الجمعة، 18 سبتمبر 2009

أسرار بوراشد!

اكيد في ناس وايد يحبون يقرون الجريدة ويعتبرونها جزء من حياتهم وما يستغنون عنها

واكيد في ناس ثانيه عكسهم تماماً ما يحبون الجريده ولا الاخبار ولا لهم شغل بشي ويعتبرون الاخبار عوار راس

وانا من النوعين !! احبها وما احبها

بحكم اني تخرجت من قسم العلوم السياسية صارت الجريده في ذيك الفتره (ايام الدراسه) جزء من حياتي (طبعا هذا كان شي اجباري) لان كان دايما عندنا تقارير وبحوث وكنا نكتب مقالات وننزلهم بالجريده عشان البونص وكنا نتناقش بالمحاظرات عن اخر الاخبار والتطورات


وهذي الصوره لما كنت ماخذه ماده سياسة دولية ونقرا جرايد ونيمعهم في فايل واخر الكورس نلخصهم


فالدكتور كل محاظره ايي يسألكم سؤال عن الوضع الحالي سواء كان بالكويت او خارج الكويت، ومو حلوه بحقكم لما يقومكم الدكتور ويسألكم وانتوا ما تدرون وين الله قاطكم لان بخليكم بيزه ما تسوون شي والكل بيضحك عليكم مو تدرون ربعنا حق الشماته زاهبين

وانا مشكلتي كانت اني ما اواطن الجريده او بشكل اصح ما اواطن امسك الجريده تدرون ليش؟!

لانها توصخ ايدي !!! لوووووول

على ما اقره اهم المواضيع والمقالات (وطبعا لازم مقالات الدكتور الي يدرسني لان يسألنه فيهم) الا اصابعي صايره سوده وتلوع الجبد جني مغطستهم بفحم لاني اذا مسكنت الجريده لازم امسك الصفحه ما اهدها الا لما اخلص الخبر ههههههه

وانا تقييمي للجريده بورقتها اذا كانت تدمر ولا لا يعني مثلا القبس ما اواطنها ولا احب امسكها لانها تتلف ايدي كلها سوده من الحبر L الوطن عندي احسن منها

فقمت ادش الجرايد بالنت واقره اخر الاخبار والتطورات بس المشكله مو كل مره كنت اقدر ادش لان يكون عندي دراسه ومو فاضيه اشبك

وقبل تقريبا 7 أشهر او اكثر كنت قاعده اشوف تلفزيون الوطن وشفت دعاية " خدمة أسرار بوراشد "

وانا مو من النوع الي يحب يشترك بخدمات بالموبايل

وشفت الاعلان بجريدة الوطن بعد

بس ولا مره فكرت اشترك لاني ماني عارفه شسالفتها

بعدين سمعت اختي تقولي ان رفيجتها مشتركه فيها ووايد مستانسه منها وسألتها شنو يدز يعني؟ قالتلي اخبار ونكت وهالسوالف

فقلت يالله بشترك اذا ما اعجبتني بشيلها

واشترك ... وأول مسج وصلني جان اقول حق امي وخواتي بوراشد دزلي مــــــــســـــــــــــــــج وكنت حدي مستانسه واقرالهم كل خبر يدزه واختي استانست عليها واشتركت

وصارت هذي الخدمة جزء لا يتجزء من حياتي

فكتني من الجرايد الي يوصخون الإيد .. وفكتني من اني اقره خبر شطوله ما منه فايده ولا استفيد منه بالمحاظرات وقت المناقشه

والحلو بالخدمة انه يدز لك كل شي أول بأول ويكون موثوق فيه واذا قلت حق اي احد الخبر قالولي من وين بو راشد؟ اقولهم اي يقولون لي عيل موثوق فيه

وطبعا تعليقاته احلا شي بالخبر ساعات اذا خبر عن الرياضه الي انا مو صوبها ما اقره الخبر بس اقره التعليق واضحك هههههههه

صج الخدمه وايد حلوه وانصح كل الي ما اشتركوا فيها ليلحين يشتركون وصدقوني ما راح يتحسفون

ومن الاشياء الي تضحك والي اذكرهم لما كنت بالجامعة مره كنه في محاظره فوصلني مسج من بوراشد نسيت احط تليفوني سايلنت شوي ولا الي يمي يوصلها مسج والي يمها والي وراه ولا جدام واغلبيه الكلاس البنات والشباب فجأة وبنفس الوقت لووووول كل وحده تقول حق الي يمها أشـــكــــره بوراشد هههههههه ومسكين الدكتور منصدم شفينه كلنه مسجات بوقت واحد جان يقول لنه موقتين؟! الظاهر اهوا مو مشترك بالخدمه فما يدري شالسالفة خخخخ

الله لا يحرمنا من مسجاتك يا بوراشد ... والله يعطيك العافيه



تستاهل دعايه ببلوقي ببلاش هههههه

هناك 21 تعليقًا:

bokeh of magic * يقول...

و الله شوقتيني تصدقين عاد انا احب اشوف الاخبار بس ما احب اقرا الجرايد وايد كبيره الصفحه ماعرف شلون امسكها وايد اتلعوز و اذا حطيتها على الارض ظهري يعورني من التجندس فبس مقزرتها اخبار على التلفزيون بس دام جذي السالفه نشترك ليش لاا
ثااانكس

شاي الضحى يقول...

انتي نفس حالتي انا من امسك الجريده اعفسها محد يقدر يقراها عقبي المفروض يسوون ميني جريده حق الي مثلنه هههههه

بس ما نحتاجها الحين دام بوراشد مو مقصر بأخباره وتعليقاته :)



مشكوره :>

daloo3a يقول...

هههههههههه والله زييين


تسلميين ع الدعايا

SHAHAD يقول...

كللش ماني صوب الأخباااار :/
فـ حدي مستغنية عن هالخدمة لوول

لووول أحلى شي لما وصلكم كلكم المسج
مسكين الدكتور ما يدري وين الله قاطه لول

سعد المحطب يقول...

انزين واللي ما يقرا غير الجرايم والوفيات؟
ما ينفع له بو راشد .. صح؟

بس جريدة الأهرام شيابها لج !!
عيل أكيد دكتوركم سيد سليم :d

joe يقول...

الجريده على الريحه ساعات متروسه اخبار مهمه وساعات مافيها شي

يامعوده ماكو غير الاخبار الي تيب النكد

نمووول يقول...

اهم شي انج خايفة توصخين ايجد
اي غسليها بعد ما تقرين الجريدة صلا حتى لو الجريدة مو مصخة غالباً اخبارة تكون وصخة يعني انتي مضطرة بكل الحالات تغسلين ايدج ..

اي غصب تقرين المقالة الي منزلها الدكتور ولا ياويلج يا سواد ليلج

مادري يمكن اجرب الخدمة بس افضل اقرا من موقع الجرائد في الانترنت وايد احسن ..

اما سالفة المسجات الي مرة وحدة لو انا دكتوركم جان طردتكم كلكم لو مكانه جان حسيت انكم متعاونين علي

موضوع جميل وطليف وظريف
بالتوفيق وشكراً ..

الدســتور يقول...

بوراشد
العن خدمة اخبارية
كل دقيقتين مسج عن حادث بالشارع الفلاني
و اغلب المسجات اشاعات في اشاعات

شاي الضحى يقول...

اجتماعي

امبله ينفع حتى الجرايم والوفيات ومواعيد الصلات كل شي يدز

اي للأسف محمد السيد سليم لوووووول وكان هذا عقاب مو تقرير

حياك :)

شاي الضحى يقول...

نمووول

لوووووول اشوه انك مو دكتورنه جان كلنه بره وقعدت تشرح بالكلاس بروحك

حياك الله مشكور :)

شاي الضحى يقول...

أبو الدستور

وايد ناس تكلموا عنه وان يدز حوادث واهوا مره قايل في مرينا اف ام ان مو قصده ينكد على الناس قصده حق الي يكونون بالشارع والطريج زحمه او مسكر عشان يقرون المسج ويغيرون طريجهم وما اتوقع اشاعات وانا مره صادفني الشارع زحمه ومسكر ما يمشي وما ادري شالسالفه جان يدز بوراشد مسج انه في الشارع هذا مادري شنو منقلب ومسكر الشارع وعقبها طلعت باول لفه

يعني بالعكس شي زين اذا كنت بالشارع ويوصلك مسج ان فيه حادث عشان تغير طريجك :)

وما ينلام اذا كل دقيقتين مسج انت شايف الحوادث الي بالديره وترا مو كلهم يدز بس الي يكونون مسكرين الشارع ويكون الحادث قوي اذا حادث عادي لا ما يدز

حياك الله :)

شاي الضحى يقول...

دلوووعه

الله يسلمج


شهد

انتي فاكه عمرج ههههههه اي مسكين حده ما يدري شالسالفه


المباركية

ساعات تكون متروسه دعايات مو اخبار



مشكورين :)

رورو الشخبوطه يقول...

السلام..

ماحب اقرا الجرايد اكتب عادي بس اقرا لا ..

وشغلي بالجرايد ودراستي بعد مانلام لي كرهتها..

وتوني اعرف الخدمه خبري فيها دعايه قبل جم سنه بس جنه لشركة ..

مشكوره خيتو..

شاي الضحى يقول...

هلا رورو

ايام الدراسه غصنا بالجرايد لما لاعت جبودنا

وغريبه ليلحين في ناس بالكويت ما يعرفونها

حياج الله :)))

غير معرف يقول...

هلا جاي.. عاد أذكر مرة أخوي يبي يشترك معاهم ودزلهم مسج لكنه ماوصل وحاول جم مرة وما صار معاه. بالنسبة حق رايي.. خدمة حلوة لكنها مو يديدة، يعني قامت فيها " العربية " من قبل بإنها ترسل آخر الأخبار حتى روتانا قامت تسوي هالخدمة حق اللي يحب الأخبار الفنية. مادري ما حب هالسوالف، وأفضل إني أشوف الاخبار من على النت لأن خبر عاجل بو سطر ولا سطرين مايهمني كثر ما ألقى تفاصيل عن هالخبر بالجريدة..

يعطيج العافية

طماشة

شاي الضحى يقول...

طماشة

انا من اول مسج ضبط معاي يمكن وقتها كان ضغط على الشبكه

عدل كلامك مو يديده وبالكويت في وااااااايد خدمات نفسها بس انا عندي هذي الخدمه اهيا التوب


انتهى زمن جهينة وجاء زمن بوراشد
http://www.awan.com/pages/local/223367

حياك اخوي :))

ثامر الدخيل / بوراشد burashed@ymail.com يقول...

مساء الخير
أنا جدآ مستانس من الموضوع اللي قريته وأتمنى أني أكون عند حسن ظنكم.
وبالنسبة للأخ اللي مستاء من الخدمة لا تضايق نفسك ياخوي وثق تمامآ أن إرضاء الناس غاية لاتدرك.

تحياتي لكم جميعآ
وكل عام وأنتم بخير

شاي الضحى يقول...

بوراشد

نوووووورت البلووووق :)))

والله انا الي استانست بوجودك ببلوقي المتواضع :)


حبيت اقولك يعطيك العافيه وما قصرت واتمنى انها ما تكون اول واخر زياره :)


وانت بخير وصحة وسلامه وعيدك مبارك :)


مشكور وايد :)

سعود ثامر الدخيل buazoz@ymail.com يقول...

اشكركم على هذا الكلام الجميل عن خدمة ابوي بوراشد ثامر الدخيل وراح اقول له عن مدحكم له وانا ولده الوسطاني سعود ثامر الدخيل وشكرا وهذا ايميلي اذا بقيتو شي
buazoz@ymail.com باي 

سعود ثامر الدخيل buazoz@ymail.com يقول...

وهذا ايميل المسنجر
saudaldakheel@live.com

شاي الضحى يقول...

سعود

لا شكر على واجب اخوي ... وصدقني كل كلمه كتبتها كنت صادقه فيها والله يعلم بهالشي

والنعم فيك وفي ابوك :)


وعلى فكره بوراشد يدري عن هالموضوع :q


وشكرا على تواصلك وسلم على الوالد ... اتمنى انك ما تقاطع :>

يعطيكم العافيه :>