الثلاثاء، 1 سبتمبر 2009

شي يبط الجبد!

اكيد انتوا كلكم سمعتوا عن مرض أنفلونزا الخنازير ولوية النواب إلي يطالبون بتأجيل الدراسه للمرحلة الابتدائية لي ديسمبر وبعضهم قالوا لي يناير




وانا رايي ان ما يأجلون الدراسه لان اذا تأجلت الدراسه ما راح يروح المرض بدال ما يفكرون بحلول منطقيه يأجلون الدراسه ويضيعون نص سنه على الطلبه بدون تفكير

والدول إلي طلع فيها المرض قاعدين يداومون ومنظمة الصحة العالمية قالت وضع الكويت آمن! والمصيبه انهم قاعدين يسوون ندوات ويقولون للناس لا تخلون عيالكم يداومون لما تحقق التربية مطالبنا !!!

وبعدين الناس الي يقولون يخافون على عيالهم ترا ما وقفت بس على المدرسه !!!! الحين رمضان وقاعدين يروحون يمعات وغبقات وباجر القرقيعان يعني اليهال بفرون من بيت لي بيت او بسوون حفلات قرقيعان وغيرها

وبعدها ياينه العيد يعني طلعات روحات سينمات مسرحيات مطاعم اسواق العاب هياته بكل مكان

عقب ما يخلص العيد تيي المدارس يقولون:
"""نـخـاااااف على عـيـالنا"""

الي يخاف على عياله صج يقعدهم بالبيت مو يروحون كل مكان واذا صارت حزت المدارس قلتوا التربية ما تهمها صحة عيالنا

يالله تعوذوا من ابليس وروحوا اشتروا حق عيالكم هاي جين وحطوه بجناط المدرسه


وترا الوقايه خير من العلاج

وعسى الله يحفظ ديرتنا من كل مكروه

هناك 18 تعليقًا:

DoDoq8 يقول...

انا معاج بكل كلمه قلتيها ولم قلت رايي مثلج حصلت هجوووم يقولون انتي ماعندج عيال

بس مادري يعني الحين بعض الناس راحت ليه اخر الدنيا بعضهم سافر لديره المرض لمه صارت حق الدراسه السالفه يبون عطله شفيها لو داومنا بكمام ترا هذي انفلونزا عاديه والي فيه امراض ثانيه خل يوقف قيده يغيب يتأخر بس مو كل الطلبه اتغيب

شاي الضحى يقول...

DoDoq8

اي والله عدل كلامج

اصلا لو يأجلون الدراسه شدعوه الكويتيين بيقعدون بالديره اغلبيتهم بسافرون اقل شي بروحون دبي

وراح يزيد المرض اكثر

واهما لو صج هامهم جان ما سافروا بالصيف

وعلى فكره المرض ما انتشر الا عقب ما ردوا الناس من السفر


مشكوره :)))

SHAHAD يقول...

وانا بعد وياكم
انا ابلة واشوف ماله داعي هالتأجيل
مضاره أكثر من منافعه
وبعدين مثل ما قلتي
شوفوي شكثر هاليهال اللي مقططين بالمجمعات
وشلون المجمعات زحممة ولووية !
أحسن شي الوقاية
والمريض يقعد ببيتهم لما يتشافى ويداوم
غير جذي لا والله خيداومون وحرام تضيع عليهم كورس
أو تضيع عطلة الصيف اليايه على تأجيل ما تأجيل !

bokeh of magic * يقول...

السالفة مو جذي انفلونزا الخنازير اهيا انفلونزا عاديه و كللللش مو خطيرة ما تسوي ولا شي
اما ااذا اجتمع هالمرض مع مرض ثاني مني الخطوورة و كل الناس اللي ماتو ما ماتو من المرض نفسه اغلبهم عندهم مشاكل بالجهاز التنفسي حتى لو مشاكل بسيطة مني الخطوره فموسم المدارس راح يكون وقت انفلونزا الموسيمية العادية فيصير انفلونزا عادية مع الخنازير الله يستر شبيصير فيقلون خلوهم ببيوتهم ولا هالامراض تنتشر بيتهم و اساسا المرض قام ينتشر بصورة كبيرة بمعدل باليوم 9 حالات الصراحه انا وحدة اخاف على عمريP: و جان زين لو ياجلون المدارس

شاي الضحى يقول...

اهلين ابله شهد

صاجه والله مهيتين عيالهم الحين وبعدين يقولون نخاف عليهم

بس زين سوت وزيره التربيه ما أجلت الدراسه

مشكوره يا ابله :))

شاي الضحى يقول...

Being One

اكيد كل واحد يخاف على نفسه

وصح كلامج انه المرض يصير خطير اذا الشخص عنده امراض ثانيه

بس انا قاعده اتكلم عن الناس الي مهيتين عيالهم الحين ووقت المداس صاروا يخافون على عيالهم !!!

مشكوره :))

جاي نعناع يقول...

صح التأجيل موحل ....والله يحفظنا من كل شر
دمتِ بود^_^

عثماني يقول...

انا ما اقول الا الله الحافظ

و الا اجراءات الحكومة ما عليها اعتماد بهالسوالف

:(

سعد المحطب يقول...

قولي حق اللي يبون العطلة ..

لا تروحون مطاعم
لا تروحون سينمات
لا تروحون مسايد
لا تروحون الجمعيات

قفلوا على روحكم بالدار ولا تطلعون منها ..

==

بس يمكن المرض ما ينتقل إلا بمدارس الابتدائي
كل شي جايز ..

النواب أبخص :d

رورو الشخبوطه يقول...

صاجه ..

غير انه حتى لو ماطلعوا من البيت اهلهم مايشتغلون لو الله كاتب بيعدونهم صعب انه نعزل نفسنا..

عموما كلشي مقدر والله الحافظ..

و الله يشفي المرضى ويكفينا شره واياكم يارب..

aL-NooR . يقول...

الله يستر .. ما بيدنا الا الاستعانه فالله ..
و تأجيـل المدارس و دواماتهم ..كل شوي راي ..و الله انا اللي يصيرولي داوموا يمكن منهم مدارس خاصه ..بس عادي ما سووا اي شي ..

الحافظ الله ..
***************

شاي الضحى يقول...

جاي نعناع

اللهم آميين مشكوره :))



عثماني

اي والله صدقت وهذي ديرتنا شنسوي بعد :(

شاي الضحى يقول...

اجتماعي

لوووووول اي والله شكله المرض ينطر اليهال بالمدارس بس

مشكوور :))

شاي الضحى يقول...

رورو


اي والله عدل كلامج ... اللهم آميييين :)


مشكوووره :))



aL-NooR

لا بس الحين خلاص قالوا ماكو عطله والاهالي يقولون ماراح يداومون عيالهم اهما الي بضيعون عليهم سنه

اي والله الله الحافظ ... مشكوره :)))

غمنده هانم يقول...

ااااااااااااااااه شنسوي بعد غصب على اخشومنا بنرووووووح
هذي ديرتنا وصلوا على النبي

Hadeel يقول...

لاااا ترا مو كل الناس جذي
يعني هذا اخواني يطلعون ويروحون ألعاب وجذي
بس الدوام غير ..
الدوام يعني رفيجه يمه يعاطس وحالته حالة كله بأخوي
ولا يبادلون أقلام وبعدين بالصف مكان مغلق .. يعني لو في شي يعديهم يعديهم ..
وهاليهال فقرارا لا حول لهم ولا قوة
تلاقين معاهم طالب سافر بالعطلة وتوه راد
ويايب البلاوي وياه

أنا بالصراحة من المؤيدين ..
على الأقل ابتدائي وروضة
المتوسط والثانوي كبار يعرفون
ليي قلتيلها لا تسلمين على رفيجتج راح تفهم وتستوعب
لاكن ياهل تيين تقوليله لا تلعب..!!
وبعدين يصير دمج .. مو إلا ناخذ عطلة الصيف 3 أشهر ياخذونها شهر أسبوعين يومين
المهم صحتهم


أو على الأقل كحل وسط لازم كل ياهل يلبس واقي على خشمه وحلجه ..

ذاك اليوم بالجمعية وااحد مع عياله كلهم حاطين الواقي ..اي هذا الوعي
مو نقط عيالنا .. تالي نقول ما راح يضرهم
أشكرج على اثارة هذا الموضوع

joe يقول...

خلج من هذا شوفي دورت الروضان مالت كرة القدم متروسه يهال جنه مدرسه ابتدائيه
شمعنى ماخافوا على عيالهم
ترى الوضع عادي وماله داعي هالتأجيل

بس هالتأجيل من صالح وزارة التربيه
اذا الطالب حاشه المرض وتوفه لاسمح الله الصكه بتسير براس الوزيره ويستجوبونه

frenchy يقول...

7abaybi eshtero mo6ahir hydroalcoolic min alpharmacy 7ag aleed bidal sowalif aljam3iya hatha ili yen9e7un feh aldowal alorobiya o allah al7afith