Leaving to DUBAI

ساعات قليله تفصلني عن توديعكم

سأسافر بعد قليل إلى دبـــي إن شاء الله

وأرجع بعد أسبوع بإذن الله

سأشتاق لوطني الحبيب ... وسأشتاق لـــكـــم

أرجو الدعاء لي ولعائلتي بالسلامة

وقبل أن أودعكم ... أود أن أهديكم هذه الأغنية

http://www.youtube.com/watch?v=pFYyKNxamxw

مــع الــســلامــة

Brownies

المقادير:
1 و 4/1 كوب طحين
4 بيضات
1 زبده
3/4 كوب كاكاو بودر
1 و 4/3 كوب سكر
رشة فانيلا
1/4 ملعقة صغيره بيكربونات
1/4 ملعقة صغيره ملح

للتزيين:
صلصة الكراميل
كاكاو هيرشيز
آيس كريم

الطريقة:

نسخن الفرن

ونذوب الزبده


ندهن صينية الجيزكيك بالقليل من الزبده

وباقي الزبده نخلطها مع الكاكاو البودر

لما يصير الخليط ناعم

نخفق البيض بالخلاط الكهربائي على السرعه الكبيره

ونضيف له السكر بشكل تدريجي لما يصير مزيج محبب

نغير سرعة الخلاط ونخليها على السرعه الخفيفه

ونضيف له خليط الزبده مع الكاكاو + رشة فانيلا

نخلط الطحين مع البيكربونات والملح

بعدها نضيفه في المقادير الي بالخلاط الكهربائي

لما يتجانس

نضع القليل من الهيرشيز على الخليط

ويخلط باليد

نصب الخليط في صحن الجيزكيك

ونحطه بالفرن من 35 إلى 45 دقيقه

بعدها طلعوها بره لمدة ساعه خلوها تبرد

وتزين بالآيس كريم مع صلصة الكاراميل والهيرشيز

وبالعافيه

INGLOT

قبل جم اسبوع فتح محل INGLOT في مجمع الأفنيوز

وطبعا هالمحل متخصص بالميك اب

انا دشيته مع اني مالي شغل بالميك اب ولا اعرف شي عنه بس عجبوني الالوان

عندهم كل درجات الالوان وفي الوان غريبه

وفي عندهم Lip Gloss يقط الوان لووووول

والي لفت نظري صبغ الأظافر عندهم الوان وااااايد حلوه والوان غريبه مثل ازرق واصفر واخضر .... الخ

واحترت اي لون اخذ انا ما احط الا الاحمر ودرجاته او الوردي ودرجاته

فقررت اخذ وردي صج توهقت عندهم درجات تكون متقاربه من بعض يعني ما تفرق وايد

وفي نوعين مطفي او لمعه

واحترت بين 2 وخليت امي واختي ينقون ولما اختاروا جان اخذ الثاني ليش مخليتهم ينقون مادري هههههههههه

واسعارهم تعتبر مو غاليه

خذيت الصبغ بـ 3 دنانير

عندهم موقع بس ليلحين ما خلص

واذا بتشوفون صور عن المحل (بس مو بالكويت)

اضغط هنا

عصير الإمبراطور

قبل فتره اخوي اجتماعي طلب اني احط طريقة الامبراطور

بس ما كنت عارفه شنو فيه ... فدورت بالنت وسألت جم وحده وقالولي طريقته

المقادير:
1 كوب مانجو مثلج
1 كوب عصير مانجو (انا استخدمت الفونسو المراعي طعمه الذ من العصير العادي)
1 كوب آيس كريم فانيلا
موزه واحده

1 ملعقه صغيره سكر

نضع المانجو المثلجه مع عصير المانجو والسكر في الخلاط الكهربائي

بعدها نضيف عليهم الموز والآيس كريم



نخليهم يختلطون عدل مع بعض


وبالعافيه :)

أنصحكم تجربونه لــذيـــــــذ :>

بنقولكم سالفة ... للسامعين كافة

شرايكم بنيو لوك بلوقي ؟؟؟

تصميم: نمووول

تسلم ايدك على التصميم وايد وايد عجبني

ومشكور ويعطيك العافيه :)

----------------------------------

نيي حق سالفتنه

السالفه وما فيها اني بردكم سنيييييين لي وره بسؤال واحد بس!!!

السؤال هو:

شـنـو أول كـلـمـه نـطـقـتـوهــا؟!

الي ما يذكر يسأل أمه هههههه


بالنسبه لي ما قلت ماما ولا بابا ولا دادا

من كثر ما احب البطاط قلت:

"بـــــوتـــــاتـــــا"

Bowling

يوم الأحد الساعه 10 قعدت من النوم على صوت المنبه

وما كنت نايمه عدل والسبه البلونات!!!

قمت وخذيت لي باندول ... ودزيت حق رفيجاتي مسج وكتب لهم:

متى بتمروني؟ ... ولا تنسون دلاقاتكم

وقمت بدلت وزهبت دلاقي ... وشربت عصير وقعدت انطرهم



قالولي انهم قبل صلاة الظهر بمروني ويصلون عندي ... قعدت انطر طولوا

ولا رايحين مادري وين ويايبين باجي هدية عيد ميلادي ههههههه

وصلينه وخذينه دلاقاتنه وانطلقنه

وصلنه ديسكفري ... الوضع كان صخه ماكو احد بالمول الا احنا



وخذينه راحتنه عدل

بتاريخ 4/10 افتحوا كيرفز الي بديسكفري ...

حسافه ما لحقت عليه لان خلص اشتراكي بتاريخ 30/9

ودشينه كوزمو

واهني يبيعون كور البولينغ

اعجبتني بيتي بوب

وهذي على باربي ما احبها

تويتي ... زعفرانه هذي صورتها حقج

رحنا عند الكاونتر وقلنالها 3 ... وكتبنه أسامينه وخذينه الجواتي (وانتوا بكرامه)

كشخت فيه

ورحنا نختار الكور

كانت عاجبتني الزرقه والورديه بس وايد ثقال

وخذينه 4 كور

ورحنه حطينه قشنه على الطاوله

المكان كان وايد حلو وهادي

مكانه كان رقم 5

بدينه باللعب

الله يستر ...

صار دوري واخرت الخضره

يالله ... بسم الله ...

وهذي كانت النتيجه

يالله زين انا المركز الثاني

تمينه نلعب بس كانت نتايجنه تفشل ههههههه

شفنه ماكو فايده فناديت الي يشتغل وقلت له يرفع لنا الحاجز

اي جذي الواحد يقدر يلعب

ههههههه

زين زين في تطور

النتايج بعد الحاجز

انا صرت الثالثه

بس كان عندي امل اني اتقدم

ورفيجتي ما قصرت كل شوي تعلمني وانا ماكو فايده فيني

هههههههه

هذي النتيجه بعد التدريس

بس زدت 6

وناسه يوسوون حفلات عيد ميلاد

وهذا الـ Game قبل الأخير

وايد فرق بيني وبين المركز الثاني

بس قلت يمكن افوز ههههه

أيوااااااااااا طيحتهم كلهم

اقص عليكم بس جذي اتحلم :(


وهذي كانت النتيجة النهائية

انا المركز الثالث :(

مادري شفيني على الـ 3

ولما خلصنه بنرد الجواتي (وانتوا بكرامه) عطونه معقم


وعطونه السكور ريبورت

والي طلعت بالمركز الاول خذته

انا مابيه يفشل هههههههه

بعدها رحنه نلعب

واشوه عوضت خسارتي

ولعبنه بعد سلة

وخلصنه من اللعب وطلعنه على الساعه 3

الحمدلله وايد استانسنه خاصه انه ما كان في احد بس احنه بروحنه

وكل البنات الي ودهم يلعبون بولينغ يروحون ديسكفري

انا هذي ثاني مره اروح العب اهناك وناسه ماكو شباب كله يهال

يالله قوليلي شرايكم بسكوري؟

انفع اصير بطلة الكويت بالبولينغ؟