الأحد، 7 مارس، 2010

الخطوط الوطنية

على كثر ما سمعنه عن الخطوط الوطنية قررنه انا وعائلتي الكريمه ان نسافر عليها

وبهالبوست بتكلم عن تجربتي الأولى لهذه الشركة

في البدايه تم الحجز عن طريق موقع الشركة

دزولي ايميل ان الحجز اوكي وكل شي كان تمام

اول ما وصلنه المطار انصدمنه ندري انه صغير بس مو لي هالدرجه

كنه واصلين قبل طيارتنه بساعتين

شحنه جناطنه وقعدنه ننطر ماكو شي نسويه ملينه

المطار مافيه الا ستاربكس يضيق الخلق وذات السلاسل

وفي دور ثاني اتوقع فيه ستاربكس ومكان نقعد فيه بس ما صعدنه

ولما صار وقت الطياره اول نقطه لاحظناها ان الأمن بالمطار ماكان قوي

دشينه الطياره بالموعد المحدد

والصراحه معطين الطياره اكبر من حجمها واهيا حييييييل عااااااااديه حتى الدرجه الأولى مافيها زود

وطارت الطياره بالموعد المحدد

ستاف الطياره ماكانوا وايد فرندلي

ولما قدموا وجبة الريوق (أكرر الريوق) كان فيه اختيارين

1- كيش (بيض)

2- جبدة دياي (من صباح الله خير)

انزين الي نفس حالتنه ما ياكل لا بيض ولا جبدة دياي شسوي؟

المفروض كنه يايبين اكلنه معانه

وصلنه دبي بالسلامه

وهذي كانت تفاصيل الروحه

لما ردينه

الرحلة كان عليها تأخير دقايق بسيطه فكان عادي مو وايد

لما ركبنه الستاف كانوا غير بس نفس الشي "ماكانوا فرندلي"

طيارة الساعة 11 بليل العشاء كان

1- برياني دياي

2- سمج

ونفس السالفه احنه ما ناكل لا الأول ولا الثاني

بس هالمره صرنه أذكيه ويبنه حلاونه من كاندي ليشوز وتعشينه فيه ههههه

وصلنه الكويت بلاسلامه وما كان فيه تأخير وايد

وليلحين كل شي اوكي

ختمنه جوازاتنه وطلعنه واهني الصدمه

سير الحقائب كان في بس "2"

واحد مسكر

والثاني كل الطيارات الي واصله بنفس الوقت من مختلف الوجهات على هالسير

فتخيلوا شلون صارت العفسه

ولما سألناهم ليش الأول مسكر؟

قالولنه ان الاول بس للدرجة الأولى

خلف الله علينه عيال الفقاره مبهذلينه بسير واحد

وخذينه قشنه وطلعنه

وما افكر اسافر فيها مره ثانيه الا اذا كنت مضطره او مو لاقيه حجز

وعلى أسعارها المفروض تكون احلى من جذي بوااااااايد

توقعناها شي طلعت مووو شي

ويليت يعدلون ستافهم (المضيفين والمضيفات) ويعطونهم دورات شلون يتعاملون مع الناس

الصراحه السفر بأي طيران بمطار الكويت وايد اونس

تحسون صج مطار وصج مسافرين

وما صورت ولا شي من المطار ولا الطياره لانهم يضيقون الخلق وايبون القامت

وبعدين وين البنفسجي الي قالوا عنه داخل الطياره يريح الأعصاب؟!!!

خط واحد فوق بنفسجي يشب بس ! والكراسي رماديه

نقطه وحده تنحسب للشركة ان المسافه بين الكرسي والكرسي الي جدامكم وسيعه نوعا ما

فتعطيكم مجال انكم تمدون ريولكم وبنفس الوقت اذا حاطين اغراض تحت عند ريولكم ما تضايقكم

وتكونون مرتاحين طول الرحله

وفي شغله يليت الشركة تعيد النظر فيها

ان الشركه تجبر الشخص ان يسافر ويرد بيوم ثاني

يعني الي يبي يروح الصبح ويرد بليل بنفس اليوم ما يقدر لازم ينام ليله!!!

مو نفس بعض الشركات الي تقدر تسافر الصبح وترد بنفس اليوم بليل


وهذي تجربتنه مع الخطوط الوطنيه

نقيمها 5/10

بكل سرور

هناك 34 تعليقًا:

رورو الشخبوطه يقول...

السلام..

وبعد فيها عيب عروضها ع المزاج عرض البيرث دي ساعه تحصلينه و 10 ساعات لا :\

ياتسون عروض مثل الاوام ياماله داعي..

اكره شي لما يكون الشي بمنه..

وبعدين العشا مايناسب النباتين بعد :\

ومرسي..

{~المباركية~} يقول...

افضل خطوط للسفرات القصيره هي طيران الجزيره

لكن لديهم الوجبات تباع بسعر عالي وهذه احد السلبيات

و من افضل الخطوط لدي هي الاماراتيه

و توه فتحوا خطوط يديده اسمها فلاي امارات

chandal/danchal!! يقول...

الحمدلله على السلامة شاي

:)

صديقتي قالت نفس الكلام عن الستاف... كانوا ودرين

بس شموديل الجبدة من الصبح... عممال!

شاي الضحى يقول...

رورو

اي اذكر لما كنت ادور معاج مره يطلع ومره يختفي متحسفين عليه

عدل كلامج المفروض يحسبون حسابهم وان في ناس ما ياكلون اي نوع من انواع اللحوم او المنتجات الحيوانيه

حياج الله :>

شاي الضحى يقول...

المباركيه

بالضبط .. جم مره رحت على الجزيره كانت مريحه وتقزوره للمسافات القصيره واسعارها مناسبه

وبالنسبه للوجبات في الجزيره ما اذكر اني طلبت يمكن بس قهوه او عصير

الاماراتيه لا يعلى عليها

اسمها فلاي دبي مو امارات

بس فيها عيب ان موعد الطياره بس الصبح يعني تروح الصبح وترد الصبح يضيع يوم على الفاضي واسعارها جدا مناسبه

شكرا :>

شاي الضحى يقول...

جندل

الله يسلمج حبيبتي :)

اي مادري ليش معاملتهم سيئه .. هم انا سامعه من وحده قالت عن الستاف نفس الكلام

والمفروض يعدلون هالشي لان مو من صالحهم

ههههههه حتى العمال ما يبون جبدة من الصبح :q

حياج الله :>

DoDoq8 يقول...

على دعاياتهم الواحد يتوقع شي غيييير!

زين انج قلتي

وصاجه اسعارها وايد مبالغ فيها شدعوه

شاي الضحى يقول...

دودو

احنا بعد شفنه الدعايات الوخبه والمقابلات يتكلمون عنها توقعناها وايد حلوه :(

اي صح المفروض تكون ارخص لان خدماتها عاديه مافيها زود حالها حال باجي الخطوط مادري ليش رافعين اسعارهم


شكرا :>

Five / Four يقول...

ولا خطوط جوية عاجبتني من جذي ما سافرت :P

تدرين أنا ما طلعت من الديره كلش؟؟

ينيي أسافر

حدي عيووز

أشوه بس انكم رديتو بالسلامة الحمدالله
و 2- جبدة دياي (من صباح الله خير)

حدها إبداع, عبالهم الأوادم وحوش

كوكتيل يقول...

هلا حياتي
أولا حمد لله على السلامة :)

ثنيا حلو البوست وايد مفيد

لأن كنت أفكر أحط هالخطوط من ضمن

قائمتى في السفر وأجربها بس زين علمتينا

أنا أحلى شيء عندي في السفر وناسة المطار وجوه وايد حلو ومن أحط ريلي فيه تبلش المتعة

فزين عرفنا إن المطار هذا مو حلو عشان ما نروحه

وأنا أفضل طيران الجزيرة إلتزام بالمواعيد وكراسي مريحة

بس أخر مره سافرت فيه طشرونا كل وحده بصوب جنه متهاوشين :(

بس هل مشكلة تنحل إذا إنت إخترتي مقاعدك وإنت تحجزين بالنت ومره إختي سوت جذي فوايد أحسن وإذا على الأكل عادي ناخذه من المطار ياكثر مطاعمهم

بصراحة وايد أحبة

جني سولفت وايد ؟

يعطيك العافية حياتي وبإنتظار جديدك :)

mazyona يقول...

هلا شاي الضحى
صج شكلها موشيء
مشكورة على المعلومة علشان ما أفكر أجربها

*Being One يقول...

حمدالله على السلامه
الصراحه اول مره اسمع عنهم اشوه عطيتينا فكره عنهم عشان نعرف مره ثانيه :)
مشكوووره

شاي الضحى يقول...

5/4

صج؟ ليش يعني تخافين من الطياره ولا شنو؟

انا احب السفر لو بيدي جان على طول مسافره

هههههه اي والله وحوش او باجي العشا :q

شكرا :>

شاي الضحى يقول...

كوكتيل

الله يسلمج :>

لا جربيه يمكن يعجبج

مطار الكويت يونس وفيه مطاعم ومحلات هذا يضيق الخلق

عدل بالنت تحجزين الكراسي وتقعدون يم بعض احسن من التطشر

الوطنيه كراسيهم اريح من الجزيره بس انا افضل الجزيره

عادي اخذي راحتج :)


الله يعافيج


مشكوره :>

شاي الضحى يقول...

مزيونه

انا ما اعجبتني لأسباب كتبتها بالبوست

:)

شاي الضحى يقول...

Being

الله يسلمج :)

غريبه مو سامعه عنهم من قبل مع ان اعلاناتهم بكل مكان

العفو

حياج الله :>

ميمة السبيت يقول...

** زين قلتيلنا عشان اذا بنسافر عليها احسب حسابي 10 بطاط وبيديان ولا بدينار جباتي و جبن قلاصات

حمدالله عالسلامة

شاي الضحى يقول...

ميمه

ههههههههههه :q

الله يسلمج

مشكوره :>

ba6alah يقول...

y3ny Al wataniya wela Al Jazeera?! :p

شاي الضحى يقول...

بطالي

الجزيره :)

Sn3a يقول...

وييه مو شي عيل
انا صراحه احب الجزيره وان شاءالله بجرب فلاي دبي

شاي الضحى يقول...

سنعه

فلاي دبي ما حبيت وقتها

بس شكلها زينه :)

كاريكاتير يقول...

خلاص لا تزعلين الحين اتصل في مسؤول كبير بالوطنية يعدل لج وجبات الاكل

تبين مندي ولا تبين باجه كراعين حق الغدا :)

شاي الضحى يقول...

كاريكاتير

السالفه مو بس سالفة اكل

دامك بتدق عليهم عيل اطرش لك المنيو الي ابيه :q

وقولهم يعدلون ستافهم


شكرا :>

Frankom يقول...

ألحمدلله على السلامة
:)

Made n Q8 يقول...

والله ماادري عنهم ماعمري جربتهم بس الناس وايد تمدحهم..وانا اخاف من مدح الناس الزايد عن حده!

شاي الضحى يقول...

فرانكوم

الله يسلمك

مشكور :)

شاي الضحى يقول...

ميد

وايد امدحوها وعطوها اكبر من حجمها

:)

أحمد الحيدر يقول...

ممممممممممم بصراحة من الاول أشوف ما عندهم شي زود ..

يعني طيران عادي حاله ححال أي طيران بس الفرق إن مطارهم يضيع لأنه بروح ..

والتقييم ثري ومفيد وإذا صج اهم شغالين صح المفروض يلتفتون لمثل هالموضوعات ..

تحياتي ..

شاي الضحى يقول...

أحمد

على اعلاناتهم والكلام الي قالوه عن طيرانهم والله توقعت انها بتكون غير عن الباجي بس للأسف طلع توقعي مو بمحله

اهما حاطين لافتات حق مطارهم ويكون ورا مطار الكويت ويضيع ان احنا مو متعودين عليه

اتمنى ...

شكرا اخوي :>

ZooZ "3grbgr" يقول...

ممممم

الكل تقريبا موافق على البوست

يصير اعارض؟؟ ههههه

لازم استأذن معارضتي ذرررربه

:")


الخطوط الوطنية

شقول شخلي

وايد حبيتها

مع اني صعب ارضى بشي

بس حسيت اني لازم اقول كلمة حق هني

راح يكون ردي على شكل نقاط

واذا تقولين اشتغل معاهم او حتى اعرف احد منهم اقولج لا والله انا بشركة استثمار مالي شغل فيهم ولا يصيرلي احد منهم

موقع المطار بعيد نوعا ما على اللي اول مره يروحله ويضيع اذا رايحله مستعيل بس لي دليتيه تكتشفين ان طريجه فاضي وما تنطرين عند الباب حتى بعز الزحمه مو مثل المطار العادي اللي ممكن يروّح عليج الطيارة

مافيه شي يونس صح .. لا تروحين مبجر واكيد مع الوقت بيسوون فيه شي بس عندي رحمه اني اسافر وارد بدون زحمه بالروحه وبالرده وزقاير وازعاج ومطاعم ومحلات كلهم بنفس مكان دشتي طلعتي انا وجناطي وتعالي حصلي مصفط

انا حاولت استرجع نقطة الامن بالمطار ما لاحظت عليه شي فما فهمت هالنقطه بس خفة الزحمه تخليهم يركبونا الطياره مبجر ونخلص كل شي مبجر ماكو تأخير الا ناااادر

الطياره عاديه حرام عليج هههههه اذا تقارنينها بالقطريه ولا الامارات اي بس لي قارنتيها بالكويتيه ماكو مقارنه طيارات يديده وواسعه وهاديه ومافيها حنه ولا ريحه



انا معاج بشغلتين

الاكل مو ذاك الزود اول مره سافرت عليها حطولنا بيض مفيوح بدون قشر فاول ما قصيتها نزل منها ماي لاعت جبدي والشغلة الثانيه الستاف بعضهم ما يبتسمون طول الرحلة


بالنسبة للاكل ترى باي طيران اذا تبين اكل سبيشل تطلبين واعتقد شفتيه بالوبسايت لما حجزتي حتى لو تبين فيجيتيريان مثل ما نسوي انا والوالده بأي سفره

اما سير الجناط ممممممم عمره ما يصير زحمه الحين ليش.. لان الوطنيه عندها بس 7 طيارات ماكو غيرهم ومو معقول كلهم بيطبون بنفس الوقت وماكو طيران ثاني ينزل هناك فالموضوع اكيد لازم يكون فيه شوية تمييز للدرجة الاولى ولا شرايج؟؟

اخر شي على السفر والردة بنفس اليوم

كانت اخر رحلة لي للبحرين حضرت مؤتمر

سافرت 7.30 الصبح

رديت 11.30 بالليل

انا انا محد قالي




تقييمي للوطنية 8.5/10

ولما ابي اسافر صدقيني اول ما ادور معاهم حتى لو في فرق سعر بس عاد مو جايد

لاني من زماااااااان حاربت الكويتيه

لان طيارينهم خوش طيارين

بس طياراتهم قرمبع



في شغله يمكن ما لاحظتيها

الميوزك اللي يشغلونها اول ما تركبين واول ما تنزلين ترتبط بذاكرتج بدون ما تحسين بالرحله .. تبين تتأكدين .. دقي على 118 وسمعي قبل ما يشيلونه نفس الميوزك انا حفظتها من كثر ما سافرت عليها لوووول

وسامحيني على الطوالة صج صج صار جاي ضحى شكلج بعد تعليقي بتحسبين تكلفة التعليق بالمتر ههههه

وبس

:")

شاي الضحى يقول...

ZooZ

اخذي راحتج ومن حقج تعارضين او تأيدين :)

بالنسبه لموقع المطار اكيد اول مره ماراح ندله ... بس اهما حاطين لافتات بكل مكان وهالشي ما يخلينه نضيع

بس يظل مطار الكويت اونس ... لو مطار الوطنيه يعدلونه بالايام اليايه ويفتحون فيه كافيهات اكثر ومحلات يصير اونس

امبله في شغله بالأمن بس اتوقع انها صادفتنه ويمكن تكررت

يمكن انتي تسافرين ما يكون زحمه بالطياره ... الي عجبني فيها انها وسيعه فقط لا غير

استغفر الله انا ما احب البيض وني بعد !

لا مو بعض الستاف كلهم وهذا الي شفته بالروحه وبالرده وكله منفسين

لما ردينه كان في طيارتين واصلين من دبي والثانيه مادري من وين بس صاير لويه!!! مع ان الطيارتين مو زحمه

يعني لو بالصيف او وقت العطل اكيد بيصير ازحم من جذي .. اكيد يميزون الدرجه الاولى وهذا شي ما نختلف عليه بس ماكان في الا 2 والباجي كلهم بسير!

من قبل جم شهر واحنا نحاول نحجز ليوم واحد بس ما يصير لما نحط يومين يصير! ويطلع لنه ان في غلط بالتاريخ ولازم نخليه ليوم ثاني

مو ذاكره الموسيقى

ههههههههه لا ماراح احسب شي اخذي راحتج وقولي الي تبينه سواء كنتي مع او ضد ويشرفني تواجدج :)

حياج الله :>

غير معرف يقول...

صج كويتيه

حمدالله والشكر لازم تتحلطمين.. ومادري ليش يعني طاقه النفسيه وصاعده الطياره على انج ناقده.. مادري شكله عاجبتج الكويتيه صح؟

وبعدين شنو في بني ادم ماياكل بيض؟ ولا تبينهم يفتحون لج بوفيه علشان حضرتج؟

لووووووووول واهم شي اهم شي انج ماتاكلين برياني
اقص لج ايدي من هني لي هني.. ماقول الا الله يعينج على نفسج والله

كويتيه بطينيه والله تاكلين ما وراج ودونج مصيبه صابتج

شاي الضحى يقول...

غير معرف

اي الحمدلله كويتيه :)

والف الحمدلله والشكر على الصحه والعافيه

والبوست مضايقك بشنو؟ وشنو الي حارك يعني؟ اركب الطيران الي ابيه واقول رايي بالي يعجبني والي ما يعجبني ولا ممنوع؟!

اي في ناس ما ياكلون بيض .. احنا ما ناكل بيض ! ولا برياني شفيها يعني؟

اذا انت تمشي وتاكل هذا شي ثاني مو كل الناس نفسك

لاوالله انت الي الله يعينك على اسلوبك

ومصيبة تصيب "العدوووو"

واذا عندك اسلوب احسن من جذي علق


شكرا على كلامك الطيب