الثلاثاء، 16 مارس، 2010

حفل تخريج الدفعة التاسعة والثلاثون 2008/2009

مبرووووووووووووووووووووووووووووووووك

لكل الخريجين والخريجات

امس كانت حفلة التخرج

متخرجين قبل سنه وامس حفلتنه ههههههههههههههه

انا ما كنت ناويه اروح لان ادري الوضع راح يكون فوضى ولويه

وهم فرحة التخرج راحت توهم يتفرغون ويسوون حفله

مادري ليش جامعة الكويت جذي الي يتخرجون الحين حفلتهم السنه اليايه!

وانا عشان رفيجاتي رحت

زهبت روبي وكشخت وقعدت انطر باص المدرسه يوصل (رفيجاتي) :q لانهم بمروني

اول ما اوصلوا دقوا علي وخذيت روبي ورحت لهم

شكل السياره عجيب كل الارواب معلقه بالدبه ههههههههههه



وصلنه الجامعه ولا عشتو مدخل الشباب غير عن البنات

عشان التفتيش طبعا

بس الي يضحك انهم كاتبين طلبه وطالبات !!!!

المفروض خريجين وخريجات


اول ما دشينه الملعب ولا قاعدين يوزعون كورن فليكس ونسكافيه

قلت لها ليش كورن فليكس؟ قالت عشان يعطيكم طاقه هههههه



الحمدلله ان الجو كان حلو بس شويه هوا كل شوي يطير كبوسي لووول



وقعدنه ندور كليتنه لما لقيناها



وهذي اللوحه من جدام



وزعوا علينه هالورقه عشان نستلم شهايدنه


مادري ليش كنت متوقعه ان ماكو احد بالحفله

كان حده زحمممممممممممممممممممممممممه



اهني لما وصل ولي العهد



انا ورفيجاتي كنه قاعدين ورا مالنه خلق لووول

ويييه اصلا ما قعدنه

طول الوقت نحوس نبي جراقي محد معطينه ويه

لما رفيجتي راحت تسأل قالولها كليتكم ما عطونه خبر انهم يبون !!

شفنه البلونات ورحنه نصور معاهم جنه اول مره نشوفهم

بس شنسوي بنضيع وقتنه ملينه ما نسمع شي ولا ندري شنو قاعد يصير



قمنه نمشي عند الكليات ونطر يالله يا محسنين نبي جراقي

ههههههههههههههه



اخر شي لقينه وحده من التوجيه والارشاد بكليتنه ومعاها بلونات

وشفناها تقطع خيوطهم

وقالت تعالوا ساعدوني وزعوا معاي البلونات

عاد احنا ما نقول لا

قلنالها اوكي انتي عطينه البلونات واحنا نوزع

عطتنه جم وحده انا ورفيجتي جان تقول يالله وزعوا

طنشناها وخذيناهم حقنه جكتنه وقالت انتوا مو دافعيييين؟!!!!!!!

@@

توني ادري انهم بفلوس هههههههههههههه

قلت لها لو ادري جان رحت الشناكل ويبتلي خمطه احسن من الطراره

ماكو شغل اوزع معاج بلونات ههههههههههههههههه

وهذا الي خذيته عشان اطيرهم وقت اللويه



وطول الوقت يزفون فينه انا ورفيجتي قعدوا وقعدوا

وين نقعد؟! كراسينه وخذوهم ماكو الا كراسي اخر الدنيا



واحلى شي بالحفله لما يسكرون الليتات وكل كليه تسوي لويتها

كليتنه اثبتت فشلها

كانوا حدهم مليقين وميتين ونايميييييييييين

الصراحه احلى شي كانوا "الآداب" صج يونسون



وهذي الزينه بالارض بعد اللويه

رفيجتي علق كعبها بعلبة الجراقي لووووووووووووول

اشوه ما كنت لابسه كعب :$



عقب ما اخلصوا بدت الألعاب الناريه

صوتها مزعج بس كانت تونس

واحلى شي انها كانت مرتين اول مره عقب ما خلصوا لوية الكليات

والمره الثانيه واحنا ناخذ الشهادات



واهني لما الأهالي انزلوا من المدرجات وصار

هجووووووووووووووووم



وقت التكريم

والي كرمنه الشيخ ناصر الصباح

وانا حدي فاضيه لما صار دوري جان اقعد اصور ههههههههه

ووحده تزفني تقولي مو وقته الناس وراج!!

جان اطوف الي وراي عشان اصور :q



تبون الصراحه؟

ما استانست بالحفله وحتى لما شفت رفيجاتي الي مو شايفتهم من السنه الي طافت

ما حسيت اني ولهت عليهم ولا فقدتهم جني امس شايفتهم

اليوم بالسوق شفت معيدتي قالت لي ولهتي علينه؟!

قلت لها تبين الصج؟ ... لاااااااااااااااااااا هههههههههههههه

أكثر شي ونسني بالحفله لما شفت اهلي واهل رفيجاتي وصورنه معاهم

جنه اول مره نشوف بعض ههههههههههههههههه

واحنا قاعدين نصور جان تمر ست الحسن والدلال

غنيمه الفهد

شفت البنات يصورون معاها جان ارز ويهي واصور وياها

ضحكتني رافعه ايدها وتقول بايباااااااي عبالها فيديو هههههههههههه





واحنا قاعدين نصور ونسولف جان اشوف الشيخ احمد الفهد وكان بيطلع

واشوف الشباب يروحون يسلمون عليه والي معاه يوخرونهم

جان اروح بسرررررررررعه

واندعس بينهم واوقف جدام الشيخ وانا ماسكه كامرتي جان اقوله

ابي اصوووووووووووور

جني طفله بريئه هههههههههههههه

اهما ماتوا من الضحك علي جان يقولي الشيخ تعالي بنيتي صوري

اول ما وقفت يمه جان اييون الصحافه (جرايد ومجلات) ما بقى احد ما صورني

وانا طفارتي احط صوري بالجريده او مجله

جان اعصب عليهم

وصرخت عليهم قلت لهم مااااااااااابي احد يصورني لاااا تصورووووون

وكلهم مطنشين !!!! وفلاشات بويهي

جان الشيخ يعصب عليهم قالهم بــــــس لحد يصورها مو غصب البنيه ماتبي صوروها بس بكامرتها

كلهم خافوا وقالوا ان شاءالله ووخروا كاميراتهم

صورني واحد توني يايه بقول حق الشيخ مشكور جان يقولي شوفي الصوره يمكن ما تعجبج

اذا تبين نصور غيرها عادي :$

خذيت الكاميرا ولما شفت ولا الغبي مو مصورني :(

جان اقوله ما اطلعت

قالي نصور غيرها ... ييبولنه احد يعرف يصور

ويه واحد وصورنه قالي شوفيها اعجبتج؟ لما شفتها قلت له ايييييي وانا حدي مستانسه

هههههههههههههههه

وقالي مبرووووك وبارك حق امي




ما عطونه الا شهاده يمالهم الفقر هههههههههههههه

باجي الكليات معطينهم اشياء ثانيه خلف الله علينه



وهذي الشهاده




مصوره جم فيديو ان شاءالله اذا عرفت اصغر حجمهم بنزلهم لكم

بعد ما خلصنه من الحفله رحنه نتعشى ونكمل الاحتفال مع رفيجاتي

وسوينه مفاجأه حق وحده من رفيجاتنه بمناسبة عيد ميلادها

واحلى شي الجرسونات يقولون تبون نغني لكم عشان التخرج ولا عيد الميلاد؟!

قلنالهم الأثنين .. جان يقولون

Happy BOTH day to you

ههههههههههههه

هناك 50 تعليقًا:

رورو الشخبوطه يقول...

وناسه خخ..

مبروك التخرج..

احنا عطونا نفس ليت والتربيه عطوهم جراغي يونس ..

ولما مر الشيخ يم كلية التربيه قاموا يبيون له البنات خخ..

وكليتنا ابداع بالصراخ ..

بس هديه ماعطونا الا شهادة ..

بس وناسه في اكشن انا مافي ربعه ماصورت فيه خخخ مابقى تفاخيه لوحة بنيه ..

بس الوناسه فيها باللويه ..

ومشكوره..

she is me يقول...

الله وناااسه
أنا بس قاعد أقرا .. واستانست


قاعد أطالع الصور .. وأقول ما شاء الله .. كلهم فرحانيين << الله يتمم عليهم بالوظايف السنعة ( للي ما توظفو (*^))




أبي أتخرج !! ><

BeNT JaBeR يقول...

الف مبرووووك,,,

وصج وناااسه احلى شي هاللحظات ..


وعقبال الحياة الوظيفيه

lil.D يقول...

اسميج مغامرات :) لوووول
الف مبرووووووك،،،، مب بس جامعتكم حتى نحن الحفله عقب سنه :) بس يتم شعور حلو!!!
^ــ^

نمووول يقول...

ينفع نقول مبرووك التخرج ؟
ولا نقول مبروك حصولج على شهادة التخرج ؟ ولا شنقول هههههههههه

طلعتي زميلة مهنة وتخصص
انتي خريجة علوم اجتماعية شنو تخصصج علم نفس ؟

لان الصورة الاولى كل الي فيها اهم استاذة علم النفس بجامعة الكويت مادري اذا موجودين بعضهم ولا طلعوا ..

مبروووك وخوش حفلة ..

تحياتي

شاي الضحى يقول...

رورو

الله يارك فيج هههههه

حتى هالسنه عطوهم ليتات والتربيه ييببوا لووول

احنا الي عندنه ميتين يبطون الجبد

السنه الي طافت كليتنه عطوهم هديه قلم ههههههههههه

احنا لا قلم ولا مسطره :q

اي كلنه جذي حتى بدبة السياره صورنه لوووول سويناها ستيديو

العفو

مشكوره :**

شاي الضحى يقول...

she

انا ما استانست الا اخر شي مع اهلي ولا الحفله مليقه

آمين

ان شاءالله تتخرجين ونفرح معاج :)

شاي الضحى يقول...

بنت جابر

الله يبارك فيج :)



آمين مشكوره :>

شاي الضحى يقول...

lil

عاد انا احب المغامرات بس ليش تسميني جذي؟ هههههههههههه

الله يبارك فيييييييييييييييييج :)

صج؟ مادري ليش ملاقه ما نستانس

مشكوووره :)

شاي الضحى يقول...

نمووول

همممم مادري قولي مبروك حصولي على الشهاده الفخريه ههههههههه

لا تخصصي علوم سياسيه :)

صج مادري ما اعرفهم .. من كل قسم يايين جم دكتور

والله يبارك فيك ... بس كلش مو خوش حفله ههههههه :q

مشكور والفال لك يارب :)

Made n Q8 يقول...

مبرووووووووووووووك التخرج

وعقبال الوظيفه السنعه ان شاء الله


انا لما رحت الحفله تخيلي ولا وحده من رفيجاتي حاضرين يعني حده ضقه خلق ولا كان الجو رطوبه وحر واااي بس شسوي رحت عن خاطري خخخخ وصج احلى شي لما سكروا الليتات صرخت لين قلت بس طلعت حرت الاربع سنين كلها خخخخخخخخ
واخر الحفله خو صار لويه وعفسه حتى اختي اهيا الي سلمتلي الشهاده هههه قتلها زين انتي الي خرجتيني الحين !

mazyona يقول...

وناسه مبرووووووووووووك
يالله زين طلع منهم شهادة

شاي الضحى يقول...

ميد

الله يبارك فيييييييييييج :)

آمين يارب العالمين

لا انا اشوه رفيجاتي موجودين ... والجو كان حلو انتوا بالصيف اختي كانت معاج بالحفله بس ماراحت مالها خلق

ايييييييييي حده يتطلعين الحره وتصرخين تقولين فكككككككككككككه ههههههههههه

لووووووول خوش شي لا انا الشيخ سلمني الشهاده وانا حاقرته واسولف مع دكتور عبدالرضا اسيري والي وراي يزفوني لووووووول بدعت

مشكوره :*

شاي الضحى يقول...

مزيونه

الله يبارك فيج حبيبتي :)

اي اشوه ما طلعنه ايدنه فاضيه هههههههههههه


مشكوره :)

Fishah يقول...

مبرووووووووووووووووك حبيبتي التخرج وحصووولج على الشهاده اخيرا :))

عقبال الوظيفه عشان اطفرج لما اشوفج تتحلطمين منها ومن مديرج خخخخ

اعجبتني سالفه صورتج مع الشيخ .. بط جبدي اللي ماعرف يصورج :<


عقبال تبشرينا في بشاره ثانيه ;*

*Being One يقول...

مبرووووووك التخرج D:
و الله وناسه شعوور حلو !
يالله انشالله عقبال الوظيفه الحلوه ^^

شاي الضحى يقول...

فشه

الله يبارك فيج حبيبتي ... وين هالغيبه ولهت عليج؟!

هههههه ان شاءالله ما اييني مدير نفس مديرج :q

والله استانست على الشيخ طيب وعادي قعد ينطر على ما يه واحد ثاني وصورنه وشفتها اعجبتني :$$$

ان شاءالله

لا تقاطعيييين


مشكوره :*

شاي الضحى يقول...

Being

الله يبارك فيج :)

شعور حلو صح بس مو بالحفله لا ... اول ما طلعت النتايج بالسيستم اهني كان شعور صج صج حلو :)

آمين

مشكوره :>

sarona~ يقول...

عالبركة حبيبتي

^_^

شاي الضحى يقول...

سارونه

الله يبارك فيج مشكوره


:)

5/4 يقول...

ألف مبروك التخرج :**

عقبال أنا إنشالله في يوم من الأيام أشوف هاليوم, بكمل إنشالله هالسنة

bent el deera يقول...

مبروك التخرج

زين سويتي رحتي وغيرتي جو

اغلبنا جذي نروح الحفله عشان صديقات الجامعه بس ترا وناسه :>

موقفج مع المصورين يضحك .. اهم شي ان صوره تكون على مزاجج

:>

خوش بوست استانست لج والله

Sami يقول...

اول شي مبروك على التخرج ..ثاني شي انا شفت الحفل بالتلفزيون ..الصراحه طقتني البوهه من الي شفنه ..ما كنت متوقع انا في مجتمعنا ناس من هالنوع ؟!

انا قاعد اتكلم عن الي قاعدين يتلصقون بالشيخ نواف علشان صوره ..يا ليت بس تلصق و ترزز ..هواش على الهوا ..هيلق في كل ما تحمله الكلمه من معنى ..اقصد البعض مو الكل

Reem يقول...

مبروووك التخرج
الله يوفقج وعقبااالي

شاي الضحى يقول...

5/4

الله يبارك فيج

آميييييين

بس انتي مو تشتغلين؟!


مشكوره :)

شاي الضحى يقول...

بنت الديره

الله يبارك فيج

اي والله تغيير

واذا صديقات الجامعه مو كفو؟!

انا رحت عشان صديقاتي بس مو صديقات الجامعه

اي لازم بعد للذكرى ههههههه

حبيبتي مشكوره :*

شاي الضحى يقول...

سامي

الله يبارك فيك

لا بالعكس مو هيلق! الواحد وين يصيد الشيخ نواف بس عاد مو هواش ههههههههه

انا ما شفتهم لان احنا بالحفله ما نشوف شي من اللويه بس امي قالت لي عن اللي صار شافتهم بالشاشه الي بالملعب

وترا مو بس الشيخ نواف مع اغلب الشيوخ صارت اللويه

عيل ما شفت حب الخشوم؟! هههههههههه

مشكور اخوي :)

شاي الضحى يقول...

ريم

الله يبارك فيج :)


آمييييييين ونفرح فيج :*

مشكوره :>

BookMark يقول...

مبروك التخرج مرة ثانية وثالثة وأخيرة D:

بس أهم شي لما قال نبارك للشبابنا وهم على وشك الانخراط في الحياة العملية@@
عاد انا ورفيجاتي قلنا بصوت واحد : كلنا انخرطنااا وخلصنااا
(توظفنا يعني)

بس وناسة حلو جو الحفل
ويسلمو عالصور الحلوة يعني اذا بنزل بوست ابوقهم منج عادي؟ P;

ebtsamh يقول...

ع البركة حبيبتي .. احلى ايام ..

واحلا صور ..

شاي الضحى يقول...

بوك مارك

الله يبارك فيج

وانتي بعد مبرووووووك التخرج والوظيفه :)

ههههههههه اي والله ... والي ما سمع شي من الحفله وما يدرب شقولون لوول :q

اذا تبين البوست كله اخذيه عليج بالعافيه :q

مشكوره :)

شاي الضحى يقول...

ابتسامه

الله يبارك فيييج :)

مشكوره :>

Hope يقول...

الف مبروك
عاد كل اللي اعرفهم ما كانو بيروحون
بس رايحين حق يونسون اهلهم
بس صج صج.. مو عقب الحفله حسيتي انج خلاص صج تخرجتي ؟

شاي الضحى يقول...

هوب

الله يبارك فيج :)

اي لان الحفله مليقه

لااااا انا تخرجت من زمان مو عقب حفلتهم هههههه :q


مشكوره :>

دمعة المقهور يقول...

الف مبرووووووك

ومنها للأعلى انشاء الله

اختي العروس مع ريلها معاكم بالتخرج
وانا كنت موجودة واستانسنا

:)

Hashimoto يقول...

نايس .. مبروك عالحفلة المتأخرة

بس والله سويتي اكشن فيها !
P=

بالتوفيق انشالله بحياتج العملية
=)

daloo3a يقول...

مبرووووووووووووك واااااااااااااايد ^^ و عقبال الوظيفه =)

و اهم شي صورتي ويا الشيخ ^^

شاي الضحى يقول...

دمعة المقهور

الله يبارك فيج

ومبرووووك لاختج (التخرج والعرس)

مشكوره :)

شاي الضحى يقول...

هاشم

الله يبارك فيك والفال لك يارب :)

لووووول انا كل مكان اروح له لازم اسوي اكشن واعفس الدنيا :q


مشكور :)

شاي الضحى يقول...

دلووعه

الله يبارك فيج واااااايد :q

والفال لج يارب

آمين

اي اهم شي ما طلعت فاضيه ههههههههههه


مشكوره :)

Sami يقول...

اعتذر على الكلمه ...كنت منفعل زياده عن اللزوم ..ما كان مفروض اوصفهم هالوصف العنصري

الله يوفقج و يبارك فيج :)

chandal/danchal!! يقول...

بالمبارك التخرج ولو انها متأخرة

:)


زين اللي عطوج الشهادة شمتوقعة غيرها؟


تصدقين يا شاي... امي كانت اول دفعة بجامعة الكويت وبالتخرج عطوها خاتم سوليتير... قبل كانوا شوية الحين شبيلحقون عليه!

شاي الضحى يقول...

سامي

اجمعين يارب :)

مشكور

وحياك الله اخوي

شاي الضحى يقول...

جندل

الله يبارك فيج :)

اي والله ما يلحقون

السنه الي طافت كليتنه عطوهم اقلام هههههههههه

وفي كليات عطوهم ميداليات عليهم اسم الكليه يونس شكلها

الله يخلي لج امج ويطول بعمرها

مشكوره :)

5/4 يقول...

أمبله بس بكمل مسائي بوحده من الجامعات الخاصة :]

Frankom يقول...

مبروووووووووووووووووك
:)

شاي الضحى يقول...

5/4

اها

والله زين تسوين .. الله يوفقج :)

شاي الضحى يقول...

فرانكوم

الله يبارك فييييييييييييييييييك :)


مشكور

Makintosh يقول...

انا مو الخريجات بالحفله :))
بس ماشاءالله طالعه بخوش صور مع شخصيات لوول اما ما طلعت الا بصوره مع دكتور عندنا
بس كان وايد ونااااسه

مبروك

شاي الضحى يقول...

ماكينتوش

اي عاد ما كان ببالي اصور مع احد بس كل شي صار صدفه

وما صورت مع ولا دكتور مصوره معاهم من قبل هههههه وهالمره الدكتور الي ياي انا مو ذاك الزود معاه فما اهتميت

الله يبارك فيج

وانتي بعد الف مبروك :)