الأحد، 11 أكتوبر 2009

عيد ميلادي بالتفصيل :)

احب اقول حق كل الي هنوني بعيد ميلادي سواء كانوا بالبلوق او غيره مشكورين وايد وايد وايد واستانست وايد كافي انكم ذكرتوني

الحين بقولكم شصار معاي بيوم عيد ميلادي

...

قبل لا تصير الساعه 12 بثلث ساعه دقت رفيجتي جان تقولي انا بمسك الخط عشان محد يدق ويقولج كل عام وانتي بخير قبلي ههههه المهم قعدنه نسولف وننطر الساعه 12 ... اول ما صارت 12 جان امي تغنيلي وتصفق لوووووووووول ورفيجتي عصبت صارلها ثلث ساعه تنطر اخر شي امي اسبقتها بعدها قامت تيبب (شكلها ضيعت ترا عيد ميلاد مو عرس هههههه) وحطت لي اغاني وسوت لويه ...

لما سكرته منها اشوف مسجات من رفيجاتي معصبين ليش خطي مشغول كل وحده تبي تكون اهيا قبل (يا بختي هههههه) ... خلصت لوية التليفون ييت حق لويه الـ MSN سوولي حفله فيه وغير الايميلات ما خلصت من هاللويه الا الساعه 3 ونص الفير اخر وحده دقت ...

بعدها كلمت رفيجتي الي اول وحده دقت قلت لها تعالي باجر انا بسوي كيكه جان تقولي لا ما اقدر عندي شغل قلت لها راح ازعل جان تقولي انشالله يوم الأحد ايي وخشيلي منها قلت لها ماكو راح اكلها كلها وبعدها قالت صج ما اقدر ايي وقلت لها كيفج وراحت تنام وانا قعدت مجابله كتاب امي كانت شاريته لي عن الكيك وفيه طرق وايد وقعدت لي الساعه 5 الفير وانا ادور اي كيكه اسوي وكنت ادور وحده سهله وبسرعه تخلص عشان يمدينه ناكلها العصر ...

بعدها نمت ساعتين وحطيت المنبه وقعدت من الصبح وكنت حدي دااااايخه ابي انام وابي اروح الجمعيه اشتري مقادير الكيكه المهم بالغصب قعدت وبطلت الكتاب جان تقولي امي اي وحده بتسوين قلت لها هذي جان تقولي اختي الكبيره لا مابيها وكل ما اختار وحده مو عاجبتهم !!!!

جان اقط عليهم الكتاب وقلت لهم اختاروا امي طلعت لي وحده سهله وقالت هذي جان اقولها اوكي وكتبت المقادير واختي قالت ماتبي تيي دايخه وبتنام ورحت مع امي كارفور وشريت المقادير بس في جم شغله ما لقيتهم جان تقولي امشي نروح مركز سلطان ورحنا جان اشتري هذا الكبوس



وشرينه كل اغراض الكيكه جان تقولي امي انزين امشي نروح مركز سلطان بمكان ثاني تبي تشوف شي لما شفت الساعه ولا الساعه 12 !!! قلت لها لااااا ما يمدي متى اسوي الكيكه ومتى تخلص؟!!! قلت لها مو ضروري باجر اوديج ورديت البيت ...

قبل ما ادش البيت وقفت عند الباب ولبست الكبوس عشان بحر اختي هههه اول ما دشيت جان انصدم @@ !!!!

ولا اختي مزينه البيت ويايبه بالونااااااااااااااااااااااااات







ويايبه اشياء سوالف العيد ميلاد وشموع ويايبتلي ماشات يشبون ليت لووووووول


قعدت العب بالبالونات واصور وياهم جان ايبولي هذا الفيل



وقالولي سامحينه بس هذا الي قدرنه نشتريه !!

طبعا انا كنت مستانسه فيه لاني احب الفياله

وعقبها رحت اصلي الظهر ولما رديت ما لقيت ولا بالونه !!!!!!!!!!!!!

جان اقولهم وينهم قالولي انه خلص العيد ميلاد والرياييل يوو خذوهم !!!!!!!

جان اقعد احوس بالبيت وافج دار دار وقاعده اناديهم بلووونااااتي وينكم؟

اخر شي لقيتهم يم المطبخ .. اختي كانت خاشتهم عني ... جان اخذهم واقولها:

"يااااا ساااااااارقة البااااالووووناااات"


رديتهم الصاله ولا اشوف علبه على الطاوله




ولا يايبيلي هديه وقصوا علي قالولي ما يبنه شي غير الفيل

بعدها تغدينه ولما خلصت قعدت اقره الكتاب جان اقول حق امي انا انقلج وانتي كتبي المقادير عشان نزهبهم واصورهم واحطهم لكم بالبلوق ... وقلت لها اول خطوه لازم نبطل الفرن ... وقالت لي اوكي انتي روحي بدلي هدومج وانا ازهب لج كل شي بالصاله قلت لها اوكي ...


بدلت وخلصت ولما رديت الصاله جان تقولي امي مقاديرج على الطاوله ...


جان اشوف ...



قصوا علي وما نمت لي الفير وانا افكر شنو اسوي كيكه وقاعده من الصبح وافر من مكان لي مكان عشان اييب المقادير اخر شي طلعوا شاريلي كيكه قلت لهم ليييييييييييييش ما خليتوني انام وحطينه فيها الشموع وشغلت اغاني حق العيد ميلاد وقعدت اصفر وانا لابسه الكبوس والماسك واحتفل بروحي





شوي ولا جرس الباب رحت ابطل الباب ولا رفيجتي الي قالت عندها شغل وما تقدر تيي ... وقعدنا نحتفل ونصور مع الكيكه وطبعا لا تشوفون اليباب لووووووول ماقصروا والله وقعدت معاي من الساعه 4 لي 6




بعدها راحت وقعدت جابلت النت شوي بعد 5 دقايق دقت رفيجتي الثانيه قالت لي بمرج قلت لها اوكي ... عقب 10 دقايق جان تدق مره ثانيه قالت لي بتطلعين؟ قلت لها لا قاعده جان تقولي عيل يالله بدلي بمرج نروح نتمسى ونشرب عصير ..

وطلعنا رحنا شربنا عصير بالسالميه



وكنت ماخذه معاي هذوله



وطول الوقت اصفر ... وكنت قاعده اسمع اغنيتي المفضله "تذكرني" عبدالله الرويشد



جان تدق رفيجتي الي كانت عندي قبلها جان اتنيحس واحطلها اغنيتها المفضله واحرها

"للعاشقين عيون"

مثل اصبعين بكف نــــبــــعــــد



ونـــتـــلاقى



اقولها حرررررره انا طالعه اتمشى جان تقولي خياااااااااااانه باجر بمرج من الصبح ونروح نلعب Bowling قلت لها ما اقول لا ... وقلت حق رفيجتي الي معاي بالسياره وقالت اوكي ...

بعدها رديت البيت وقعدنه بالسياره نصور قبل لا انزل جان تدق اختي قالت لي وينج؟ قلت لها انا عند البيت جان تقولي عيل تعالي معانه بنروح دايسو السالميه مع امي ..

ونزلت من سيارة رفيجتي وخذيت معاي الهديه وركبت سيارة اختي من بيتنه لي السالميه نمت بالسياره من كثر اللويه ...

واول ما وصلنه قعدوني ونزلت ودشينه دايسو جان اشوف هذا الكوب عجبني وقالت اختي يالله اليوم عيد ميلادج اشتريه لج




جان اشوف هذا ...



جان اخذه حق صبارتي الحلوه

بعدها دشينه كليرز ولقيت تراجي على فيل واختي شرتهم لي




وردينه البيت على الساعه 10:30 وكنت حدي دايخه ...

بس صامده ههههه جابلت الهدايه والبلونات وقعدت احوس فيهم وكل شوي اصورهم






ولما صارت الساعه 2 جان اخذ كل بلوناتي ووديتهم داري خفت اقعد من النوم واختي تبوقهم
ويليتني ما خذيتهم !!!!!



اذوووووووووووني ما خلوني انام .... كل ما غمضت عيوني تيي وحده تتمشى فوق راسي والي قاعده يمي والي خيطها ايي فوق عيني وانا بس اتهاوش معاهم طول الليل لما فشوا وماتوا

وما مداني نمت شوي دزت رفيجتي مسج وقالت لي متى بتروحون؟ واتفقنه عقب صلاة الظهر وقمت غسلت وشربت عصير وبدلت وقعدت انطرهم وبعدها وصل "باص المدرسه العجيب" (رفيجاتي ههههه) وانطلقنه

وانشالله البوست الياي احط لكم شنو سوينه :)


وهذي صور الهدايا


وهذي الكاميرا من امي واختي


وانا قاعده اكتب البوست توه يت رفيجتي الثالثه ويابتلي هديه :$




اخر شي بقوله مشكورريييييييييين واااااااااااايد (امي + اختي + رفيجاتي ) والله صج استانست وياكم وكان يومي مليء بالمفاجآت


I Miss U Za3farana :(


وكنت اتمنى تكونين معاي

هناك 24 تعليقًا:

رورو الشخبوطه يقول...

السلام..

ماشاءالله وناسه ..

شوقتيني ع يوم ميلادي المجيد :)

كل عام وانتي بخير مره 3 ..

وان شاءالله زوزو معاج بميلادج الياي :)

سكتي كل بصوب والكيكة بصوب من شفت الاسم قلت وي طلعت سميتي خخ بس لما دققت طلع لا..

وضحكتني سارقة البلونات خخ..

وبالعافيه يارب الكيك والهدايا تتهنين فيهم يارب..

شاي الضحى يقول...

رورو

اهلين ... وانتي بخير مره 3 ههههههه :)))

انشالله بس هم ما اتوقع لوووول :))

والله يعافيج ... مشكوره :)

غير معرف يقول...

كل عام و أنت بخير و صحة و سلامة إن شاءالله .. عيل أنا وراج 19 -10 :$ بس وقته مو شي ليش يوم الاثنين عاد :( عندي بحوث و تقارير قطيعه .
الكيكة ماشاءالله حلوة و البالونات امبيه ضحكتيني ، خوفج وحدة تنبط و انتِ نايمة و تصير فيج سكتة قلبية لوووووول.
و كل عام و انت بخير مؤخرا ’ آسفة و الله ما دريت :)

شاي الضحى يقول...

حنان

وانتي بخير وصحه وسلامه :)

وناسه انتي بعد بشهر 10 :)

سوي بحوثج وتقاريرج مبجر لا تكودينهم والله يوفقج

والكيكه وايد استانست عليها وانا مع ويهي رايحه الجمعيه ومشريه وحالتي حاله اخر شي يايبيلي وحده ههههههه

الحمدلله انه ما انبطوا عدت على خير ;qqqq

وانتي بخير حبيبتي مشكوره :)

غير معرف يقول...

صج صج كيفت على البوست، الابتسامة لحد ألحين ما فارقتني وقريته مرتين. جاي انتي عليج سوالف انما ايه :D أول شي كل عام وانتي بألفففف خير وتستاهلين هالمفاجآت السادوحية واللي تنطبخ من وراج.. خخخ أثاري امج مجهزة الكيكة وكل شي بس حبت تمشي التمثيلية وتروح معاج كارفور ومركز سلطان علشان لا تحسن. وعليج بألف عافية الهدايا. مت من الضحك على سالفة البلونات لما تتهاوشين معاهم بالليل. لول وحبيت إنج تحبين الفيلة. عاد الفيلة يونسون خاصة الصغار والمدربحين خخخ.. قاعد أتخيلج انتي بسيارة رفجيتج ومعاج الصفارة وكل شوي تصفرين لوووووووووووووووووووووووول جاي بدعتي حدج :D
ضحكت ضححححححححك.. الله يدوم المحبة من صداقتج لج، الله وناسة لما احد يقعد وينطر يوم ميلاد الثاني بالدقيقة والثواني ويتهاوشون على منو يهني الأول. جان زين يصيرلي جذي ودي اعيش هالموقف.. جد تستهالين كل خير.. ومادري ليش احسه أحلى عيد ميلاد مر عليج من فترة طويلة.. كل 22 سنة وانتي بألف خير.. والله يخلي لج زعفرانة وحتى لو كانت مو موجودة تأكدي انها استانست لج من بعيد..

شاي الضحى يقول...

طماشة

دووووووم انشالله الابتسامه وعساها ما تفارقك :)))

وعلي سوالف من زمان مو توه هههههه ... وانت بالف خير وانت تستاهل كل خير :)

شفت شلون ما خلتني انام ... واهيا سوت عشان عشان تخليني اطلع من البيت واختي قالت انها دايخه قصت علي عشان تروح تييب الكيكه والزينه والبلونات :)

والله يعافيك :) والبلونات اذوووني ما نمت منها ولما قعدت الصبح خذيت باندول ... والفيله حبي الاول والاخير هههههه وكل شي بداري على فيل ورفيجاتي كل فيل بالكويت يابوه لي ههههه

ورفيجتي مسكينه بالسياره اهيا تسوق وانا اصفر واهيا تنقز لانه الصفاره مزعجه اذيتها ما خليتها تسوق عدل غير هذا ماسكه الكاميره واصور كل دقيقه

قبل يوم عيد ميلادي شلت الـ Waiting عشان مو كل وحده تدق ويطلع خط ثاني وتقول انا اول من سبق لبق ههههههه

اي والله احلى عيد ميلاد من فتره لانه صارله فتره يكون برمضان وقبل سنتين كنت مسافره فكان عيدميلادي مو بالكويت وباجي السنوات يصادف وقت دوام محد فاضيلي هالمره رفيجاتي كلهم بطاليه نفس حلتي هههههه

آمييين ويخليك حق اهلك :)

وتوني تذكرت موقف عبيط رفيجتي لما كانت عندي بالبيت كنه لابسين كبابيس ونصفر ومشغلين اغنيه هدى حسين وعافسين البيت ولما يت بتطلع وصلتها بره ولا استوعب انها طالعه بالكبوس لوووووووووووووووووووول جان اناديها حلاتها طالعه فيه لي بيتهم ههههههههههههههه

سلاااماااااااات ونورت :))))

وحـدهـ من البـشر يقول...

انــااااسهـ

حبيـبتي دوم الوناااسه

واخلى شي السبرايزات

وانا اقرى وامج مصره تروحون مركز السلطان قلت اكيد بيفاجؤؤنها بشي

حبيــبتي كل عام وانتي بخير و عقبال الـ 99 :P

وان شاء الله دووم مستانسه


والله يخليلج امج واختج ورفيجاتج

موفقهـ

DoDoq8 يقول...

kl 3am p entay b5er

:)

o el7mdlah ench estanste

bent el deera يقول...

الله وناااااااسه

كل عام وانتي بالف خير وعقبال الالف سنه تقضينها مع اهلج وحبايبج وهالفرحه تكرر معاج

وناسه
حسيت اني معاكم

كل عام وانتي بخير مره ثانيه والعمر كله يا رب :**

شاي الضحى يقول...

وحده من البشر

ليش انتي حسيتي انهم بفاجؤوني وانا ما حسيت؟ يمكن لاني كنت وايد مهتمه بموضوع الكيكه هههههه

مشكوره وما قصرتي ... آمين يارب العالمين :)

اجمعين ... مشكوره حبيبتي :)

شاي الضحى يقول...

دودو

وانتي بخير ... اي والله استانست وايد :)


مشكوره :>

شاي الضحى يقول...

بنت الديره

وانتي بخير وصحه وسلامه ... آميين :)

وانشالله ايامج تكون كلها وناسه وفرح :)

مشكوره وما قصرتي :>

Ra-1 يقول...

وناسة D:
Happy birthday :)

الكيكة عجيبة! وشكلها لذيذة
وتدري شنو شي ثاني عجبني؟
الطوفة الكحلية
p:

شاي الضحى يقول...

Ra-1

Thank u ... والكيكه لذيييذه خاصه لما حطينه فيها آيس كريم :)

مشكوره وحياج الله :))

عثماني يقول...

كل عام و انتي بخير اخيتي

خوش عيد ميلاد

:)

العمر كله اخيتي

شاي الضحى يقول...

عثماني

وانت بخير وصحه وسلامه :)))


تسلم ... ومشكور وما تقصر :)

bokeh of magic * يقول...

اول شي كل عام و انتي بالف خيير
و انشالله طول ايامج فرحة ,
صج كان يومج كله لوية بس و الله وناسه :)

شاي الضحى يقول...

Being One

وانتي بخير وصحه وسلامه :)

آميين ... اي والله احلى شي هههه ه

مشكوره :>

نمووول يقول...

يااااا سلااااااام مضبطينج والله
هذا دليل على انهم ما يحبونج وبس يعشقووووونج حتى النخاع
حلوه حتى النخاع ؟ ههههه
الله يوفقج ان شاء الله ويسهل لج دربج
وناااااااسه من زمان مو عايش هذا الجووو
الله يعطيهم العافيه والله يخليكم لبعض ويحفظكم من كل شر ومكروه

تمنياتي لج بالتوفيق في حياتج العلميه والعمليه ..
اي صح عبالج نسيت ؟
وين الكيكه هاااااااا ؟

دمتي بخير
وكل ام وانتي سعيده

شاي الضحى يقول...

نمووول

وايد حلوه حتى النخاع ههههههه

آميييين أجمعين انشالله ... لاحظت الشباب مو وايد عندهم خبه نفس البنات خاصه بسوالف العيد ميلاد

الله يعافيك ... آميين تسلم :)

وخشيتلك شويه من الكيكه ما نسيتك ههههه

مشكور وما قصرت اخوي :)

Hope يقول...

واي يا حلوج و انتي الـ B-Day Girl
وناسه .. احلى شي المفاجآات
عليج بألف عافيه يا رب
الله يخليلج اهلج و رفيجاتج
و عئبال ما تحتفلين بعيد ميلادج الـ100 و اهما حوالينج

شاي الضحى يقول...

Hope

الله يعافيج ويخليج :)))

آمييين ... مشكوووووووووره :)

ميمة السبيت يقول...

** كل عام وانتي بخير سوري توني اشوف البوست حده وناسه خووووش جووو سوووولج الله يعطيهم العافية و انشالله اتظلون مع بعض العمر كله يا رب :)

- الكيكة شكلها وايد حلووو ممكن نعرف من وين عيد ميلاد بنتي قريب و قاعده ادور لها شي مميز .. " اشوه مو انتي اللي سويتي الكيكة جان شفكهم من تخلبيصج لوووووووووووووووووووول " لا لا والله اضحك معاج

شاي الضحى يقول...

ميمة السبيت

وانتي بخير وصحه وسلامه :))

آميين .. مشكوره :)

والكيكه من شوقر اند سبايس الي بالشويخ ق 2

حياج الله حبيبتي :)