بزنس كلاس على الـ British Airways

من سنتين كنت حاجزة على الطيران البريطاني بالدرجة السياحية – كعادتي – ..

عقب ماشحنت جنطتي بمطار الكويت و دخلت صوب البوابات و اتجهت حق بوابتي .. سويت سكان سرييييييييع على الناس يمكن القى ويه مألوف احد اعرفه معاي بنفس الرحلة .. بس لحسن حظي مافي .. فقلت فرصة امارس فيها هواياتي وقت النطرة ..
ألا و هما القراية و الاستماع الى الـ (آي بود) ..

بس لاحظت اني من اول ما دخلت البوابة و احد شكله بالعشرينيات من عمره ما شال عيونه عني .. و قاعد يراقب تصرفاتي و كأنه شاك اني بفجر فيهم الطيارة!! .. التفت عليه .. اتفحص ويها .. قلت يمكن يعرفني و انا ناسية؟؟ .. بس لا الويه غريب اول مره اشووفه .. و الشخص تبدو عليه ملامح البرااااااااءة .. ويها وايد طفولي .. و قلت يمكن مو قصدة يطالعني .. مجرد سرحان .. خاصة انه شكله مو شكل واحد ناوي يتحرش .. طنشته و كملت هواياتي المعتادة .. لين دخلنا الطيارة ..

رحت لمقعدي المجاور للدريشة – ايضا كعادتي – حطيت جنطتي تحتي .. و كل ما دش احد ادعي الله انه مايكون مكانه يمي ..

و دخل الشخص الي كان طول الوقت يخز عند البوابة .. و كان كرسيه و رى كرسيي بواحد .. (فكه) ..
سكرو باب الطيارة و كانت فاضية نوعا ما و محد قعد يمي ( فقلت بقلبي هياااااا!! ) .. قطيت جنطتي تحت الكراسي الي يمي و مقطت رويلاتي و ربطت الحزام استعدادا للاقلاع ..

بعد ما اقلعت الطيارة و استقرت الاوضاع و انطفت اشارة ربط الاحزمة بدت الحركة تدب في الطيارة ..

قام صاحبنا الي حشينا فيه قبل شوي و راح الحمام – و انتو بكرامه - الي في بداية ممر الدرجة السياحية .. مع العلم انه كرسيه قريب من الحمام الي في اخر الطيارة وماكان زحمة .. راح و برجعته قعد يخز .. و باقل من نص ساعة رجع مره ثانية و استخدم نفس الحمام –تكرمون - و رجع يخز!!..

رجع مكانه و كل شوي يطل يحاول يطالعني ..

هني بديت اخاف بس قلت بيني و بين نفسي: تعوذي من ابليس يمكن الريال مشبه .. خاصه انه ويها يشع براءة !!..

خذيت لي غفوة شوي و بعد ما قعدت .. قعدت افرفر بالتلفزيون .. وفجأة يا انسان و قعد يمي! .. استغربت منو بيقعد يمي و الطيارة فاضية و كل من مستمتع بكرسيين او ثلاث!!..

التفت عليه الا اهوا!!! .. نفسه الي يخز .. قلت شكله ناوي على شر ..

طنشت قمة التطنيش و تميت اطالع التلفزيون ..

فقالي: شدعوة .. عطييينا ويه!! ..

هني استوعب ماهية هالشخص بالضبط .. هو عقيدي مغازلجي من الطراز القديم ذو العقل الصغير الذي يعتقد ان البنات مخلوقات ساذجة و تستسلم بسهولة لكلماته التافهه!! ..

و انا على الفور لبست السماعة و طولت على الصوت علشان لا اسمع تفاهات اكثر ..
و تم الولد يتكلم و يتكلم و انا مادري شيقول ..

في نوعية من الشباب بسرعة يمل و يروح اذا شاف البنت مو معطيته ويه .. لكن للاسف هذا ماكان منهم ..

لمن شفته ما مل واستمر على تصرفاته الـ -لا اخلاقية - .. بديت اخاف .. فضغطت على زر استدعاء المضيفين .. يت المضيفة ..

قلت لها هذا قاعد يأذيني !! .. جان تقوله .. انا شفتك مكانك ورا .. ليش ياي قاعد يمها ؟؟ روح ارجع مكانك بسرعة لا تصير مشاكل ..

خاف الريال و رجع مكانه ..

فقلت الحمدلله .. افتكيت منه .. عقبها باقل من 5 دقايق رجع يحوم حول كرسيي .. هني فورا يت المضيفة – بدون لا اناديها - .. و قالت لي انتي بروحج ؟ قلت لها اي ..
جان تقولي الريال قاعد يحاول يعتذر و ماراح يخليج بحالج .. بالطيارة احنا موجودين بس بالمطار راح يتم يلاحقج و يأذيج .. أحسن حل انج تقومين من مكانج و تروحين تقعدين بدرجة رجال الأعمال علشان لما توصل الطيارة تطلعين قبله و امشي بسرعه و طلعي و ماراح يلحقج يشوفج .. (يحيا العدل .. يحيا العدل ) ..

انا حدي تشققت .. شلت قشي و رحت وياها على درجة رجال الاعمال .. و قالت لي انها كلمت واحد من المضيفين – البحرينيين – علشان يكلمه ( او يزفه ) ..
و انا كنت في قمة السعادة .. كراسي البزنس مرييييييييحة !! .. حمدت ربي على هالنعمة و تمقطت و استمتعت بكافة الخدمات المقدمة لركاب درجة رجال الاعمال ابــ بلاش :$ .. و اكملت باجي الرحلة بسلام و راحة ( جسمانية و نفسية ) و شعووري كان لا يوصف ( اول مرة تسافر على البزنس ) ..

وصلنا بالسلامة و انحشت مثل ما اتفقت مع المضيفة .. و لا شفته ولا شافني الحمدلله ..

من عقب هالسالفة و انا بكل سفرة اتمنى واحد يتحرش علشان اقعد بالبزنس .. (اتغشمر،، الله يكافيني شرهم)

هالتجربة الصغيرة علمتني الآتي:

ببراءة ويووه الناس ولا احكم عليهم بشكلهم
( ياما تحت السواهي دواهي )
ثانيا: ان فئة من الشباب للاسف لازالت ما تفرق بين البنت المحترمه و الـ (المغازلجية)
ثالثا: ماحط مجال للخوف بقلبي .. بمجرد ما اطيح بمشكلة ماقدر احلها بنفسي .. اطلب المساعدة من اشخاص ثقة ..

و اخيرا رسالتي حق (( بعض )) الشباب :
بسكم تحرش و قط كلام على البنات .. و الله هالسوالف تصغركم في عيونا و ماراح تفيدكم بشي غير تضييع وقت و تجميع ذنوب !! ..

و ترى صارت موضة قدييييمة !!