الأحد، 15 مايو، 2011

ATMOSPHERE Grill, BURJ KHALIFA


تذكرت هالمطعم ما تكلمت عنه بالبلوق 

مطعم اتموسفير والي يعد اعلى مطعم بالعالم ويقع بالطابق 122 - 442 متر

بس حسافه ما صورت المطعم من داخل 

كل الصور احنا فيها 

فراح يكون التقرير 

قـــــرقــــــة 

حجزنا قبلها بيوم وقالولنه اذا تبون عشا بعد اسبوعين 

واذا غدا باجر الساعه 2 

واخترنا غدا 

طبعا بالحجز ياخذون رقم الفيزا ويسوون بلوك على مبلغ معين (نسيت جم)

ولازم توصلون بالموعد او عندكم 15 دقيقة تتأخرون فيها 

وعقب الـ 15 دقيقة يروح عليكم الحجز والمبلغ لوول 

لما حجزنا دزولنه ظرف وفيه ورقة الحجز 

وقوانين المطعم: 

- الملابس لازم تكون Smart elegant

الرجال: 

المسموح: قميص جم طويل وجوتي مسكر - بنطلون رسمي او جينز -
دشداشه - او اي لبس رسمي للدول - والصندل مسموح فقط مع الزي الرسمي للدول 
مثل الدشداشه وغيره 

الممنوع: الشورت - البرمودا - البنطلونات والجينزات الوسيعه والمشققه - البلوزات 
الي فيها وايد الوان ونقشات كبيره - جوتي رياضة

النساء: 

المسموح: مو كاتبين شنو المسموح لانه يدرون هدومنه معقده ههههههه 

الممنوع: فليب فلوب (بوصبع ههههه) - البنطلونات والجينزات الوسيعه والمشققه - 
الهدوم الي فيها وايد الوان ونقشات كبيره - جوتي رياضة 

- اقل مبلغ تدفعونه للشخص الواحد بفترة الغداء 300 درهم 
  اقل مبلغ تدفعونه للشخص الواحد بفترة العشاء 450 درهم

- الأطفال مسموح دخولهم فوق العشر سنوات

- التدخين ممــنــوع

- ما يصير تختارون الطاولة الي تبونها والطاولات الي يم الدريشه محدوده
اهما ينقون على كيفهم

هذي القوانين الي مكتوبه بالورقة

المطعم تصعدون له عن طريق فندق ارماني

تركبون الاصنصير Level C

بعدها يجيكون على الحجز ويعطونكم كرت

 عشان تشغلون الاصنصير الي يوديكم للمطعم

وتصعدون الى الطابق رقم 123

عقبها تنزلون دري (درج) الى الطابق رقم 122 الي فيه المطعم

والدري يكون لازق بالجام وانتوا تنزلون تشوفون المناظر من فوق

وتوصلون عند الاستقبال

واخيرا تيي الجارسونه وتقعدكم بالطاوله

ولحسن حظنا طاولتنا عند الدريشه

الفيو كان عادي صحرا لانكم لما تقعدون تشوفون مسافه بعيده مو نفس لما توقفون

اذكر لما صعدنه At The Top كان الفيو احلى واونس

اول ما تقعدون اييبون لكم صمون وزبده من فرنسا لوول

نيي حق الطلب

المقبلات:

طلبت ربيان نسيت اسمه بس اذكر انه المفروض تمبورا

اول ما يابوه وله الربيان جنه بنك ههههههه

ومعاه تفاح اخضر مبشور وجريب فروت وخضرا :(

كليت الربيان وقطيت الباجي

جان تيي الجارسونه وتقولي مو عاجبج؟

قلت لها لااا ابد من قال حلووووو لذييييذ ههههه

شالت اكلنا وراحت

شوي جان تيي وتقولنا انه اهيا كلمت الشيف (الطباخ) وقالت له اني ما كليت

فالظاهر كسرت خاطر الشيف وقال انه راح يسويلي شي ثاني احلى

قلت لها اوكي

جان تيي المفاجأه ويليتها ما يت ههههههه

طبعا يابوا صحنين حقي وحق ريلي

وفيه شي صغيييييير وشكله غريب وريحته خايسه

انا توهقت ما كليته ههههه قصيته وقطيته

تذكرون حلقة مستر بين لما طلب لحم وطلع ني وتوهق فيه

حسيت نفسي مستر بين هههههه

المهم قصيته وقطيته قلت حق ريلي اكله مالي خلق تيي الجارسونه وتزعل ههههه

جان يقولي ترا قاعده تراقبج

وله الاخت الكريمه طول المده واقفه بعيد تراقبني هههههه

شافتني ما كليت جان تيي قالت لي ما اعجبج؟!

قلت لها شنو هذا؟

قالت لي هذا اسكالوب يعيش بقاع البحر ويصيدونه الغواصين بالايد

يعني منقينه نقوه

وااااي لاعت جبدي قلت لها انا ما اكل شي من البحر الا الربيان

خذت صحنها وراحت وفكتني من المقلب


الوجبة الرئيسية: 

طلبت ستيك تندرلوين مع فرايز

وكان عادي

ومع الوجبة الرئيسية يابت لنا 4 او 5 انواع صلصات ماسترد

يايبينهم من انجلترا - فرنسا - ونسيت اي دول

ضحكوني كنت بقولهم كل الصلصات بالجمعيه من دول بره هههههه

وطلبنا كولا

واخر شي قلنا نشرب قهوه ونستمتع ومع القهوه اييبون كيك ليمون

والحساب كله كان

100 وشي دينار 


صج الاكل ما كان حلو ووايد غالي

بس استانسنه وجربنه شي يديد

ومو بخاطري اجربه مره ثانيه

الي ما راح له يروح لانها تجربه حلوه بس الاكل مو حلو

وهذي كانت قرقتي عن مطعم اتموسفير جريل - برج خليفة 

للحجز: 


00971 4 8883828

reservations@atmosphereburjkhalifa.com

هناك 13 تعليقًا:

DoDoq8 يقول...

لمه قريت القوانين قلت وااي داشه اتعذب مو اكل


بس زين لقيتو حجز لان سمعت الحجز يكون قبلها بشهر

رورو الشخبوطه يقول...

احس مو مطعم عادي اللي مسويه جنرال بريطاني من اهل اليزبيث..

كلشي يدققون عليه ذكروني بالثانويه خخخ..

وموقف الاكل عجيب لو انا جان فصلت عليهم وقطوني من الدريشه خخ..

ووبالعافيه المتعه :)

AM.SA.CHANNEL يقول...

ههههههههههههههههههههههههه و الله ظحكتيني

بس أحلى شي في الأتموسفير المنظر و أحس حلاته الظهر ..

و أحسن يوم سوو قوانين يأدبونهم شوي حد إيي عفان الله مب جنه ياي مطعم .. !!

أن أذكر مرة كنت بحجز و كان شهر واحد قالتلي ما عنا لين آخر شهر 3

star يقول...

هالو شاي

مشكورة على الريفيو وعليكم بالعافية

زين سويتي جربتيه حلو التغيير بالسفر

:)

Bint ilKuwait يقول...

wyyyyyyyyyyyyyyy laaaaaaaaaa ana akhaaaaaaaf min ilmurtaf3aaaaaaaaat la o emga3deenkum 3ind ildireeshaa!! @@ ya salaaaaaam! a6ee7 ghashyana:p o aham shay il lista shino dasheeeen jaish e7na!?!:p !!;@

ims85.com يقول...

لوووووووووووووووووووووول

صج ضحكتيني ..

بصراحه غالي سمعت عنه وايد .. بس كنتي لازم ماتستحين وتقولين ماعجبج الصحن الاول والثاني.. اخر شي طقوكم بفاتوره 100 دينار

شاي الضحى يقول...

دودو

لووول اي شروط شكثرها

لقينه غدا بس عشا عقب اسبوعين واول ما فتح كان وايد زحمه عليه اكثر من الحين

شاي الضحى يقول...

رورو

اهوا مو نفس المطاعم الثانيه وايد معطينه اكثر من حجمه مسوين لهم برستيج هههههه

زين ما سووا لنا تفتيش قبل لا ندش لووول بس اشوه كنه ملتزمين بالشروط

لا انا خفت من الجرسونه لووووووول

الله يعافيج :)

شاي الضحى يقول...

شانيل

ما عجبني المنظر وايد لانه صحرااااااااااا لانج لما تقعدين تشوفين مسافات بعيده

وصح فيو الظهر احلى من الليل في ات ذا توب .. بس المطعم روحي بليل احسن تشوفين ليتات والصحرا ما تبين ههههه

يمكن لانه شهر ١ توه فاتح عشان جذي زحمه عليه

شاي الضحى يقول...

ستار

العفو حبيبتي والله يعافيج

اي احلى شي انج تجربين كل شي بالسفر ولا تخلين بخاطرج وما تتحسفين :)

شاي الضحى يقول...

بنت الكويت

لووووول اي احلى شي عند الدريشه

ترا وناسه جربي ههههه :)

شاي الضحى يقول...

سالم

لووووول انا توهقت وقلت بتشيله وتفكني منه ما توقعت تييبلي صحن ثاني يخرع لووووووول

:)

tulip يقول...

عليكم بالعافيه
باللي كليتوه و قطيتووه:)
كان في مطعم بالكويت عنده نفس الروولز بس ما يدور عندنا طبعا قوانين
و طريقه اكلهم نفس مطعم برج العرب بس للتمنظر مو للاكل ...
بس شيء ما شفتووه تجربه :)