الثلاثاء، 23 فبراير، 2010

الهنود مو أحسن مني!

اليوم الظهر كنت بطلع مع امي عندنه جم شغله لازم نخلصها والجو مثل ما انتوا عارفين كان مغبر

عقب ما خذيت الكمام وريحت طلعنه

بس قبل لا نطلع امي قالتلي لحظه الهنود مو احسن منج!!!

جان تروح وتييبلي كمام البسه ههههههههههه

وكشخت فيه وركبت السياره ولا في واحد مار بسيارته يطالعني ويضحك

المهم ما كنت عارفه اي جهه فوق وأي جهه تحت لبسته وبس

اول ما ركبت قطيته وامي تقولي ليش قطيتيه خليه

قلت لها يعني بسوق وانا لابسته؟!!!


وطول الطريج اشوف الهنود شلون لابسينه عشان اعرف اي جهه فوق

لما عرفت هههههه

المهم ليش الهنود والأجانب يلبسون الكمامات ومحد يضحك عليهم .. واحنا اذا لبسناه الكل يطالعنه ويضحك علينه؟!

هناك 34 تعليقًا:

{~المباركية~} يقول...

عبالهم ان الانسان الكويتي ضد لغبار و الاتربه

زين تسوين غبارنا مايغشمر

نمووول يقول...

لان تعودنا نشوف الهنود والاسيويين بشكل عام يلبسونه بس ما تعودنا على ربعنا يلبسونه بعدين يمكن نشوف واحد لابسه نعتقد انه يشتغل بمكان يحتاجه فيه بس الكويت شحقة لابسة لاهو يسلك بواليع اجلكم الله ولاهو يخلط سمنت ..

بس والله يعجبوني احس انهم يخافون على نفسهم وصحتهم وحريصين مو نفسنا ..

عفية علي :)
عسى عرفتي شلون ينلبس ؟

aL-NooR . يقول...

زين تسوين
الزم ما عليج نفسج
و سلميلي على الماما :)


صبحج الله بالخير و ان شاء الله الغبار ينزل مع و يصفى الجو .. لان جذي انا اتعب والله :(

**********************

AuThoress يقول...

يضحكون لأننا مجتمع متخلّف .. يضحكون إذا شلنا شمسية بالمطر ! وإذا لبسنا كمام بالغبار ! يا حبيبتي .. اعملي ما يريحك ويحفظ جسدك من الأذى.. ولا تعيري الناس اهتماما كبيرا ، صدقيني كلهم ودهم يلبسون كمام ومستحيــن

Goalzalez يقول...

سلامات

رعنا يضحكون (انا واحد منهم) لان الكل تعود على الغبار و صار الغبار امر طبيعي ما يحتاجله وقايه و حتى الهنود عقب جم سنه من العيشه هني يقطون الكمام لان جسمهم خذا على الموضوع.

NOIR يقول...

اي و الله صااااااجه
انا اليوم petit tierd
من هالغبار
اتصدقين! ترى حتى احنا لو انسافر بره نلبسه بس يمكن نستحي من تعليقات الاوادم اهني

عاد انا بيني و بينج تلطمت بحجابي :))
الزم ما علي صحتي

ميمة السبيت يقول...

** انتي ماسمعتي الغنية اللي يقوول شعلية انا من الناس و شعلى الناس مني

jonoon 3aqel يقول...

الواحد الزم ما عليه صحته

وايد اشياء صح لما أحد يسويها ينضحك عليه لأننا ما تعودنا..

لكن هذا وقت..نبدأ نغير من تفكيرنا..
و نتقبل اي شي سويه الاخر دام هو مفيد..


دمتي بخير

Made n Q8 يقول...

اي والله على قوله امي هذول الي عارفين حق عمرهم مو احنا نمشي وفاجين حلوجنا :s

mazyona يقول...

يحليلج
ذكرتيني بجدي دوم لابس الكمامات

Ƒiona H. Al- Ƨharekh يقول...

اييييييي والله صاجه
زين تسوين

ومالج شغل من أحد

أهم شي صحتج

شاي الضحى يقول...

المباركيه

جان زين انا ضد الغبار

اي والله :(

شاي الضحى يقول...

نمووول

صح كلامك ... مع ان جونه كله مغبر المفروض نلبسه

وهم بعد لان اهما يمشون بالشارع بدون سيارات فيحتاجونه اكثر من الباجي بس الي نفس حالتي ما ينفع الا بالكمام

احنا كل شي عندنه فشله

اي عرفت ههههه :)

شاي الضحى يقول...

النور

الله يسلمج :)

امس قالوا بخف وليلحين مغبر

جونه يتعب حتى الي مافيه شي


وان شاءالله ماعليج الا العافيه :)

رورو الشخبوطه يقول...

مالج شغل فيهم الزم ماعليج صحتج وانا ماشوف انه لبس الكمام شي يضحك :\

والله يشفيج يارب..

Engineer A يقول...

هههههههه سؤال وجيهة بصراحة مادري ليش نضحك على نفسنا اذا لبسناه واذا اهم لبسوه عادي! :)

شاي الضحى يقول...

AuThorees

اي والله صدقتي حتى الشمسيه محد يشيلها بالكويت والسفر الكل يشيلها عادي

صح كلامج :)

شاي الضحى يقول...

Goalzalez

الله يسلمك

انا مو معاك بالي قلته ... الي ما يتأثرون بالغبار مافيهم ربو ... يعني احنا جسمنه مستحيل يتعود على الغبار حتى لو بعد 100 سنه لان فينه حساسيه ونتعب من الغبار

وانتوا تضحكون لانكم مو حاسين فينه

وحتى الناس الي مافيهم شي المفروض يلبسون كمامات لان الغبار مو زين يدخل بجسم الانسان

شاي الضحى يقول...

NOIR

سلامتج

اهني الناس ما يخلون احد بحاله وبره الكويت تسوين الي تبينه وانتي مرتاحه ولا احد دره عنج

زين سويتي :)

شاي الضحى يقول...

ميمه

امبله سمعتها ووايد يقولونها بس محد يطبقها الا نادر

شاي الضحى يقول...

جنون عاقل

اكيد

هذي المشكله انه ما تعودنه

:)

شاي الضحى يقول...

ميد

اي والله اهما يخافون على صحتهم لانهم ان استمرضوا ما يقدرون يشتغلون ووراهم عايله تنطرهم بديرتهم

شاي الضحى يقول...

مزيونه

زين يسوي يدج .. وايد اشوف شياب وعيايز يلبسونه :)

شاي الضحى يقول...

فيونه

ومافي احلى من الصحه والعافيه :)

شاي الضحى يقول...

رورو

جان زين كل الناس نفسج ... اغلب الناس بالكويت يشوفونه يضحك بس علينه طبعا


آمين .. مشكوره :)

شاي الضحى يقول...

ENG

يمكن قلة وعي؟ لان ماتعرفون آثاره على الصحه

بس الي فيهم ربو يحسون

المفروض حتى انتوا تستعملونه لان الغبار يأثر على الكل :)

Hanan يقول...

اي والله ما عليج منهم لبسي والله يكفينا شر هالغبار :)

شاي الضحى يقول...

حنان

هذا الي صار :)

آمين

Reem يقول...

لا بعد يطالعونج باستغراب جنه فيج شي غلط ويوصلونج بنظراتهم للمكان اللي تبينه "يعني مايشيلون عيونهم عنج ولاحتى رمشه" امم ناس فاضيه،انا الصراحه ماشوف اي شي يضحك فلبس الكمام،ما عليج منهم اهم شي صحتج.. مره ومرتين عقب يتعودون، الله يشافيج من هالربو

شاي الضحى يقول...

ريم

جنه اول مره يشوفون احد لابس كمام

لو امر انا ولابسه الكمام ويمي اسيوي او اي جنسيه ثانيه ما يطالعونه بيستغربون مني!

آمين

مشكوره :>

مبدعه يقول...

مو متعوووووووووودين يشوفون مواطن لابس كمامه

عشان كذا البسيه وعوديهم خخخخ

مودتي

شاي الضحى يقول...

مبدعه

ههههههههه يعني تهقين انا بروحي اقدر اعودهم؟

شكرا :)

Crazy Girl in aGood Way يقول...

زين تسوي ... اذكر الكويتيين البسو الكمام لما طلعت انفلونزا الخنازير :)

ومبروك مدونتج مرة ثانيه بجريده الوطن

تستاهلين حبيبتي .. وماتشوفين شر :)

شاي الضحى يقول...

كريزي

اي صح بس شويه الي البسوا

الله يبارك فيج مشكوره

الشر ماييج :*