الأربعاء، 13 يوليو 2011

شعب ممل


الوضع الي صاير بالكويت يملل 

بكل شي طبعا 

الزحمه الي بكل مكان وماكو اماكن يديده وغيرها 

بس انا بتكلم عن الهبات 

قبل لما نسمع بيفتح شي نستانس لانه نقدر نروح ونجربه 

حتى لو من اول يوم او اسبوع 

لا زحمه ولا لويه 

بس الحين لما اسمع شي بيفتح مايهمني ولا استانس 

لانه ادري بيصير طوااااااابير 

لمدة اشهر وما يخفون عنه الا لما يفتح شي ثاني يديد 

ويحولون 

خلصنه من بينك بيري يانه الفيشن برجر 

والحين شيك شاك 

اتوقع الطوابير بحولون عقبه على جيز كيك فاكتوري لما يفتح 

مادري متى راح نخلص من هالسالفه 

ونقدر نروح اي مكان على راحتنه من غير زحمه! 

وترا مو بس على الاكل لااااا بكل شي 

هدوم - ميك اب - مجمع يديد ... الخ

شعب بو هبه ... شعب ممل

هناك 4 تعليقات:

Sn3a يقول...

اختي مثل ما انتي بتجربين
غيرج بيجرب
مع احترامي لرايج جايونه
بس هم الناس لهم حق يروحون المكان اللي يبونه سواء كان ييديد وقديم بكل وقت

الكويتيين الحمدلله مو قاصرهم شي ماديا فتلاقينهم بكل مكان وعليهم بالف عافيه

اللي مايبي الزحمه يقدر يروح باوقات معينه مثلا
ofk الساعه 4
shake shack الساعه 12-1

انا ما اوقف بطوابير ولا انطر دور لاني اختار مثل هالاوقات

رورو الشخبوطه يقول...

حلطومه خخ..

ورايي مثل رايي سنع كل شي يديد اقدر اجربه مبجر لما اروح بوقت مناسب ..

انا اللي مو حابته انه ماكو شي يديد :\

واغلب الابداعات بالاكل وبس والسينما مافي افلام ..

غير معرف يقول...

المشكله كل شي مكرر وهم زحمه !!

زين شنو ما تملون تروحون نفس الاماكن الي تقدم نفس الخدمات ؟؟

والمشكله الجبيره لي صار زحمه على هلاقه @@

DoDoq8 يقول...

مادري انا اشوف اذا شي كان حلو ويستاهل فيستاهل الهبه لان شعبنا شعب شايف خير والله منعم عليه يحب يشووف ويجرب


بس الهبه الي على غير سنع مااحبها

يعني شيك شاك كليت منه وتمنيت ارد اصف طابور مره ثانيه بس افتشلت :P