الخميس، 24 ديسمبر 2009

P.F. CHANG's

خون ين ني فن غون P.F.Chang's

قصدي اهلا وسهلا فيكم في مطعم P.F.Chang's

P.F يعني Paul Fleming

واهوا مطعم صيني وأول فرع له في الولايات المتحدة

والي بالكويت يعتبر اكبر فرع


رحنه على الساعه 4:30 العصر بأيام الأسبوع

قلنه اكيد ماكو احد يمدينه نتغدى ونتسوق وبعدها ندش السينما

لما وصلنه عند المطعم ولا حده زحمممممممممممه

وطبعا ما عندهم حجز بالتليفون الا اذا كنتوا 8 اشخاص او اكثر

قلنا لهم نبي طاوله حق 3

قالوا نطروا ساعه ونص!!!!

شفنه الساعه ولا باقي وايد على الفلم فقلنه خلاص نتسوق على ما ايي دورنه

عقب ما تسوقنه دقوا علينه ورحنه توقعت المطعم راح يكون هادي

لان الساعه صارت 5 وشي بس كان ليلحين زحمه

ما صدقت الناس قاموا جان اصور المكان ههههههههه


المنيو


هذي الصلصات الي موجوده على الطاوله

والصحن الي بالنص الي تشتغل سوت لنه خلطه حلوه


بيبسي


Dumplings Chicken

&

Crab Wontons


Cashew Chicken


Mongolian Beef


Vegetables Noodles


Shrimp Walnuts


Brown Rice


White Rice


الأكل كان عادي في مطاعم صينيه وايد احلى منه

والي ما عجبني بالمطعم ان كبير على غير سنع

يعني مكودين الطاولات بدون ترتيب

كرسيكم بظهر الكرسي الي وراكم ما تقدرون حتى تتحركون وتاخذون راحتكم

وغير هذا الي يدخنون ... المطعم من داخل مقموت وانتوا تدخنون؟!

مادري اذا فيه مكان مخصص للي ما يدخنون بس الي شفته ان بكل المطعم قاعدين يدخنون

والخدمه كانت بطيئة جدا

قلت يمكن من الزحمه

بس لما سألت رفيجاتي راحوا بوقت ماكان زحمه نفس الشي كلهم ذموا خدمتهم


والحساب كله طلع بـ 6 دنانير فقط لا غير :q

والي يبي يعرف ليش يدخل اهني

دزي دجيان

هناك 30 تعليقًا:

رورو الشخبوطه يقول...

السلام ..

بالعافيه يارب..

لما قريت السعر قلت زين والله رخيصه خخ عقب تذكرت الهديه :)

ومشكوره..

غير معرف يقول...

عليكم بالعافية .. اي حتى انا انصدمت وايد رخيص خخخ
بس عاد ما اطيق الاكل الصيني استغفر الله يسد النفس

شاي الضحى يقول...

رورو

الله يعافيج

ههههههههه اقول حق امي جنه شارين وجبات من ماكدونالدز :q


حياج الله :>

شاي الضحى يقول...

حنان

الله يعافيج

ههههههه من غير شي زحمه لو صج السعر جذي جان الناس ما تطلع منه :q

انا احب الاكل الايطالي بعدها الهندي وبعدهم الصيني :)

مشكوره :>

غير معرف يقول...

عليكم بالعافيه

مع انه تصويرج حلو بس الأطباق شكلها مو الي يشوقك تروحله

تبين الرصاحه توني راد من الأفنيوز مع واحد من الربع

دخلت المطعم وعند الباب أخنا فوق تحت

الاس لازقه ببعض لو تسولف سالفه الي يمك يسمعك

واستقبالهم عند الباب أي شي ماكو لا اهلا لا سهلا لاتفضلوا

حولنا على ماكي اول مره أروحله طلع مينون وبسويله ريفيو ان شاء الله


يعطيج العافيه

DoDoq8 يقول...

No way 6 KD in avnuse restrants looool

وزين انج قلتي عشااان مانفكر نروح له

Made n Q8 يقول...

علييكم بالعافية

قاعده اقول ياربي معقوله بس 6 دنانير بعدين عرفت السالفه :d

شاي الضحى يقول...

ابوفلان

الله يعافيك

اي الاكل كان عادي جدا على هالزحمه توقعته احلى

تارسين المطعم طاولات وصاير حده ضيج تتضايق لما تقعد انا ما خذيت راحتي الا لما قاموا الي وراي كل سوالفهم عندي

عدل كلامك ماكو استقبال سنع وخدمه سيئه جدا

وان شاءالله ناطره بوستك عن ماكي وعليك بالعافيه :)

الله يعافيك اخوي

مشكور :>

شاي الضحى يقول...

دودو

ههههههه امبله احنا دفعنه بس 6 :q

لا عادي روحي يمكن يعجبج :)


شكرا

شاي الضحى يقول...

Made

الله يعافيج

هههههههه اي معقوووووله :q


مشكوره :>

Engineer A يقول...

عليج بالعافية .. اول شي انصدمت من السعر لأن ماكله فيه بامريكا ومو هذي اسعارهم وتالي تذكرت البوست اللي قبل لوول


اتصدقين الاطباق اللي طلبتوها شكلها مو نفس اللي بالمنيو اللي بامريكا؟؟ مادري انا اذكر طلبنا اطباق غريبه لوول كلينا بط عندهم عجيب ودياي بالخس و ربيان بس غير شوي ..


بس عاد والله في بنات راحوا له امدحوه خلي الازدحام والخدمة اهم شي شلون اكلهم؟؟ حلو والا ما يسوى؟؟ :)

ثلجيّة القلب والأقراط .، يقول...

أشوا انج قلتي عشان ما نروحله عاد انا اصلا ماحب المطاعم الصينيه و اليابانيه و مادري شنو :×
عموماً بالعافيه لوول
بإنتظار مطعم آخر .. P:

وعلى فكره : تصويرج بيرفكت D=

ميمة السبيت يقول...

** صباح الخير :

- اشوه انا مارحنه كان ودي اجربه يوم انه موحلو

خلينا على نينو وايد احسن

شاي الضحى يقول...

Engineer

الله يعافيج ... لوووول

اي عندهم بط بس احنا ما ناكله ... وهم بعد دياي بالخس بس ما طلبناه وفي ربيان جنه اسمه ديناميت يصير بقلاص صح؟ يقولون حلو ... احنا الي طلبناه حلو بس لما برد صار طعمه مو حلو

يمكن عجبهم الناس أذواق :) انا اشوف اكلهم عادي مو لذيذ في مطاعم جربتها احلى بوايد والذ ... بس المكان والخدمه اهم شي مو حلو تقعدين تاكلين وانتي متضايقه

مشكوره :>

شاي الضحى يقول...

ثلجية

اذا ما تحبين الصيني لا تروحين جربي مطاعم ثانيه

الله يعافيج

عاد انا كلش مو خبره بالتصوير بس اجك جك والي يطلع معاي هههههه :q

حياج الله حبيبتي :>

شاي الضحى يقول...

ميمة

مساء النور ههههه

في ناس وايد عجبهم ... انتي جربيه يمكن ذوقج غير عن ذوقي :>

مشكوره :>

الوتيــــــــــن يقول...

صباح النوير

شلونج يالغالية؟ هني وعافية

عاد ماحب الوانتن .. شلون كلتيه؟ عاد زين قلتيلنا علشان مانروح .. مع ان السعر زين بس ماتسوى

يسلمو حبي عالتقرير الطيب

حبي

شاي الضحى يقول...

الوتين

اهلين

انا بخير الله يسلمج ... الله يعافيج

مااكل كراب :) والي يحبونه بياكلونه بعد مافيها شلون

شوفي انا كتبت رايي بالمطعم بس في ناس عجبهم فمادري يمكن يعجبج

الله يسلمج

مشكوره :>

صمت البوح يقول...

بالعــــــافية عليكم ,,,
يمي يمي شهيتينا

شيه شيه يعني شووكرن بالصيني
شووكرن ع البوست اللذييذ

سعد المحطب يقول...

أحسن ما فيه سعره : d

ودام المكان فيه تدخين ..
فـ ابعد عن الشر وغنيله : )

نفتك من مدخنين الكلية ..
هالمرة نروح لمدخنين المطعم ..

خلينا على برجر كنج ..
وناخذه take away وايد أحسن

شاي الضحى يقول...

صمت البوح

الله يعافيج

بو كهه تشي (يعني عفوا بالصيني ههههههه)

العفو

حياج الله :>

شاي الضحى يقول...

اجتماعي

اي اذا هديه ما تتحسف على شي هههههه

اكره شي عندي التدخين وما احب اقعد بمكان في ناس يدخنون المفروض يمنعون التدخين في هالأماكن قمته وزقاير

لا مو وايد احسن الفاست فود مو مفيد سولك شي من البيت افيد

حياك الله اخوي :>

6umasha يقول...

wansaa walla nf3kum ilkboun :D
bel 3aaafyyaaa

شاي الضحى يقول...

طماشه

اي والله نفع

الله يعافيج :)

drabel يقول...

عوافي عوافي :) ....

بس يعني الزحمة اللب على المطعم 24 ساعة مو معقولة كلش

شاي الضحى يقول...

e3lamidiaries

الله يعافيك

بعد لازم شي يديد والناس تبي تجربه

بس اكله جدا عادي يعني ما يسوى هالزحمه


حياك الله اخوي :)

lil.D يقول...

انا اعرف اني كل مره بدخل مدونتج بتعذب نفسيا لوووووول
نايس ريبورت ينفع تشتغلين فهيئه السياحة لوول

شاي الضحى يقول...

lil

لوووول لا مو قصدي اعذبج :q


تهقين؟ :q

مشكوره :>

Angel of silence يقول...

انا رحتلة صح كلامج زحمة و نفس الشي قالولنه بعد ساعة و نص بس دقوا علينا بعد نص ساعة اظاهر الي حاجزين ملوا و غيروا المطعم و يا دورنا بسرعة

عجبني أكلهم واايد

داينميت شرمب لذييذ بس سبايسي وايد يبيلة يخففون الحرورة مالت الصوص

شاي الضحى يقول...

انجل

قاضبين على الناس كلهم ساعه ونص مادري ليش حتى لو مو وايد زحمه !!!

داينميت يقولون حلو ما جربته .. ويه عاد انا مو صوب السبايسي


حياج الله :)