمبر، 2010

شجع الأزرق واطلب

امس بليل طلبت من موقع Venyooo

درزن كب كيك من Chocolate Bar 

+

تي شيرت اوه يا الأزرق من F2o

ووصلني الطلب اليوم قبل المباراة بساعه او اكثر تقريبا


وهذي التي شيرت 


كشخت فيها وقت المباراة وقعدت اشجع ههههههه


درزن كب كيك فيه 3 انواع من الكيك 

Vanilla - Chocolate - Velvet 

2 على علم الكويت 

و الباجي مكتوب عليهم:

- يا متكتك 
- اور كاميل
- هايدوه


وكله كان FREE

الي ما عجبني بالكب كيك الكريمه الزرقه 

تصبغ الحلج والاسنان

ملاحظه: الموقع مسوين عرض لتشجيع الأزرق اول ١٠ طلبات لدرزن كب كيك 

+

تي شيرت

بـبـلاش 

الكويت x اليمن


الحمدلله رب العالمين 

3 - 0

الف مبروووووووووووووووووووووووك التأهل لمنتخبنا 

والله يعطيكم العافيه 

مبروك الـ 7 نقاط

وبإذن الله الكأس أزرق كويتي

لعشاق السفر

كتابين حق الي يحبون السياحة والسفر

والي يحبون يستكشفون مناطق غريبه وعجيبه


الكتاب الأول: 

MAKE THE MOST OF YOUR TIME ON EARTH

حبيت هالكتاب وايد لانه ملون وصفحاته كبيره وفيه صور كبيره

وفيه دول واماكن غريبه وحلوه وتشووووووووق

ويحطون الخريطه وموقعها وشلون توصل لها 

واهم المطاعم والفنادق والأماكن السياحية والأثرية 

وكل قاره كاتبين اهم الدول الي فيها والمناطق

مع شرح تفصيلي

واهم المهرجانات بكل دوله مع وقتهم 

وكل دوله متى احلى وقت تزورونها فيه


الكتاب الثاني:

1,000
PLACES TO SEE BEFORE YOU DIE

اسم الكتاب يخرع شوي ههههههههه

الي ما حبيته بهالكتاب انه ابيض واسود 

بس فيه معلومات وايد وكل دوله حاطين اهم المناطق السياحية فيها والفنادق

والي لازم تزورها وما تطوفها

تقريبا نفس الكتاب الاول 

وفيه خرايط ومواقع الدول وصور


وفي دول كنت رايحه لها وشايفتها بس لما قريت عنها بالكتابين 

حسيت اني ما شفت شي فيهم هههههه

انصحكم تقرونهم وتاخذون فكره عالسريع قــبــل لا تقررون وين بتسافرون

الجمعة، 26 نوفمبر، 2010

متوفر الآن


Toffee Nut Syrup

متوفر الآن في أفرع ستاربكس 

اليوم خذيتلي واحد 

السعر 3 دنانير

الخميس، 25 نوفمبر، 2010

الكويت x السعودية

راسي عورني 

ارتفعت حرارتي 

راح صوتي 


الحمدلله رب العالمين 


شكرا لجميع اللاعبين 

شكرا لنواف الخالدي

نستحق الفوز بس الحمدلله راضين بالتعادل 

0 - 0

مبروك الـ 4 نقاط

الثلاثاء، 23 نوفمبر، 2010

Blister Plaster

ريولي كان فيها جرح وما اقدر البس الجوتي - وانتوا بكرامه

وعندي انواع وايد من البلاسترات 

كل يوم اجرب واحد ما ينفع

لما البس الجوتي ما اقدر امشي  من العوار 

فرحت Boots ولقيت هذا البلاستر 


واهوا اساسا مسوينه للجوتي 

وفيه علاج للجروح 

ويكون شفاف شكله حلو ما يبين 


ومن حطيته قمت امشي عادي بالجوتي ما يعور 

ولا يفج بالماي 

خليته ٣ ايام على ما طاب الجرح 

ووايد عجبني 

والعلبة فيها ٥ بلاسترات 

وسعره جريب الدينارين 

وفي منه انواع وايد

الاثنين، 22 نوفمبر، 2010

الكويت x قطر

المباراة اعصااااااااب 

لي اخر ثانية 

الوقت بدل الضايع ٤ دقايق حدي ضاق خلقي 

وقاعده على اعصابي

ما صدقت خلصت المباراة 

وهياااااااااااااااااااااااااااااااااا

1 - 0

الف الف مبرووووووك للأزرق 

مبروك الـ ٣ نقاط

الحمدلله رب العالمين

وان شاءالله الكأس كويتي

خوش افتتاح!

دحرجه أمامية 

دحرجة خلفية 

ناس مو حافظين 

الصوت ما ينسمع

الابله تتمشى مع جيسها بنص الملعب 

الي يرقصون يسلمون على الكاميرا ويبوسونها

بنتين متجابلين وكل وحده تحذف الكره للثانية

باليه على الطريقه اليمنيه 

دراكولا في الملعب 

كديش تركض ما تدري شتسوي ناسيه الحركات

فهمتوا شي؟! 

انا ما فهمت 

بس الي اعرفه اني ضحكت وضحكت وضحكت 

ودموعي تصصصصصب من كثر الضحك 

هذا الي صار بافتتاح كأس خليجي 20 في 

الــيــمــن

كلنا معاك يا الأزرق


اليوم ان شاءالله تبدأ اول مباريات كأس خليجي ٢٠ 

هالدوره احبها وايد واتابعها 

والله يوفقكم يا الأزرق 

وهذا جدول المباريات

دوري النقاط
 22-نوفمبر-201019:00اليمن x السعودية
 22-نوفمبر-201021:00الكويت x قطر
 23-نوفمبر-201016:00عمان x البحرين
 23-نوفمبر-201019:00العراق x الإمارات
 25-نوفمبر-201019:00قطر x اليمن
 25-نوفمبر-201016:00السعودية x الكويت
 26-نوفمبر-201016:00الإمارات x عمان
 26-نوفمبر-201019:00البحرين x العراق
 27-نوفمبر-201019:00اليمن x الكويت
 29-نوفمبر-201019:00عمان x العراق
 29-نوفمبر-201019:00الإمارات x البحرين
 28-نوفمبر-201119:00قطر x السعودية


اما الشعار شي عجيب الصراحه هههههه

الأحد، 21 نوفمبر، 2010

Low fat low price

اليوم وانا بايكيا شفت هاللوحه 

عند الكافتيريا الي بره 


لوووول حتى ايكيا صار عندهم فروزن يوقرت 

وسعره بـ 500. فلس 

اتوقع بعد جم شهر بتلقونه بالكشكات بدل برد مكينه (Soft ice-cream)

ما جربته لاني ما احب الاوريجينال

السبت، 20 نوفمبر، 2010

جديد Lakoocha

شهر ٦ الي طاف كتبت عن تجربتي لـ Lakoocha


والشي الي ما كان عاجبني فيه اهوا المكان 

ووقتها ما كان عندهم خدمة توصيل 

سمعت من اسبوعين انهم قاموا يوصلون 

وعلى طول طلبت 

ووصل الطلب ما طول وايد 


وطلبت طلبي المعتاد 

وحاطين بكل جيس بلاستيك داخله ثلج 

عشان ما يذوب 


ووصل مو ذايب وفريش 

وعندهم نكهة جديده على كـاكـاو جربته طعمه جنه ايس كريم بس اخف

اخر طلب الساعة 10:30 مساء

خدمة التوصيل: 25758585

الثلاثاء، 16 نوفمبر، 2010

عيدكم مبارك


الي عنده خروف زايد يسلفني

الخميس، 11 نوفمبر، 2010

Babies



فلم وثائقي يتكلم عن حياة الأطفال في 4 دول مختلفة في العادات والتقاليد وطريقة العيش

وشلون كل طفل يتأقلم مع بيئته

من ولادته لما يصير عمره سنه

والدول اهما (نامبيا - اليابان - منغوليا - الولايات المتحدة الأمريكية)

الفلم وايد وايد حلو

انصحكم تشوفونه

ملاحظه: الفلم يصلح للنساء فقط + في لقطات تلوع الجبد

وهذا اعلان الفلم

الثلاثاء، 9 نوفمبر، 2010

لقيتهم!

تذكرون فيولاتي الحلوين الي كانوا بلندن شهر ٥؟

الي ما يذكرهم بزعل منه 

المهم لما كنت بلندن ماكانوا موجودين 

بالصدفه كنت اتمشى في  Selfridges

جان اشوفهم 

طبعا وقتها لا تشوفون وناستي 


قعدت احوس واصورهم واصور معاهم 


بس للأسف كنه مستعيلين 

فما مداني انقي على راحتي


توهقت مادري اي واحد اخذ 

كل فيول احلى من الثاني وفي واااااايد 

كنت ابي اكبر واحد بس ريلي ما رضه :( 

يقول الجنطه ما تكفي وااااااااااه :(

اخر شي خذيت ٢ صغار

هذا الأول


وهذا الثاني


الي يضحك ان من ديره لي ديره وانا شايلتهم بجيس

ما حطيتهم بالجنطه خفت عليهم هههههه

بس الحمدلله شريت الي بخاطري والمبلغ يروح تبرع للفيله 


وهذا شريته من اسبانيا - ميخاس


وهالثلاثه بعد من ميخاس


يابختي فيهم :)