الجمعة، 5 فبراير، 2010

أول رفيجه..!

تصدقون توني اكتشف ان اول رفيجه لي بأي مرحله دراسيه يصير معاها موقف غبي او يضحك

بالروضه سالفة لبنى اذا تذكرونها

وبالابتدائي حنان لما طارت يدتها

والي ما يذكر او ما قراهم
يضغط هنا

بالمتوسط ماكو صديقه يديده لاني كنت بمدرسه مشتركه فرفيجاتي كانوا نفسهم الي بالابتدائي

بالمرحله الثانويه كنت بثانويه مو بنفس المنطقه الي درست فيها

فكانوا صديقات يدد

اول صديقه الله يذكرها بالخير كانت جنها عيوزه وسوالفها مثل العيايز تونس

المواقف الي تضحك معاها وايد بس انا بقولكم سالفه اهيا قالتها لي

صادف بنفس السنه كانت بتسافر لـجنوب أفريقيا

واهيا اول مره بحياتها تسافر دوله غير الدول الخليجيه كانت كله تروح السعوديه او الامارات

وامها وابوها كبار بالسن وهالمره بتسافر مع خالتها

قرب وقت السفر زهبت اغراضها والبنيه حبت تأمن على نفسها وتاخذ احتياطاتها

الله يسلمكم ترست جنطتها عصير KDD كل الأنواع !!!

لي درجة ان ما كان في مكان حق اغراضها وهدومها فحطت شويه بس

ومحد عرف بالسالفه وسافروا

اول ما اوصلوا انصدمت !!!

لانها اول ما اسمعت جنوب أفريقيا قالت اكيد غابه ماكو اكل والناس لابسين اوراق الشجر !

توهقت بالعصير .. فكرت شتسوي

اول ما اوصلوا الفندق بطلت الجنطه ويابت جيس كبير وحطت فيه كل العصير

ولما اطلعوا يتمشون .. يابت معاها الجيس وقامت توزع على الناس العصير !

وتقولهم هذا هديه يبتها معاي من الكويت حقكم !

لووووووووووول

خوش فكره :q

بالجامعه كانوا معاي بنات كنت اعرفهم من المتوسط ومن الثانوي

بس صادف المواد الي انا خذيتهم اهما مو معاي

تعرفت على وحده .. مره من المرات الدكتوره كانت معتذره

ووقتها كان عمري 17 ليلحين ما اسوق

فدقيت على امي وقاعده انطرها بالسيركل ورفيجتي كانت معاي

اول ما قعدنه دار هذا الحوار بينه

رفيجتي: ويـــنـــهـــم؟

انا: منو الي وينهم؟

رفيجتي: الي يقولون عنهم

انا: ؟؟ !!

رفيجتي: توني بطلت البلوتوث محد دزلي شي

انا: شناطره يعني؟

رفيجتي: قبل لا ادش الجامعه خالاتي وبناتهم كلهم قالولي بالجامعه راح تمر عليج مواقف وايد من هالسوالف وقالولي عن الي حبوا بعض ايام الجامعه وتزوجوا اغلبهم سوالف بلوتوث وغيره

انا (بيني وبين نفسي): ونعم الأهل

رفيجتي: عشان جذي انا بطلت البلوتوث بس محد دز لي شي، يالله ويييييينهم

انا: هههههههههههه

وتميت اسبوع كنت اشوفها بس وقت المحاظره لاني ما اقعد بالكليه

خاصه اول كورس لي بالجامعه الايام الي قعدت فيهم بالبيت اكثر من الجامعه كله مالي خلق لوول

بعدها اعتذرت الدكتوره بس انا كنت موصيه امي تييني مبجر لاني كنت ناويه اطنش

فقالت لي خلاص بوصلج بره قلت لها اوكي

بالطريج عرفت انها تعرفت على واحد بالبلوتوث كل يوم الساعه 10 الصبح يقعدون بالسيركل ويسولفون !

والحمدلله اني تخصصت بتخصص غير عنها فما قمت اشوفها الا نادرا وبينه بس سلام


اذا اشتغلت ان شاءالله تهقون بتعرف على وحده ويصير معاها موقف غبي؟


اتوقع هالمره انا الي بكون غبيه مادري ليش :q

هناك 34 تعليقًا:

LO NAN JO يقول...

هههههه ضحكتيني على سالفه العصير


ماشاء الله عليك انا مااتذكر اسامي المدارس باقي بتذكر البنات لوووووول


على فكره انا رحت للروضه يومين وبس ... مدري ليش بس اتذكر من هاليومين غبت يوم وبنت عمي جابت سلسال حلاوة ومرررررررره غرت منها ابي مثله

رورو الشخبوطه يقول...

السلام..

بما انه ذاكرتي قويه مثل ماتعرفين فما اتذكر سوالف البنات الغبيه :\

البنت الاولى بريئة ياحليلها ع نياتها ..

ال2 ماعندها سالفه البارع عسى بس تزوجها !!

ومرسي ..

سمو الأميرهـ ..ツ يقول...

بوووست حلو ..ظحكني ..
اممم
انا حليلي وحده قصت علي جان تاخذ دفتر التلوين مالي ..:(

كان عمري وقتها 5 سنين ..
ع أساس لو لونت فالدفتر بيسفروني فرنسا غصبا عني مب برضاي ..
ومن خووفي قمت عطيتها الدفتر :|
لووووووول

******

يعطييج العافيه ع البووست

شاي الضحى يقول...

lo nan jo

الحمدلله ليلحين ما فقدت الذاكره هههههه

رفيجتي نفسج راحت يومين لانها كانت تخاف

مشكوره :>

شاي الضحى يقول...

رورو

اي ما شاءالله :q

ههههههه لا ما تزوجها تزوجت عقب سنه خطبت اهل

حياج الله :>

شاي الضحى يقول...

سمو

هههههههههه جان رحتي فرنسا

بس ما قصت عليج انتي عطيتيها :q

الله يعافيج :)

Hope يقول...

لووووول
اهم شي سالهف العصير
يحليلها ضحكتني .. بس والله ذكيه عرفت شلون تصرفهم

بس امبي هاذي اللي بالجامعه مو صج
الله يستر عليها

شاي الضحى يقول...

هوب

اي زين فكرت احسن من انها تردهم :)

ويستر على الكل :)

Five / Four يقول...

لووووووووول على سالفة العصير حدها ضحكتني

وأم البلوتوث أحسها الحين عندها بلاك بيري ولازقه فيييييه لزقه ضحكتني

أي والله هذول الأهل, لو أنا جان أبوي بالشوزن ;P

أنا تصدقين ما ودي أحد معاي أعرفه بالشغل, وحده قالت لي إنتي فلانه اللي بثانوية فلانة؟

تخيلي إنصدمت فيها بإداراه ثانية

جان أشكره أقول لها

"لأ.. إنتي مشبهه علي"

أشــــــــــكــــــــــــــره

ما أدري إهيا منو بس خل تولي

شاي الضحى يقول...

5/4

لا ماعندها بلاك بيري تزوجت وعقلت :)

انا جذي مالي خلق الي كانوا معاي بالجامعه لاعت جبدي منهم الا جم وحده بس :)

لوووول دقرتيها :q

غير معرف يقول...

اى كلية؟:)

المشكلة ليش الفضايح دوري على حب بلوتوثي سكيتي ليش الاولي والتالي يدري :P

Engineer A يقول...

لوووووول


المواقف مو صج !!


الله يستر من الياي :) يعطيج العافية

she is me يقول...

هههههههههههه

إن شاء الله يا رب تتوظفين بالوظيفة الي تبينها وتصير لج مواقف حلوة .. عشان تتذكرينها بعدين وتضحكين ^^

sarona يقول...

لووول احلى شي العصير

و عالسالفة الثانية الله يستر عليها بس

^_^

mazyona يقول...

هههههههههههههههههههه
لكل مرحلة عمرية مواقف وصداقات مختلفة
والحياة مليانة تجارب منها الحلو ومنها المر
ما تدرين شنو خاش لج القدر
تسلمين

daloo3a يقول...

ههههههههههه حلوه هاي لابس أهل افريقيا

صح يعني كانوا جيه بس مب لين احين عاد يعني اطوروا شوي خخخخخخخخ

بس هاي ربيعتج اللي فالجامعه عجيبه الصراحه هع

شاي الضحى يقول...

غير معرف

وحده من الكليات الي مافي احسن منها بالديره :q

يمكن شي عادي بالنسببه للبعض!

شاي الضحى يقول...

ENG

الله يعافيج

مشكوره :)

شاي الضحى يقول...

she

يارب الله يسمع منج :)

مشكوره

شاي الضحى يقول...

سارونه

بدعت مع سالفة العصير يحليلها :)

ويستر على الجميع

شاي الضحى يقول...

مزيونه

صح كلامج ... مرت مواقف وايد خاصه مواقف الابتدائي كل ما اتذكر السوالف الي تصير اقعد اضحك على البراءه والغباء

الله يسلمج :)


شكرا

شاي الضحى يقول...

دلوووعه

اهيا تسمع افريقيا عبالها غابه ومجاعه متأثره بماوكلي ههههههه

لا مو شوي واااايد بالنسبه لتفكيرها هههههههه

شكرا :>

lil.D يقول...

looooooool I love south Africa Issue
lool this is the best ever and she is so smart mashallah

Giggles~ Girl I love your posts

ba6alah يقول...

looool

شاي الضحى يقول...

lil

اي يحليلها ضحكتني على حركتها بس الي يضحك اكثر انها ما فكرت تييب اكل بس اهم شي العصير :)

شكرا :)

شاي الضحى يقول...

بطاله

دووم :)

مـي يقول...

أبيه هذي من صجها؟؟!!

الحمد لله والشكر!!

شاي الضحى يقول...

مي

الحمدلله والشكر على الصحه والعافيه:)

أميـــــره يقول...

ههههههههههه


سوالف حلوه و الله ..

شاي الضحى يقول...

أميره

انتي الحلوه :)

bashart يقول...

انا أول صداقاتي لازم يكون الإنطباع الأول بينا زفت ككككك
و شوي شوي نكتشف بعض و بعدين نعترف حق بعض لون كنا حاقدين على بعض P:
, نضحككك

سالفة عصير كي دي دي عجيبة XD
بس شموديها مناك ؟!!

شاي الضحى يقول...

بشاير

اي لازم اولها يكون في انطباع غريب

بعدها تاخذون على بعض وتضحكون على الي كان يصير بينكم :)

رايحين سياحه

حياج الله :>

رؤى يقول...

ههههههههههه

أوووومااا سالفة العصييير توووحفة!!

واللي بالجامعة الله يستر عليها ان شاء الله ..

ودي وعبير ردي!!

شاي الضحى يقول...

رؤى

يحليلها بدعت مع العصير

ويستر على الجميع :)

حياج الله :>