الاثنين، 14 سبتمبر 2009

صبارتي الحلوه!

امس الظهر كان عندي موعد بالطبيب وعقب ما خلصت قلت حق امي صارلي فتره ودي اشتري لي صباره الي فوق راسها ورده!

ومن لما كنت صغيره كنت احبها وكله اشتريها وتكون الورده الي فوقها شكلها وايد حلو طالعة فوق الشوك

فرحنا المشاتل وكنت بنزل جان امي تقولي لا تنزلين اهوا ايي ههههه وناسه

ولما يه الريال قلت له ابي صبار جان يقولي تبين تستخدمينه حق شعرج لان في ناس يستخدمون الي داخله مفيد للشعر بس انا ما احبه لانه ينشف شعري

قلت له لا ابي الي فوقه ورده هههههه قالي اوكي وراح ايبها

انا مستانسه قاعده انطر صبارتي الحلوه

ولما يابها جان انصدم @@

جان اقوله ما لقيت احلى من هذي؟!!

قالي لا هذي احلى وحده !

طبعا انا كنت ناطره الي كنت اشتريها قبل لما كنت صغيره ما توقعت راح ايبلي وحده معوقه :(((

وفوق راسها كره فيها وردة خربانه!!

جان تقولي امي تبينها؟ قلت لها اي بعد رايحه المشاتل جني صج اطلع بدون شي ما يصير وامي قالت لي صبارتج على الموضه راسها كبير ههههههه وشريتها بدينارين

وسألته كل جم يوم اعطيها ماي قالي كل اسبوع مره



مادري ليش كسرت خاطري حسيتها معوقه

وعقب الفطور رحت إيكيا عشان اشتريلها أغراض يديده بدل صحنها الي قاعده فيه

وشريت لها هذا




وكنت ابي اشتري لها ابريج مال الزرع ولقيت واحد عجبني

صورته بموبايلي وتوني لما بطلته اكتشفت انه موبايلي مخرف وكل ما اصور شي ما يتخزن :(((

المهم الابريج كان كبير وايد وامي ما رضت قالت لي كبير ما ينفع :(

وهذي صورتها في بيتها اليديد


واهني قاعده بداري مع صديقاتها الأزهار




وعقب ما طلعت من إيكيا قلت حق امي اشتريلي خلاط حق الكيك

الي عندنا قديمه ومافيها ستاند تتعب

جان تقولي يالله نقي واخترت هذي



شكرا امي الحبيبه على الخلاط :)))


هناك 23 تعليقًا:

'lsdjgsk'eljr يقول...

والله اختي لو تدوكرينها مني لبكرة بتظل معوقة

شنو هذي صبارة ولا؟؟ << راح فكري بعيد ههههه

SHAHAD يقول...

شكلها يضحك لول
بس لما حطيتيها ببيتها اليديد بديت اتقبلها
عليج بالعافية
وتتربى بعزج ياارب : ))

سعد المحطب يقول...

جنه فيها ورم خبيث :d

بس في حل ..
إذا مليتي منها ..

إستخدميها حق شعرج ;)

وخوش دعاية لايكيا ..

daloo3a يقول...

خخخخخخ

حلو شكلها الصباره

هع

الدســتور يقول...

حركات

شاي الضحى يقول...

k-alanzi

حرام عليج شكلها يكسر الخاطر :((

شاي الضحى يقول...

SHAHAD

اي كشختها شوي لان بيتها القديم صغير عليها وكل شوي تطيح راسها مثقل عليها


هههههههه الله يسلمج مشكوره :))

شاي الضحى يقول...

اجتماعي

لوووووووووووووووووووووووووووووووووووول

ضحكتني هههههههههههههههه

لا هذي مو مالت الشعر :)


حياك اخوي :)

شاي الضحى يقول...

daloo3a أبو الدســتور


انا بالبدايه ما تقبلت شكلها بس الحين حبيتها لانها كسرت خاطري هههه

مشكورين :)))

DoDoq8 يقول...

معلومات اول مره اسمعها عن الصبااار

اذكر مره وانا صغيره وحده اكبر من هاذي مسكتها ودش الشووك بيدي ومن يومها وانا اخاف منها

joe يقول...

والله شكله وناسه
بعد يمكن اذا عطيتيها
الادويه ملوت الزرع يمكن ترد روحها

عليج بالعافيه

شاي الضحى يقول...

DoDoq8

الحين صار في وايد صالونات يفركون الصبار بشعرج وانا جربته مره بس ما حبيته نشف شعري وايد


انا اخاف امسكها بس هذي ما فيها شوك وايد مسكينه احسها عيوزه يالله فيها حيل شايله الي فوق راسها ههههههه :)))


مشكوره :)

شاي الضحى يقول...

{~المباركية~}

شنو راح تسويلها الادويه؟ تطلع الورد؟

ما اتوقع ينفع معاها ههههه


مشكور :))

رورو الشخبوطه يقول...

السلام..

انا العام شريت صبارات من جمعية الشاميه مصورتهم خل ادورهم وانزلهم بشخبوطة ارويج اياهم عيب البلوق مايصير نحط صور بالتعليقات :(

وصح يمدحونه للشعر بس مثل الباجي لي هديته اعتفس شعرج :(

وبالعافيه يارب..

شاي الضحى يقول...

اهلين رورو

اي والله ساعات ودج تحطين صوره بالتعليق بس ما يصير :((

وحق الشعر انا ما حبيته ... استعملت الجرجير وايد زين بس عيبه يتتتتتتلف

والله يعافيج مشكوره :)))

غير معرف يقول...

شكلها يكسر الخاطر
لكن هذي اول مرة أعرف إن في ازهار الصبار..
مع هذا النيو لوك مالها مطلعها بشكل حلو واعتني فيها لا يغرج شكلها يمكن بعد فترة يطلع شكلها أحلى..
وألف مبروك ع الخلاط..

أخوج/ طماشة

شاي الضحى يقول...

طماشة

وعليه صبارتي قبيحه بس انشالله بسويلها عمليه تجميل هههههههه


والله يبارك فيك :))


مشكور :>

نمووول يقول...

صج ان شكلهاغريب بس بتكون
مميزة عن غيرها :)
تتربى بعزج ..

شاي الضحى يقول...

نمووول

انا حبيتها من اول نظره هههههه


الله يسلمك مشكور :)))

ريانة العود يقول...

السلام عليكم ورحمة الله وبركاته

ذكرتيني بالذي مضى :/
ايام تخرجي من الثانوية قبل سنتين..
كنت طالعه للفنار..
وتعرفين محل الورد اللي تحت في صبار يشووقوون
وفيهم ورد :)

قلت لازم آخذ منه بمناسبة تخرجي واربيه :))))
شريت وحده غالية ..

وكااشخه فيها ..
كان لونها اخضر من قلللب ووردتها بنفسجي غااامج
يوم رديت البيت ..
تخيلي شنو اكتشفت !!
ان الوردة صناعية وملزقة بسليكون!!
انقهررررررت

عموما الصبار يوونس ..
وحتى الاهتمام فيه مريح :)
الله يخليها لج :)

شاي الضحى يقول...

ريانة العود

لوووووووووووووووول امبيه حتى بالصبار يقصون علينه

اخاف انا صبارتي جذي مغشوشه

لان اليوم وردتها ذبلت مادري شفيها اخاف تموت :((

وشكلي اذا ماتت بسوي نفس صبارتج بييت وحده صناعية والزقها بسيلكون


الله يسلمج ومشكوره وحياج الله :)))

Fishah يقول...

امممممممم مو تزعلين بس شكلها يضحك ! ماحس انها الصباره الصجيه ام ورده .. جنه لاعبين في جيناتها :<

وبعدين الله يهداج جااااااااااان شريتي لها بيت لونه فرااايحي .. شويه تغطين على شكلها :>

والخلاطه عجيبه .. عليج بالعافيه .. وناطره منج الوصفات والاكلات الحلوه :)

شاي الضحى يقول...

لوووووووول فشه ضحكتيني

امي تقول هذي الصباره المدوره بروح مركبينها على الطويله

شسوي ما لقيت كلهم كبار عليها هذا حجمه مناسب بس لونه جذي :(

الله يعافيج ... عاد هالأيام كل يوم مسويه شي بس انسى اصور الخطوات انشالله اذا صورت احط لكم :))