CHOCO CAFE & Cucina

الويك اند الي طاف قلنا بنجرب مطعم 

كوشينا - Cucina

الايطالي 

 بفندق ميسوني - Hotel Missoni

ما صورت شي من المطعم خذيت الصوره من قووقل 

المطعم قعدته مريحه وحلوه وكان هااااادي ماكو احد 

بس الاكل اقل من عادي ما عجبني توقعته احلى 

اتوقع اني ما راح اروح له الا لما يغيرون المنيو 

-----------------------

عقبها قلت اجرب

  شوكو كافيه - CHOCO CAFE

لانه وايد مادحينه 

ورحنه ريوق

اول ما دشينه كان فاااااضي توني بصور المكان جان يزدحم لووول 

بس قدرت اصور هالطاوله الي يم الباب

اغلب القعدات مريحين

هذي طاولتنه

المنيو

يابوا لنه توست ومربى وعسل وزبدة

اومليت مع مشروم وجرجير وطماط

وانا طلبت فوكاشيا

Focaccia caprese

فيها موزاريلا وطماط وزيتون

ومعاها بطاط بس ما عجبني لانه فيه كــمــون!

كابتشينو 

عجبني لانه طعم القهوه قويه 

مو نفس الكافيهات الباجي الي يكون كله حليب

ومعاه كاكاو

والجارسونه انصحتنه نجرب هالكيكة 

نسيت اسمها 

بس نفس المولتن ومعاها ايس كريم فانيلا وداخلها كاكاو ذايب وحار

اهني بعد ما ماتت

عيب الكيكه انها ثقييييييييييله تغث ما تقدرون تكملونها 

والحلو فيها مافيها شكر وايد 

عموما الكافيه عجبني احسن من مطعم كوشينا

وقعدته حلوه واحلى شي انه هادي ماكو لويه

Link

Dubai Part 1

"شهادتي واسطتي"

لما كنت بدبي وصلني الخبر التعيس والي اهوا تعييني في احدى الوزارات الي طايح حظها

فأول ما رديت على طول رحت الديوان وسويت رفــــــــــــض

فقلت حق الي تشتغل ابي اسوي ربط مع اي وزاره ثانيه قالت لي نصيحه لا تسوين لأن غيرج قاعدين ينطرون سنين وأشهر وليلحين ما انقبلوا

قلت لها شنو الحل؟!

قالت لي نطري التقديم الياي وسجلي واحتمال يقبلونج بالــصــحــه؟!!!!

نعم ؟!! ماكو شغل صح؟!!

جان تقولي باختصار شديد عندج واسطه تعالي نشغلج بالمكان الي تبينه ما عندج قعدي نطري !!!

قلت لها يعطيج العافيه بس مو جذي تنقال اشكره !!!

يعني مادري ليش دارسه وتعبانه المفروض طول هالسنين مدورتلي واسطه ومريحه

والي يبط الجبد انه الحين احنا قدمنه بالنت ليش لازم نروح الديوان ونتبهذل فوق وتحت عشان نسوي رفض حق وظيفه اهما قاطينه فيها؟!

ليش ما نرفض بالنت؟؟

افضل اني اقعد بالبيت مرتاحه احسن من اني اقبل بوظيفه خايسه

----------------------------------------------

المهم راح احطلكم تقرير عن سفرتي طبعا ما بقى شي ما صورته هههههههه

يالله نـــبــــدي

طيارتنه كانت الساعه 7 الصبح وما كنت نايمه الا ساعتين

وصلنه المطار على الساعه 5:30

وهذي طيارتنه

قبل لا تطير الطياره لازم دعاء السفر


وكنت قاعده بمكاني المفضل يم الدريشه هههههههه


طرنااااااااااا

شوفوا المنظر المغبر هههههه

بطلت المجله قلت اتسلى فيها بس طلعت سخيفه

لما قربنه صوب قطر والسعوديه الجو كان كله غيم

شكله حده يشوق جنه شعر بنات لووووول

دشينه بين الغيوم

قربنا قربنا

شوفوا برج دبي

بس الجو كان شويه مغيم فمو واضح عدل

وهبطنا بالسلامه

هذي اخت طيارتنه

وهذا المطار

وخذينه خطوط من اتصالات

مسوين عرض الخط بـ 75 درهم وفيه رصيد بـ 75 درهم

خوش عرض

رصيدي ليلحين ما خلص باقي فيه 30 درهم متحسفه عليهم ههههههه

ركبنه التاكسي

هذي دعاية المترو

هذي محطة المترو

برج دبي

وهذا المترو في محطة مول الامارات

وصلنه الفندق


اول مره نحجز في شقق فندقيه

يحليله مجكنم

ماشاء الله اللوبي وايد كبير ههههههه

وهذا المطعم

أول ما دشينه يابوا لنا عصير :)

وهذوله قشنه

صعدنه حق شقتنه

الممر ضحكتني جنه مستشفى الولاده وحاطين ورد عند بابهم ههههههه

يالله بسم الله ندخل

الشقه كانت وايد كبيره ونظيفه

هذي الصالة

وهذا الحمام (وانتوا بكرامه) الي يكون بره الغرف

وهذي داري بروووووووووووحي

وهذا حمامي

الحمام يصير داخل الغرفه

وهذي دار امي واختي

لوووووول اهما ثنتينهم بفراش وانا بفراشين

وعندهم بعد حمام

يعني الشقه فيها 3 حمامات

وهذا المطبخ

وهذي بلكونة الصالة

بلكونة دار امي واختي

بلكونة داري

خوش منظر ههههه

الصراحه وايد عجبني الفندق ... الشقه كبيره ومريحه واهم شي نظيفه

والحلو فيه انه قريب من امارات مول كنه نروحله مشي

ويمه محطة مترو هم تروحون لها مشي بس ليلحين ما افتحت

فاقرب محطه له اهيا محطة امارات مول



البقيه تأتي