الأحد، 29 مايو 2011

Ombre Nail Polish

كنت رايحه ليلي اند دي 

(لمشاهدة تجربتي السابقة اضغط هنا)

جان اشوف الي تسويلي اظافري صابغه اظافرها بطريقة غريبه 

اول مره اشوفها 

سألتها عنها وقالت لي انها طريقة يديدة  واسمها 

امبري نيلز


سويت سيرج عن الصبغ والالوان والطريقة 

اكتشفت انها قديمة من 2009 كانوا هابين فيها وايد 

ويبتلكم جم صورة 








وهذي طريقة ثانيه التدريج يكون بالظفر نفسه






طريقته جدا سهله 

تضيفون لون ابيض مع الصبغ او اسود على حسب 

اذا غامج او فاتح وفي بعضهم يستخدمون لكل ظفر لون 

وهذا فيديو يوضح لكم الطريقة



ما ادري اذا راح اجربه او لا 

كل مره اقول بغير عن الاحمر او الودري اغير يوم وامسحه

شكلي بجربه ساعه وامسحه لوول

الخميس، 26 مايو 2011

سويت سيسيز - Sweet CeCe's

وصلتني دعوه من

 سويت سيسيز - Sweet CeCe's 

وايد استانست على الدعوه لاني مدمنة فروزن يوغرت


وصلنا بالموعد 

وهذا المحل من بره


ومن داخل 



ما صورت الا هالقعده


هاللوحات استانست عليهم


عندهم 6 أنواع من اليوغرت وكلهم Non Fat

اوريجينال - مشمش - بينك ليمونادة - 

فراولة وكيوي - انجليش توفي - شوكولاته

Original - Apricot - Pink Lemonade - 

Strawberry Kiwi - English Toffee - Chocolate mania


ملاحظة: سويت سيسيز عندهم اكثر من 100 نوع من اليوغرت وكل شهر راح تتغير الانواع 

وراح يسون تصويت بالفيس بوك وتويتر والنوع الي ياخد اعلى اصوات راح يتم موجود



الاضافات




حبيت هالطريقة



عندهم 3 احجام

Sweet (small

Sweeter (medium)

Sweetest (large)


المشروبات الساخنة: 

اسبريسو - كافيه لاتيه - كابتشينو - شاي اخضر - شاي اسود - 

شاي اعشاب - شوكولاته ساخنة - سويت سيسيز سبيشال


كب كيك: 

فانيلا - ريد فالفيت 


اول ما قعدنه يابولنه كل انواع اليوغرت نجربهم 

كلهم اعجبوني الا البينك ليموناده 

الاوريجينال اكثر نوع عجبني

والي حبيته بالانواع الباجي انه طعمهم غريب مو نفس باجي المحلات  


لما يابوا لنا الكب كيك استانست على طريقتهم شلون حاطينها



جربت هذي وكانت فريش وحلوه


ويابوا لنا 

Sweet CeCe's Special Drink 

وهالمشروب مو على طول موجود كل فتره يغيرونه 


مادري شنو مكوناته

وكان وايد خفيف ولذيذ


ميني بسكويت حلو مع القهوه


كابتشينو ماجربته 

امي تقول وايد طعمه حلو

مافيه حليب وايد ولا قهوه وايد


بعدها جربنا

كلاسيك كريب - Classic Crepe

وفيها هوت فدج - نوتيلا - كراميل وتقدرون تحطون اضافة وحده من الي فوق

عاد انا كلش ما احب الكريب بس هذي اعجبتني وكلنا حبيناها


جربنا نوعين من الوافل 

كلاسيك وافل - Classic Waffle 

الأولى فيها نوتيلا هذي الي جربتها وطعمها لذييييذ


والثانيه فيها كراميل وكاكاو ومابل سيرب 

ما جربتها لاني ما احب المابل سيرب 

امي واختي اعجبتهم اكثر من الكاكاو


وعندهم بعد نوعين غير الي جربناهم 

Sweet CeCe's Crepe 

Sweet CeCe's Waffle 

تقدرون تضيفون معاهم فروزن يوغرت - نوتيلا - هوت فدج - 

كراميل - 4 اضافات من الي فوق

وبالاخير عطونه كب كيك تيك اوي 


و 4 فروزن يوغرت 

ما صورت الا 2 وقبل لا يحطون الاضافات كنت لاهيه 


راينا: 

الفروزن يوغرت عجيييب وايد حبيته والسبب انه خفيف ما يطفح البطن 

وطعمه غريب مو نفس الي متعودين عليه

 والحلو فيهم انه كل شهر راح تتغير الانواع

المشروبات بعد كلها حلوه

والكريب والوافل والكب كيك فريش وطعمهم لذيذ 

والقعده بالكافيه وايد مريحه وهدوء بسطنه نسولف نسينا نفسنا 

سكر المحل واحنا قاعدين هههههه 
كل الشكر لسويت سيسيز على دعوتهم لنا

 لتجربة الـ Frozen Yogurt & Treats

والله يوفقهم 

حاليا ما عندهم خدمة توصيل بس تقدرون تدقون عليهم 

ويطلعون الطلب لي سيارتكم 

مكانهم: دار العوضي - الدور الأرضي 

تليفون: 22322877



The Beaver

كنت انطر هالفلم من زمان مادري انه نازل 

امس شفناه بالسينما


الفلم نوعا ما ممل 

بس الي حبيته القندس او الـ Beaver


لما رديت البيت جان اتذكر عندي فيول جان البسه بيدي واقلده هههه 


IMDb Rating 6.9/10

الأربعاء، 25 مايو 2011

خوش طرارة


احسن من الطراره الي عندنا الي تشيل ياهل وتطر فيه 

الثلاثاء، 17 مايو 2011

فكرة لتغليف الهدية - Gift Wrapping Idea

اليوم بحط لكم فكره لتغليف الهدية 

ما صورتها من اول شي عقب ما خلصت

صورتها عالسريع وقلت احطها لكم

الأدوات المطلوبة: 

- قرشه (جرَه) شفافة
- كريشة يابسة
- شريطة 
- مقص
- لزاق او صمغ حار 
- ورد مجفف او صناعي
- قش (لونين) 
- وردة بحجم متوسط

اول شي نييب القرشه ونحط داخلها القش

وتختارون اللونين الي تبونهم


ونخلط معاهم الورد


نحط الهدية داخل القرشة وفوقها قش وورد ونسكرها 

بعدها نييب الوردة ونلزقها على الغطى


ما لقيت ورده نفس الي ابيها 

فشريت شباصة من محل Accessorize

وحطيت تحتها لزاق لان ماعندي صمغ


ونثبتها عدل فوق القرشه بهالطريقة


اخر شي نفرش الكريشه 

ونحط القرشة بالنص ونلفها عليها بطريقه تكون نفس الورده الكبيره 

ونلفها بالشريطة ونربطها بشكل حلو


واخرشي نحط شوية قش داخل الكريشة 


وبجذي يخلص التغليف

والهدية جاهزه للتقديم


سويت 2 وهذي النتيجة


والحمدلله اعجبت خواتي