الأربعاء، 16 سبتمبر 2009

فضيحة برنامج على فكره!

منو يعرف برنامج "على فكره" الي يعرضونه على قناة سكوب عقب صلاة المغرب؟!

المهم اليوم واحنا قاعدين نتفطر كنا حاطين على سكوب (لان هالحزه كل القنوات دعايات فماكو الا هالقناة) فقاعدين نشوف هالبرنامج

وهالبرنامج عباره عن مقالب (كالعاده) يسوونها مع اشخاص عاديين في الجمعيات او الشارع او المحلات او المجمعات

فحلقة اليوم كانوا مصورينها في مركز للتصوير اسمه المثنى بحولي يم المهلب والمعهد التجاري

فكان الفنان الــــــمـــــــــــبــــــــــــــــــــــــــــدع الي فجأة طلع طلعه بسكوب لان ماكو الا اهوا "وليد الضاعن" مسوي نفسه صعيدي ويشتغل بالمركز وفي 2 مصريين يايين يصورون ورقه وعطوه الورقه وراحوا ولما ردوا قالهم ان الورقه بـ 7 دنانير!

طبعا اهما وقف قلبهم وصارت الهوشه والصكه ومن هالحجي السخيف الي تعرفونه

وانا ماكنت وايد مندمجه بالحلقة (كنت مندمجه بالعيش ومرقة الباميه ههههههه) فطول الوقت حاطين على المصريين من ورا ولما حطوه على ويووهم جان انــــصــــــــدم @@



ويا للمفاجأة


طلعوا هذيله المصريين اهما نفسهم الي يشتغلون بالمحل لاني اعرفهم عدل وجم مره رايحتلهم !!!


يعني طلعت السالفه كلها فبركه في فبركه

قبل كنت اقول بس فبركه مع الممثلين والمشهورين مو مع الناس العاديه ... بس الحين طلعت السالفه كلها عطني فلوس وصور وضحكهم (قصدي واضحك عليهم)

والي ضحكني انه المصريين الي يشتغلون لما قالهم انه كاميرا خفيه سووا روحهم منصدمين وواحد منهم نقز بطريقه غبيه يعني اشكره يدري

والله مسخره قاصين علينا

وفكره البرنامج قديمه ومكرره وزهقناااااااااا بس لي متى مقالب ما تعرفون تغيروون؟؟

والمشكله ليلحين ما يدرون ان الناس مو نفس قبل صاروا فاهميين وواعييييين ويعرفون انتوا شنو قاعدين تسوون

عــــــــــــيـــــــــــــــب عــــــــــــيـــــــــــــــب عــــــــــــيـــــــــــــــب علييييييييييييكم
كافي استخفاف بعقولنا
(وما خفي كان أعظم)

شكلهم كل الحلقات جذي

حزت الفطور الواحد يشتهي يشوف شي يستانس كله جذب x جذب

خلصنا من الصيرفي يالنه الضاعن


اخر شي احب القوله لـوليد الضاعن














على فـــكــــره صــــدنـــــــاك

هناك 22 تعليقًا:

ShaymoOona يقول...

حده يستخفون بعقولنا..البرامج كلها الي على سكوب امبين كلها جذب بجذب
عيدج مبارك مقدما :)

نمووول يقول...

برامج سخيفة حتى كاميرات خفية نفس الناس ما يعرفون يسوون شحلات الكاميرا الخفية مالت فرنسا ولا بريطانيا والفصلة مالت اليابان

يسوون بالناس مقالب ويضحكونهم مو عندنا كله طق وهواش وسب ..

زين فضحتيهم الحين نشري الخبر ولو ان الشهر خلص بس عشان يتعلمون شلون يقصون على الناس

ما شاء الله عليج ذاكرتج 200% عيل عارفتهم هااا ..

شكراً ..

شاي الضحى يقول...

ShaymoOona

انا شفت هذا قلت يمكن صج لان ناس عاديين بس لما شفت حلقة اليوم انصدمت :(


ايامج سعيده مشكوره :))

شاي الضحى يقول...

نمووول

اي والله صدقت مالت اليابان عجيبه تييهم افكار مادري من وين صج يخلونك تضحك حتى اهما يضحكون على نفسهم

المشكله ان العرب عندهم كاميرا خفيه يعني هواش وسب وطق

والي يضحك برنامج عبدالله السلمان على فلاش دقة قلب بالله عليك هذي كاميرا خفيه لا وعلى الفطور بعد لو وحده او واحد فيه شي وطاح عليكم من الخرعه ومات شتسوى عليكم؟! او يمكن مفبرك كالعاده

عاد اخر مره رحت هالمركز مال التصوير قبل سنه بس اذكرهم عدل لاني رحت لهم جم مره وايام ورا بعض


عفواً :)

رورو الشخبوطه يقول...

هلا شاي..

انا ابوي شافه بعزا قبل اسبوعين جان يقوله ليكون كاميرا خفيه ..

قلت يبا خوش توقيت @@

يمكن لانه العرب اعصاب وغشمرتهم دفاشه اقصد اللي بالكاميرا الخفيه..

ومشكوره خيتو..

شاي الضحى يقول...

رورو

ابوج بدع بالعزه كامره خفيه

تصدقين يمكن بعد جم سنه يسوونها ما استبعد بس يكونون مفبركين السالفه ومتفقين مع الميت !!! كل شي جايز

اي والله غشمرتنا بايخه لازم نطلع عضلاتنا جدام الكل بالصج وبالغشمره


حياج حبيبتي :)))

وحـدهـ من البـشر يقول...

اي والله صاجه خيتوو شااي ماكو غير وليد اللي بسكوب

و ع الكاميرات الخفيه كلهم اشكره مين اتفاق



عقبال ما يسوون شي مثل الاوادم :P


مشكووره خيتوو

شاي الضحى يقول...

وحـدهـ من البـشر

الباجي كلهم هجوا نطري عليه ينشهر اكثر ويهج نفسهم وتطلع لنا فجر تسوي كاميرا خفيه مع اخوها وولده وفريجهم


حياج الله :)

طماشة يقول...

اي عرفته البرنامج، واشوف اعلاناته وايد وما أشوف الحلقة لأن ادري انه فبركة من اللقطات اللي يحطونها اشكره، عندج هذا وصادوه 6 الفاشل اللي ماشفت منه ولا حلقة.. طبعًا لاتنسين شطار اكاديمي والاسنصيد وحليلهم بينهم كمان وكمان كلهم نفس الطقة فبركة في فبركة الله يرحم الكاميرا الخفية ايام أول..

تسلمين جاي ع الموضوع

طماشة

شاي الضحى يقول...

طماشة

تدرين شنو المشكله؟
انهم يدرون ان الناس تدري وفاضحينهم بالايميلات والمنتديات واليوتيوب وكل مكان وهم ماكو فايده كل سنه قاعدين يكثرون من برامجهم التافهه الي مالها هدف


السنه اليايه يمكن التلفزيون من الصبح لي بليل كاميرا خفيه (الي مسمينها خفيه واهيا مو خفيه .. علينا طبعا)


الله يسلمك :)


حياك الله اخوي :>

اجتماعي يقول...

ما تلاحظين إن البرامج صارت :

1- تقليد شخصيات
2- كاميرا خفية
3- مسلسلات هابطة

ملينا .. صج ملينا

والعرب كلهم ما يعرفون يسوون كاميرا خفية ..
كلهم أشكره يبينون إنه تمثيل ..

من أيام زكية زكريا ..
مرورا بصادوه ..
وإنتهاء بالاصنصيد والبرنامج اللي تكلمتي عنه بأفشل قناة بالتاريخ .. من بعد فلاش

شاي الضحى يقول...

اجتماعي

وازيد عليهم نقطه رابعه كل قناة قامت تسوي لها كاريكاتير خاص فيها وتتطنز على النواب وتتكلم عن السياسه

زكيه زكريا عندي وايد احسن من الي قاعدين نشوفه الحين


وقناة فلاش مادري ليش ليلحين تشتغل لا واليوم السلمان مسوي برنامج توعيه عن مرض انفلونزا الخنازير حسافه كنت ابي اشوف شنو قاعد يقول عشان اضحك لكن للأسف القناة تقطع وايد الارسال مالها ضعيف


مشكور على التعليق :)

{~المباركية~} يقول...

شايفنا حاطين فوق راسنا دهن
اغير كاميرة خفيفه اغير كاميرة خفيه اغير كاميرة خفيفه اغير كاميرة خفيه اغير كاميرة خفيفه اغير كاميرة خفيه
لي متى ؟؟

شاي الضحى يقول...

{~المباركية~}

حتى الي حاطين براسهم دهن قاموا يفهمون!

وهذا اهوا السؤال لي مــــــتــــــى؟!


مشكور اخوي :>

daloo3a يقول...

خخخخخخخخخخخخخخخخخ

هالبرامج صارت ممله خخخخخخخخخخخخ


يسلموو

Hashimoto يقول...

لول

ليش تبطلون التلفزيون برمضان .. ماكو شي يسوى

seven يقول...

واحد من ربعي " مخــرج " يقول الحمد لله إن الأصنصيد إنفضح عشـان الناس تصدقني لما كنت أقول لهم إن كل الكامرات الخفيه إلي بالكويت " تمثيل " بما فيـهم صادوه " 1 "

iCoNzZz يقول...

الحين ماكو برنامج كاميرا خفية إلا يكون نصب وجذب
والسبب انه ماكو إبداع ماكو تجديد وقناة تقلد الثانية والخ ..
آنا أقول الشرهه على اللي يطالع هالقنوات ويزيد
من الرانك اللي يحسب على القناة ويزيد من سعرها ..

شاي الضحى يقول...

daloo3a

وايد ممله :))

شاي الضحى يقول...

Hashimoto

ماعرف اقعد ما ابطل التلفزيون خاصه وقت الاكل لازم اشوف شي واكل هههههه


حياك :)

شاي الضحى يقول...

seven

اي والله زين انفضح الاصنصيد

بس معقوله صادوه 1 تمثييييييل؟!!!!

لان الي كانوا فيه فنانين كبار مثل عبدالحسين وحياة الفهد معقوله يرضون يمثلون في مثل هذي البرامج؟


وسلملم :>

شاي الضحى يقول...

iCoNzZz

ماكو الا احنا نعطيهم افكار برامج يديده هههه

واذا شفتهم مسوين برنامج وتعبانين عليه وحالتهم حاله اخر شي تكتشف ان البرنامج نفس النسخه الانجليزيه يعني هم تقليد ماكو شي من عندهم

والناس شسوون اذا كل قناة فيها كاميرا خفيه وهالسوالف وشطالعوون بالله


حياج :>