خوش تسريحات

LEGO Burj Khalifa

لما كنت بدبي شريت ليقو برج خليفة 

توقعت شكله بكون غير طلع كله دوائر تركبونها على بعض

وفي بعضهم داخلهم عصاة

وهم كنت متوقعه انه بكون طويييل نفس الصجي ههههه 

وتركيبه سهل جدا

شكله النهائي

عيبه ينعوي بسرعه ويصير برج خليفة المائل

خذيته من: At The Top - Dubai Mall 

ATMOSPHERE Grill, BURJ KHALIFA

تذكرت هالمطعم ما تكلمت عنه بالبلوق 

مطعم اتموسفير والي يعد اعلى مطعم بالعالم ويقع بالطابق 122 - 442 متر

بس حسافه ما صورت المطعم من داخل 

كل الصور احنا فيها 

فراح يكون التقرير 

قـــــرقــــــة 

حجزنا قبلها بيوم وقالولنه اذا تبون عشا بعد اسبوعين 

واذا غدا باجر الساعه 2 

واخترنا غدا 

طبعا بالحجز ياخذون رقم الفيزا ويسوون بلوك على مبلغ معين (نسيت جم)

ولازم توصلون بالموعد او عندكم 15 دقيقة تتأخرون فيها 

وعقب الـ 15 دقيقة يروح عليكم الحجز والمبلغ لوول 

لما حجزنا دزولنه ظرف وفيه ورقة الحجز 

وقوانين المطعم: 

- الملابس لازم تكون Smart elegant

الرجال: 

المسموح: قميص جم طويل وجوتي مسكر - بنطلون رسمي او جينز -

دشداشه - او اي لبس رسمي للدول - والصندل مسموح فقط مع الزي الرسمي للدول 

مثل الدشداشه وغيره 

الممنوع: الشورت - البرمودا - البنطلونات والجينزات الوسيعه والمشققه - البلوزات 

الي فيها وايد الوان ونقشات كبيره - جوتي رياضة

النساء: 

المسموح: مو كاتبين شنو المسموح لانه يدرون هدومنه معقده ههههههه 

الممنوع: فليب فلوب (بوصبع ههههه) - البنطلونات والجينزات الوسيعه والمشققه - 

الهدوم الي فيها وايد الوان ونقشات كبيره - جوتي رياضة 

- اقل مبلغ تدفعونه للشخص الواحد بفترة الغداء 300 درهم 

  اقل مبلغ تدفعونه للشخص الواحد بفترة العشاء 450 درهم

- الأطفال مسموح دخولهم فوق العشر سنوات

- التدخين ممــنــوع

- ما يصير تختارون الطاولة الي تبونها والطاولات الي يم الدريشه محدوده
اهما ينقون على كيفهم

هذي القوانين الي مكتوبه بالورقة

المطعم تصعدون له عن طريق فندق ارماني

تركبون الاصنصير Level C

بعدها يجيكون على الحجز ويعطونكم كرت

 عشان تشغلون الاصنصير الي يوديكم للمطعم

وتصعدون الى الطابق رقم 123

عقبها تنزلون دري (درج) الى الطابق رقم 122 الي فيه المطعم

والدري يكون لازق بالجام وانتوا تنزلون تشوفون المناظر من فوق

وتوصلون عند الاستقبال

واخيرا تيي الجارسونه وتقعدكم بالطاوله

ولحسن حظنا طاولتنا عند الدريشه

الفيو كان عادي صحرا لانكم لما تقعدون تشوفون مسافه بعيده مو نفس لما توقفون

اذكر لما صعدنه At The Top كان الفيو احلى واونس

اول ما تقعدون اييبون لكم صمون وزبده من فرنسا لوول

نيي حق الطلب

المقبلات:

طلبت ربيان نسيت اسمه بس اذكر انه المفروض تمبورا

اول ما يابوه وله الربيان جنه بنك ههههههه

ومعاه تفاح اخضر مبشور وجريب فروت وخضرا :(

كليت الربيان وقطيت الباجي

جان تيي الجارسونه وتقولي مو عاجبج؟

قلت لها لااا ابد من قال حلووووو لذييييذ ههههه

شالت اكلنا وراحت

شوي جان تيي وتقولنا انه اهيا كلمت الشيف (الطباخ) وقالت له اني ما كليت

فالظاهر كسرت خاطر الشيف وقال انه راح يسويلي شي ثاني احلى

قلت لها اوكي

جان تيي المفاجأه ويليتها ما يت ههههههه

طبعا يابوا صحنين حقي وحق ريلي

وفيه شي صغيييييير وشكله غريب وريحته خايسه

انا توهقت ما كليته ههههه قصيته وقطيته

تذكرون حلقة مستر بين لما طلب لحم وطلع ني وتوهق فيه

حسيت نفسي مستر بين هههههه

المهم قصيته وقطيته قلت حق ريلي اكله مالي خلق تيي الجارسونه وتزعل ههههه

جان يقولي ترا قاعده تراقبج

وله الاخت الكريمه طول المده واقفه بعيد تراقبني هههههه

شافتني ما كليت جان تيي قالت لي ما اعجبج؟!

قلت لها شنو هذا؟

قالت لي هذا اسكالوب يعيش بقاع البحر ويصيدونه الغواصين بالايد

يعني منقينه نقوه

وااااي لاعت جبدي قلت لها انا ما اكل شي من البحر الا الربيان

خذت صحنها وراحت وفكتني من المقلب


الوجبة الرئيسية: 

طلبت ستيك تندرلوين مع فرايز

وكان عادي

ومع الوجبة الرئيسية يابت لنا 4 او 5 انواع صلصات ماسترد

يايبينهم من انجلترا - فرنسا - ونسيت اي دول

ضحكوني كنت بقولهم كل الصلصات بالجمعيه من دول بره هههههه

وطلبنا كولا

واخر شي قلنا نشرب قهوه ونستمتع ومع القهوه اييبون كيك ليمون

والحساب كله كان

100 وشي دينار 


صج الاكل ما كان حلو ووايد غالي

بس استانسنه وجربنه شي يديد

ومو بخاطري اجربه مره ثانيه

الي ما راح له يروح لانها تجربه حلوه بس الاكل مو حلو

وهذي كانت قرقتي عن مطعم اتموسفير جريل - برج خليفة 

للحجز: 

00971 4 8883828

reservations@atmosphereburjkhalifa.com

Link

صور من دبي

ياحلوها دبي ما ينمل منها كلش ماشاءالله

خلف الله علينه ماعندنه غير المطاعم

في مشاريع وايد قاعده انطرها تخلص بدبي خاصه City of Arabia

لما رحنه دبي مول توقعت الاكواريوم مسكر

واختي توقعت بتلقى السمج حاطينهم بجياس (أكياس) ههههههههههههه

بس الحمدلله كل شي كان طبيعي وما شاءالله ما جنه كان فيه شي

المهم بهالبوست بحط لكم جم صوره من سفرتي

هذي فرشتي بالفندق مادري شفيه المعجون انتفخ

عاد انا ما اعطل على طول يبت الكاميرا وصورت هههههه

ثاني يوم رحنه سوق البحار الي يم دبي مول


قعدنه في كافيه شكسبير

القعده بره وايد حلوه

بس الكافيه فيه عيب واهوا "الشيشه" :(


عقب ما خلصنه مريت يم المحل الي ينقشون الحنه

عاد انا ما اواطنها ولا احب ريحتها

بس شفت وحده قاعده تحط وشوقتني

ودشيت وشفت ان الحنه السوده مافيها ريحه جان ابسط واطلع الكاتالوج واقعد انقي

قلت حق الي تنقش الحنه ابي على فيول قامت تضحك علي

ولقيت صورة فيل وقلت لها ابي معاها نقشه وسوتلي :)

في فستفال سنتر بره كور يدشون داخلهم اليهال يونسون موجودين من شهر 11 الي طاف

مادري اذا بشيلونهم او لا

اسمهم Fun Balls

مصورتهم فيديو بس ماقدرت احطه لان فيه اصوات وعفسه

ركبنه المركب تمشينه فيه

باتشي دبي مول مسوين برج خليفه من كاكاو

منو يبي ياكله؟ ههههه

آخر شي

هذي هدية حق رورو

في جم شغله شريتهم كنت بحطهم بس ما صورتهم ومالي خلق اروح اصور

ان شاءالله اذا صار لي خلق بصورهم

مادري شفيني صايره كسلانه :(

ولهت عليكم

السلام عليكم

شلوووووونكم؟

تصدقون انا من احب شي يختفي او يخترب او ينقرض او يسكر

هالأيام متولعه ببرج خليفه (دبي) توليته تصوير ترست الميموري كلها صوره من كل الجهات

وقررنه ان نصعد البرج ولسوء الأحوال الجويه سكروه حتى إشعار آخر :(

المهم هالمره ما سويت لكم تقارير مع ان رحنه اماكن يديده ما رحت لها من قبل

لاني كنت معاقبه لابتوبي مخليته بالكويت طفرني كله يعلق

وخذيت لابتوب امي عشان افضي الصور فيه بس للأسف الميموري طلعت ما تركب عليه

ومابي اشتري ميموري ثانيه ورفعت شعار "اقتصد لتدوم" .. فاقتصدت بالتصوير

واغلب الصور ارتزيت فيهم ههههههههههه

وان شاءالله بحط لكم جم صوره من الي صورتهم

!Again to Dubai

اليوم مادري شفيني ما بقى بوست ما كتبته هههههههه

يالله حطيت الي عندي كله قبل لا اسافر

والي ما شافهم يضغط على:

Post 1

Post 2

Post 3


اشوفكم على خير ان شاءالله

Dubai Part 7

ققرت ان يكون هذا آخر تقرير!

كان المفروض يكونون 10 بس حذفت 3 تقارير

بهذا التقرير راح احط لكم صور من امارات مول ما حطيتهم من قبل

وصور من المطار

يالله نبدأ

هذا ريوقي آخر يوم ;q هههههه

هني اعتقد التوسعه الي قاعدين يسوونها بس مادري متى تخلص

هني كان في يوم الجمعة

الدور الثالث نصه مخلينه حق المصلين


اول ما بدوا بالصلاة صار لويه من الأجانب تيمعوا دار مدارهم وقاموا يصورون

وانا كنت طالعه من المصلى جان اصورهم لووووول

وبنفس الوقت الي قاعدين يصلون فيه .. مره وريال اجانب كانوا قاعدين يتبادلون القبل @@

كان يبيلهم الحذاء الطائر


فيول ابو عيون فتانه

هذا المحل احبه

لازم احوس فيه

هيووووج فقمه

نعامه

هالبطات يهبلون ناعمييييين

البقره الحلوب

امي حدها تأذت لاني كل واحد اوقف يمه والمه واصور وياه

احب الألعاب

هذا الكوالا قعدت بين ايده شكبره ههههههه

هذا جنه اسمه خرتيت

شوفوا جم سعر البطريق

1495 درهم !!!

وترا هذا صغير مو كبير

يعني الكبار نفس الي فوق مادري بجم

مادري منو يشتريهم؟

ماموث

هذا الحصان الي يهز مال اليهال

بـ 22,900 ألف درهم بس !! ههههه

والأسود أغلى بـ 25,900

فيول خشبي

ام السعف والليف بس مالت الهلوين

يييييييع

هذا الاعلان ضحكني

من صجهم ملابس محتشمه؟!!

الأجانب مبدعين بلبسهم وفي بعضهم يلبسونه بس بلوزه !!!

جنه قاعدين بدول أوروبا

بس غريبه أول مره اشوف الأجانب ما يلتزمون بشي

مع انه الاعلان موجود بكل مكان

وهذا اعلان ثاني

اقروا الي داخل المربع الأحمر

ههههههههه لا تعليق!!!!

-----------------------------

والحين بحط لكم صور المطار

هذي محطة مترو توصل للمطار بس ما خلصت

قشنه

جوله في المطار

هذي جنها مطقاقة الذبان هههههههه

ولما تطقون فيها اي شي تطلع صوت

مسكينه اختي :q جربتها عليها هههههههه

كنت ابي جبن بس امي ما رضت :(

m&m's

كـــنـــدر يميييييي

هذي الجار داخلها جاي كنت باخذها بعدين هونت

بعد جوله طويله عريضه شريت كندر ميل

واختي شرت جيلي بينز وهالطويل مادري شنو من سوالف الميك اب

بعدها رحنه عند البوابه

جان تتذكر اختي انها ما شرت قلم ههههههه

وردينه انا وياها عشان القلم

وكاهو القلم هههههه

على ما يبطلون البوابه

كنت يوعانه جان ابطل وجبتي الكندريه


وهذا الي داخلها

فكرت وفكرت وفكرت

شنو اكل هههههههه

ولاني يوعانه اخترت بوينو

وهذا الممر الي يودي للطياره

الطياره كانت زحمه ولوية يهال وبجي والي وراي اووووف قرقه

ما سكروا حلجهم

قلت احسن حل اقعد اسمع لي جم اغنيه على ما نوصل

لا من الي وراي ولا من الي جدامي :(

الطريج كله ساعه وثلث يعني ما يسوى تنام قووووووووم!!

وصلنه كويتنه الحبيبه بالسلامه

الله يحييكم :)

نسيت احط هذا القلاص شريته من كشك ديزني

داخله ماي تحطونه بالفريزو يصير ثلج وتشربون فيه عصير او بيبسي او ماي

ويكون بارد احسن من الثلج لانه اذا ذاب يصير ماي ويختلط مع العصير

وشريت هالخروف Sean The Sheep

انتهت الرحلة

وانتهى التقرير

شكراً لكل من تابعني