الاثنين، 10 أغسطس، 2009

Kuwait Zoo

من عاداتنا و تقاليدنا انا و اختي انه نحط لنا في كل عطلة جدول رحلات لأماكن منوعة بالكويت ..


لكن هالصيف غير .. لا سوينا جدول ولا حطينا خطط .. خلينا يومياتنا عشوائية نوعا ما ..


بس الملل سيطر علينا شوي و قررنا نكسر روتينا برحلة الى حديقة الحيوان ..
خذينا رفيجاتنا و رحنا ..


ما اذكر متى اخر مرة رحت فيها الحديقة .. يمكن كان عمري 8 سنين اذا مو اصغر ..


فقلت اكييد عقب هالسنيين و هالغيبة الحديقة بتتغير و تتطور .. لكن الصدمة ان كل شي على حطت ايدنا!! ..


او يمكن تغير للأسوأ ..


فتعالو وياي اخذكم بجولة للحديقة ..



أولا المدخل ..




أدري يعطي انطباع ان الحديقة متعوب عليها

خلونا ندخل و نشوف ..


هذا النمر البلاستيكي كان في استقبالنا ..





اول مادخلنا ماعرفنا وين نروح في اي اتجاه .. فمشينا على الله لين وصلنا لمبنى الزواحف ..





زواحف بالكويت يعني اكيد راح يكونون حيايا و ضبان !..


هذا الضب و كانو حاطينله صحن سلطه .. ضب كويتي مدلع ..





و هذيله الفيران حاطينهم يوكلون فيهم الحيايا
حرااااااااااام



خلصنا من الزواحف و كملنا رحلة استكشافنا بالحديقة ..

بحيرة البجع .. قمة الرومانسية



و هذا مادري شنو بالضبط .. في شبه من الطاووس و في شبه من النعامة .. الظاهر فصيلة نادره!..


هالغزلان لحد يقرب صوبهم .. قمة الوحشية ..




ضاقت الاماكن بالحديقة و حطو الغزلان و الطواوويس بنفس القفص ..



عقبها يابو الزرافات و حطوهم مع الغزلان! .. شكلهم اجتماعيين و مايحبون الوحدة ..




فرس النهر مادري خرتيت البحر ..



و طبعا كويت زوو مشهورة بالشواذي .. أول مرة اشوف حديقة فيها شواذي هالكثر!..
هالقفص فيه 100 تعش شاذي مع بعض ..




مادري من وين متعلمين الطرارة .. كل واحد يمد ايده علشان نعطيه اكل ..




قفص الطيور .. يزاهم الله خير الأمانة العامة للأوقاف تصدقو فيه!!..





مقتطفات من الحديقة ..





الفيل تحفة .. شكلهم ماخذينه من سيرك .. كل ما احد قط عليه اكل يرفع نص جسمه على السور و ياخذ الاكل بخرطومه ..


الصراحة انا خفت ينحاش و يهجم علينا ..


ووخيتي وكلته بفك بو خواتم بس ما ياز له .. شم ريحته و قطه ..



والدبب صج دبب .. يموتون على البفك .. عطيناهم جيسين و ماكفاهم ..



يوم شافتنا هالشاذية بالقفص المجاور نوكل الدببه و مانوكلها تفلت علينا! -وانتو بكرامه-.. قلة ادب ..



اكثر شي يعور القلب بالحديقة ملك الغابة .. شكلة مومتسبح .. ضعيف .. هزيل .. يالله يتحرك .. و يتثاوب .. و شكلهم ما يمشطون شعره!! ..




و هذيلة حريمه .. يحليله متزوج ثنتين ..




و اخر شي خذينه جوله بالحديقة بالقطار بو ربع دينار و كانو حاطين اغاني مادري من وين يايبينها تعور الراس ..


و ختمنا طلعتنا ببرد مكينه من الروضه .. لذييييييييييييذ ..


ملاحظة: الي ناوي يروح حديقة الحيوان ياخذ معاه كمام لان الريحة مع الحر لا تطااااااااااق ..
شكر خاص لأم رفيجتي اللي انقذتنا و حطت لنا كمامات في جنطة بنتها ..


عندي كلام شكثر عن الحديقة .. ودي اتحلطم .. لكن اولا موضوعي انترس .. ثانيا لو بتكلم مافي احد بطور الحديقة و يرحم حال الحيوانات المساكين ..

خلوني ساكته احسن ..
بس تبون الصج .. على هالتحف الي شفناها .. استانسنا!

هناك 15 تعليقًا:

ميمة السبيت يقول...

* لووووووووووووووووووووووووووووووووووووووووووول

ابييه والله مت من الضحك ، احلى شي النمر البلاستيكي و سبحان الله حتى الحيوانات بالكويت متزوجين ثنتين مو كافي الرياييل الظاهر هذي عدوه منتشره بالجو الله يكافينا الشر ..

الله يهداكم من يروح هناك والله اقعد في بيتي و اجابل التلفزيون وايد احسن .. يالله آخر مره بنسامحج :)

bhr.qadsaweya يقول...

مشكورة على تغطية المكان p;

اهم شي الشاذي قليل الأدب
صج مو متعلم الأتيكيت .. خخخخخ

يعطيج العافية :)

*Being One يقول...

بنت عمي من كثر ما تموت على الحيوانات كل يوم ساحبتنا و موديتنا الحديقه حفظتها و حفظت خياسهاP:
عاد هالشاذي مشهور و الله كل يتقل حتى مره كان اكو صبيان قام يتحرشون فيه يننوووه تفل تفله الله لا يوريج لاعت جبدي ستغفر وصلت لي اخر الحديقه P:
صج انه اغلب الاشياء بالحديقه تلوع الجبد بس اخر شي تطلعين مستانسه و هذا الاهم ^^

رورو الشخبوطه يقول...

السلام..

هلا بزعفران تصدقين حسبالي جاي مثل الاسلوب تقريبا :)

اول كان مقرر علينا نروح رحلة لحديقة الحيوان او المتحف ايام الابتدائي الظاهر ماكان في غيرهم خخ..

والشواذي قطع كل يتفلون رفيجتي اهي وعايلتها واقفين يشوفونهم عادي جان يتفل ع راس ولدها وحاش دشداشة ابوه اللي شايله مو مال احد يعبرهم خخ..

وخوش رحله مشكوره..

شاي الضحى يقول...

لووووووووووووول والله الحيوانات كانوا ابداااااااااااااااع كل واحد في عالم ثااااني واحسهم دايخين من الحر ومبين مأثر عليهم بشكل كبيييير

اول مره اشوف حيوانات جذي تصرفاتهم غريبه الي يطر والي يتفل والي ينطح والزرافه وحركتها القذره وتاكل جرايد!!! لوووووووووووووول

اما حبيب قلبي "الفيل" كان ملح الحديقه طبعا انا جابلته مده واشوف حركاته يهبل يهبل بس صج شكلهم يايبينه من سيرك حده موهوب وعطيته بفك بس ماحبه :( يحب التفاح والخبز

واللي يضيق الخلق لما تشوفون الحيوانات شلون محكورين بهالقفص شدعوه جذي سوولهم نفس الدول الأوروبيه كل حيوان مسوين له مثل بيئته وتشوفهم من بعيد مو قفص محكورين فيه

شكرااااااا اختي العزيزه :***

زعفرانه يقول...

ميمة: اي والله محد يروح .. و الدليل الرخص.. لو الطلب وايد على الحديقة جان ماخلو دخلتها بنص دينار :P ..
و تقريبا ماكان في احد غيرنا و جم عايلة..

bhr.qadsaweya: الله يعافيج .. طلع هالشاذي سمعته راحت فيها بالديرة مشهوور بحركاته لول


*Being One: غرييبة في احد حافظ الحديقة .. خلاص المرة اليايه احذج ويانا مرشد سياحي بدال فرارتنا على ما ندور الحيوانات :P


رورو الشخبوطه: اي والله لعوا جبدنا الوزارة ايام الابتدائي .. يا حديقة الحيوان .. يا المتحف .. مرات يوم البحار و اذا بغيرون ودونا مصنع الخبز! ..

اشوة الجيل اليديد يودونهم المركز العلمي.. على الاقل مكان مسكر ما تكفخ راسهم الشمس ;)

زعفرانه يقول...

شاي الضحى: صااااجة تصرفاتهم غريبه .. اصلا الصور ماتعبر يبيلنا نعرض فيديووات ..

اي عاد انا سامعة انهم بسوون حق كل حيوان بيئة مناسبة له مثل الدول السنعة .. تدرين متى؟؟ بالاسبوع الي مافيه يمعة و لي حجة البقر!

{~المباركية~} يقول...

من صجج !!
يعني صارلج فتره مورايحة لها عبالج بتصير حلوه
اصلا هذي من السيء الى الاسوء
حديقه فاشله
حتى انتي قلتيها شواذينا ماعندهم اتكيت
مثل شواذي اوربا ;p
من كثر الحيوانات الي حاطنيها انا اقول لو حاطينهم كلهم بقفص واحد احسن لوول حدي حاقد

زعفرانه يقول...

المباركية: دام الاسد تعبان و مافي شدة ياكل يقدرون يحطون كل الحيوانات بنفس القفص :P .. خووش فكرة..

DoDoq8 يقول...

عاد انا سمعت انها تطورت وااايد

ودي اروح لها كل امر صوبها ومااروح

زعفرانه يقول...

DoDoq8: لوول لا تطور ولا شي.. هذا سيفوه و هذي خلاجينه يمكن بس عدلو المدخل!

غرغر يقول...

ياحظكم عندكم حديقة زينة .. حقتنا يبون يقفلونها عشان القرود 9ـارت تشرد منها وتناقز في سور البيوت اللي حول الحديقة ..
انا اتمنى انهم يهدونها ويبنون وحدة شوي بعيدة موب زين تكون هالحيوانات وسط المدينة ..
والله انا مرة احب اتفرج على الحيوانات من زمان مارحت حديقة كبيرة دايما نروح المحلات الـ9ـغيرة لأن الكبيرة زي ماقلت لكم تبي تقفل وريحتها تجيب حومة الكبد خخخ
حسيت اني قاعد اهذر على الفاضي
بس والله تغطية مميزة .. ع القوة يالخوات ^^

lazy dazy يقول...

ثانكس زعفرانه على التقرير الحلو واشوه نبهتينا على هلي يتفل واايد ياشطنه .. اما غرغر وسالفه الشواذي الي اتنط على البيوت هذي تحفه لو انا بيتي يمكن ايزور عقلي اتخيله ينط تالي الليل ويخرعني وانا نايمه يمممه

imac360 يقول...

loool nice post :P
o el shwathi t3lmaw el 6rara mn el m9arwa ele ysht'3lon mnak mo mn a7ad '3reb mn 3ashr el 8awm 40 yoom :P
aham shy enkom estanstaw wala 3ala etha btit7l6meen ma bt5l9en la2nich kel shway bys7bich mw'9o3

Queenalwazzan يقول...

لوووووووووووول
الأسد منثول المسكين عباله قطوو :P

و يعطييج العافيه ^_^