الاثنين، 31 أغسطس 2009

فليك كيك :)

المقادير:
1 باكيت كبير بسكوت بيتي بور
4 علب قيمر
6 ملاعق كبيره كاكاو بودره
1 علبه كبيره حليب مركز ومحلى
1/4 كوب حليب سائل
1 ملعقة كبيره جيلاتين
1/4 كوب ماء حار
4 كاكاو فليك مبشور

انا سويت الكيكه في صحن الجيزكيك الي يتبطل

نسخن نص كوب حليب سائل (بس هذا غير عن الي بالمقادير)

نغمس البسكويت بالحليب

ونصفهم داخل القالب

بعدها نضيف الجيلاتين إلى الماء الساخن ويمزج جيداً
بعدها يخلط مع جميع المقادير عدا الفليك

ونخلطهم بالخلاط الكهربائي جيداً

بعدها يصب نــــــص الخليط على طبقة البسكويت
ويضاف اليها 2 فليك مبشور


ونضيف عليها باقي الخليط

ويخلط باليد بشكل خفيف


بعدها تغطى وتوضع بالفريزر 5 ساعات حتى تجمد

ومن ثم تفصل الكيكه عن القالب
ويضاف إليها 2 فليك مبشور للتزيين
وتوضع بالثلاجه


وهذا شــكــلــهــا الــنــهــائــي


وبـــالـــعـــافــــيـــه


هناك 15 تعليقًا:

حياتي هدف مو عبث يقول...

خوش شي .. يعطيج العافية
أنا بجرّبها وخل أتشيحط مره وحدة اني أعرف اسوي كيك
P:

اجتماعي يقول...

تسلم ايدج ..
الحجية كانت تسوي لنا هالكيكة وايد ..

بس الحين بطلت .. مادري ليش !!

لازم نشيشها مرة ثانية :)

شاي الضحى يقول...

حياتي هدف مو عبث

الله يعافيج ... جربيها وعطينا رايج :))

شاي الضحى يقول...

اجتماعي

الله يسلمك :)

ما في بيت كويتي ما يسوونها هههههه

وهالمره انت راح تسويها مو الحجيه بعد حطيت كل شي من الألف إلى الياء مالك عذر ;q

{~المباركية~} يقول...

يمي يمي
يعطي الوصفه الوالده واهيه ماتقصر ;p

رورو الشخبوطه يقول...

ماشاءالله ..

تسلم ايدج يارب..

احنا نسويه بطريقة مختلفه شوي وهم شكلها غير انتي اكشخ ماشاءالله..

بالعافيه يارب..

DoDoq8 يقول...

تسلم ايدج :)

شاي الضحى يقول...

{~المباركية~}

ما يصير كله على الوالده ساعدوها شوي :))

شاي الضحى يقول...

رورو الشخبوطه


اي بعد عقب هالتجارب تطورت لووووووول

الله يسلمج ويعافيج حبيبتي :))

شاي الضحى يقول...

DoDoq8


الله يسلمج مشكوره :)

fatto يقول...

وااااااي عذبتوني كل مادش بوست حاطيلي اكله وكل اكله احلا من الثانيه لا بالله متنت برمضان لووووووووول

احب الفليك وايد :)

بالعافيه عليج حبيبتي .. اجربها وقولج النتيجه انشاءالله :)

شاي الضحى يقول...

fatto

شنسوي بعد الاكل ما يطلع الا برمضان هههههه

الله يعافيج مشكوره :)))

النور القريب يقول...

السلام عليكم ورحمة الله وبركاته

ماشاء الله أختي شاي الضحي
خوووش شيء شكرا ويعيطج العافية

بسالج هالصور انتي مصورتها؟

يعني مستواج قام يتحسن شوي شوي؟

لانه انا سبق اني شفت الكيكه البنيه
اللي حطيتي عليها شغلات لتزيينها
بلون الأزرق تتذكرين ؟؟

طلع شكلها يضحك لوووول

على فكره راح اسوي مقابلة مع المنشد
الكبير عادل الكندري في مدونتي الشخصية... قريبا
جهزت الأسئلة 30 سؤال وبطرشها له
على بريده الألكتروني وأن شاء الله يجاوب عليهم
نفس ماوعدني في رسالته لي على بريدي الألكتروني
جزاه الله خير على طيبته وعلى كرمه واتحاحة الفرصة
لي بأجراء معاه مقابلة خاصة في مدونتي الشخصية

بالتوفيق في مدونتج :)

أخوج: النور القريب

يابختي يقول...

الله تسلم ايدج...

شكلي باجربها عن جريب...

شاي الضحى يقول...

النور القريب

اهلين اخوي لووووووووووووول اي والله هذيك تفشل بس هذي بعد التطور اشوه طلع مني شي ههههههه

حياك الله اخوي :))


يابختي

جربيها وعطيني رايج :)))