أنا وأختي 1

اغلب البنات الي بعمري او اكبر او اصغر بشوي مروا بهذه المرحله!

هممممم بس اي مرحله؟!

قبل جم يوم كنت احوس بكبت امي بدون ما تدري (يا حبي حق التعبث) جان اشوف دفتر ذكريات زعفرانه لما كانت صغيره اول ما شفته على طول خذيته بقراه امي زفتني قالت لا تقرين اسرارها قلت لها الله والأسرار أغلب الي داخل النوت انا كاتبته لها

المهم بطلته وقعدت اضحك على البلاوي الي انا كاتبتها لها لي درجة اني احط الكلينكس عند عيوني يذوب من الدموع هههههههه

بعض الصفحات رفيجاتها كاتبين لها وبعضهم من بنات خالتي بس الأغلبيه مني

عقب ما خلصت منه بطلت الدرج الي بداري والي فيه كل الذكريات القديمه من رسايل وصور وشهادات ودروع وغيرها

وطلعت علبه او بالأصح (كرتون جوتي امي وانتوا بكرامه ههههههههه) هذا زعفرانه يايبته لي لما كانت بثالثه ابتدائي وكانت تحط داخله الرسايل الي تكتبهم لي فخشيته ويمعت فيه كل الرسايل منها ومن رفيجاتي وبنات خالتي وبنات عمي

بطلت الكرتون وطلعت داخله الرسايل ودفتر مذكراتي

هذي صور جزء بسيط من الرسايل الي داخل الكرتون


وهذي صورة دفتر زعفرانه (الدب) ودفتري (الأرنب)

الحين عرفتوا اي مرحله قصدي؟!

راح احط لكم اكثر رسايل ضحكوني سواء انا كاتبتهم او اختي

ملاحظه: بنقل لكم الرساله اهيا وبدلياتها

ببدي برسايلي لأختي


يوم الأثنين 6 من يناير عام 1998م

بسم الله الرحمن الرحيم

تحية طيبة أهديها لك بباقةٍ من الزهور وبعد ...

السلام عليكم، أهدي لك رسالة حب بيني وبينك يا (زعفرانه)، أتمنى لك الخير كلة وأتمنى من الله أن يبعد عنك الشر كلة.
أنا لا أدري ماذا أكتبلك يا (زعفرانه)؟

قصة حياتي:

انا (شاي الضحى) ولدت في 10 - 10 - 1987م وأنا أكبر منك بسنة وأنا شيطانة وبليسة آه يا خسارة نسيت أن أقول لك أهنيك في هذا الشهر الكريم وعسى الله أن يجعلة فيه العطاء والخير والبركة وفيه أيضاً التعاون والمحبة التي أحبك فيها.

والسلام عليكم ورحمة الله وبركاته

+ أجمع لك أفراحك
- أنقص لك أحزانك
x أضرب لك أعدائك
/ أقسم بالله بأنني أحبك

من أختك
(شاي الضحى)


تعليق: صج ما ادري شنو اكتب هههههه واحلى شي اني قاعده اعرفها بنفسي واقولها انا اكبر منج بسنه!!

والي صج ضحكني اني معترفه وكاتبه اني شيطانه وبليسه والأسلوب متعوب عليه :q

الرسالة الثانية نسيت أصورها

31 – 5 – 1997م

بسم الله الرحمن الرحيم

أختي العزيزة (زعفرانه) الأمورة الحبوبة:

أكتب لك هذه الرسالة وأريد أن أقول لك أنا في الصف الرابع الابتدائي، وأنولدت وأنا صغيرة، وأتمنى أن يكن لي ألعاب كثيرة نلعب فيهم أنا وأختي الصغيرة (زعفرانة)، وأقول السلام ختام

والسلام عليكم ورحمة الله وبركاته

تعليق: انولدت وأنا صغيرة؟!!!!!! سبحان الله شلون جذي هههههههه

وامنيتي كانت على قدي أمي لمه قرت امنيتي قالت الله يا كثر ألعابكم قبل

كان عندنه كبت مترووووووووس ألعاب من نبطله يطيحون علينه الألعاب


والحين دور رسايل اختي لي

وله تدرون شلون خلوها بالبوست الياي

بس بحطلكم نصيحة اهيا كاتبتها لي وأتمى الكل يلتزم فيها :q


إنني أكتب لك نصيحة :-

إذا كنتي مريضة إذهبي إلى الطبيب.

إذا كنتي تريدين أن تزرعي فإذهبي إلى المزرعة.

تعليق: اختي فيلسوفه هههههههه



البقية تأتي