السبت، 20 فبراير، 2010

Sonia Rykiel pour H&M

من قبل فتره سمعت ان H&M راح ينزلون كوليكشن من تصميم Sonia Rykiel

وكل مره لما ينزلون كوليكشنز من مصممين اروح وما احصل شي

الا اشياء تلوع الجبد

هالمره شفت نفنوفين اعجبوني وقلت لاااااااااااااازم اروح بنفس اليوم واخذهم

وبالبروشور مكتوب ان راح ينزل بـ 20 فبراير

وسمعت ان اول ما يفتح يكون زحمه وعفسه

قلت حتى لو دز مدازز بروح يعني بروح والا اخذ النفنوفين الي ابيهم

عاد انا مو زين يصير بخاطري شي ههههههههههه

وقبلها بجم يوم دشيت السايت وحفظت كل الاشياء الي عندهم

وعرفت شنو الي ابيه وشنو الي ما ابيه (جنه امتحان) هههههه

قعدت من الصبح ورحنه انا واختي وامي

وكان باقي ربع ساعه ويبطل امي قالت تبي قهوه رحنا ستاربكس

انا كنت يوعانه بس قلت مابي اكل لما اخلص اكل على راحتي

وقفنه نشوف المحل من بعيد ولا بنات وايد واقفين عند الباب وغير الصحافه والعفسه

وطبعا كعادتي في هذه المواقف الصعبه اسوي خطط لاني ام الخطط والدوابير ههههههههههه

والحمدلله اغلب خططي تنجح

جنه داشين حرب

والخطه درستها اختي قلت لها اول ما ندش انا اروح على طول عند النفنوف الأول

وانتي روحي عند الثاني واخذي قياسين مو واحد لان اذا بتخلينه وبعدين بتردينه ماراح تلقينه

عاد احنا طفارتنه الزحمه والتخمط واللويه بس هالمره قلت راح اقتحم ساحة المعركه

واصارع لاجل البقاء لا قصدي عشان النفنوف ههههههههههههه

وقلت حق اختي لا تقوليلي فشله ولا حركات عقد ولا هلاقه مالي شغل

اول ما وصلنه في ريال مع مرته دشوا معانه الريال اول ما شاف الوضع قال حق مرته دشي خمطي معاهم

اول ما دشينه الناس كانوا توووووهم داشين ماصارلهم نص دقيقه


جان انصدم @@

لاني شفت وحده حاطه السله تحت الطاوله وتخم كل الاكسسوارات الي بالطاوله وتحطهم بسلتها !!!

المشكله ان الاوادم كانوا كلهم سنعين يعني مو عقد بس تصرفاتهم اصدمتني

اول مره ادري انهم جذي لا ويعيبون على العقد والهلاقه

اليوم بينت الصوره هههههههههههه

طبعا اول ما شفت جذي جان اقول هجووووووووووم

السالفه صارت مخامط انا بصير نفسهم او اكثر منهم ههههههههه

بعد ما يصير كل مره ينزلون كوليكشن واحنا اخر من يعلم وينادون ربعهم!

جان اخذ سلتي وانطلق بجهة الغرب واختي بجهة الشرق

وعلى طول رحت حق النفنوف الي ابيه جان اخذ 2 كل واحد سايزه غير

جان تيي اختي وقالت ان النفنوف الثاني خلص !!!

توه المحل فاتح 5 دقايق خلص!

وكل وحده فينه قامت تحوس واي شي اشوفه احطه بالسله وساعات احط 2 كل واحد قياس غير

لان كلهم قاعدين يسوون جذي وكل وحده بيدها اقل شي سلتين متروسيييين

وفي وحده يايبه 7 سلال اهيا معاها وحده الموظفين قاموا يشيلون معاها

شوي ولا اشوف لويه عند واحد يشتغل ولا يايب من النفنوف الثاني الي خلص

اهوا لاعت جبده جان يقطهم عند المره الي تشتغل جان يضبون عليها الحريم والبنات

جان اروح وراهم وكلهم يبون سايز M او L ماكو خالص

قالت ماكو الا اخر واحد S والباجي كلهم XS

جان تيي مره وتاخذ السمول من الي تشتغل بسرعه عشان محد ياخذه واهيا كانت تبي لارج

وانا النفنوف حده بخاطري من زمااااااان قلت الا اخذه

جان اخمطه من ايدها وانحاش بين الحريم جني ما سويت شي هههههههههههههههههه


السالفه كلها مخامط كل وحده تير الهدوم من ايد الثانيه فليش ما اصير نفسهم؟

المهم خذيت كل الي ابيهم والي ما ابيهم وخذيت سكارفات وتيجان وبروشات

وترسنه السله انا واختي

بس اول مره اشوف بالكويت يصير جذي كله اشوف دول بره وقت السيل

وهم ولا مره تخيلت اني راح اكون منهم بس هالمره قلت لازم اخوض المعركه هههههه

المهم خلصنه بسرعه لاني مثل ما قلت لكم اول شي اني حافظه الدرس عدل

فدشينه نقايس قبل الزحمه

عقب 5 دقايق غرف القياس انترسوا

وامي بره كل شوي تييب لنه شي

وكل ما اطلع اوري امي الي لابسته انصدم اكثر

لاني قاعده اشوف بلاوي من بعض البنات والمشكله ان في رياييل يدشون مع ان ممنوع

واهما مو هامهم الي مبطله الباب والي تطلع بالفانيله تروح تييب شي وترد

والي يضحك واحنا داخل الغرفه نقيس اسمع بنات يقولون لا تقطين شي كل شي اخذيه

نجربهم كلنه والي ما نبيه نقطه او الي يشتغل ايي يقول حق وحده اذا ما تبين هذا ييبيه عندي

في وايد ينطرون ... الوضع كان عفسه عفسه عفسه

سوينه جرد انا واختي وخذينه الي نبيه والي ما نبيه حطيته بالسله ورحت عند الي تشتغل

قلت لها هذوله ما ابيهم ما مداني كملت كلمتي ولا ايوني بنتين يخمطون السله

وينبشون فيها حسيت الوضع جني رايحه لمجاعة افريقيا وماسكه سله فيها كيك وبيض (لا هذي مالت ليلى)

سله فيها اكل واهما يايين بياكلون

المهم رحنه حاسبنه بعد ما خذينه احلى شي موجود

وخذيت 3 نفانيف ومادري جم بلوزه وسكارف وبروشات وتاجين

والكوليكشين ربيعي


واول صورتين صورتهم بعد ما طلعت لما خفت الزحمه شوي

واعجبتني الزوليه الي عند الباب نفس الكوليكشن

عقب ما خلصنه رحنه نتريق ولما خلصنه بعد نص ساعه

مرينه صوب H&M جان اشوف شي ضحكني وايد

الي يشتغلون كانوا لابسين وكاشخين من كوليكشين سونيا بس البنات ما خلوهم بحالهم

وحده يت وتلت السكارف الي لابسته الي تشتغل وخذته منها هههههههه

وبعدها قطوا الهدوم وخذوهم البنات

واختي قالت تبي تدش مره ثانيه لان رفيجتها موصيتها تشوف اذا في شي حلو او لا عشان تيي

لما دشينه ولا الارفف والاستاندات فضت ويابوا الهدوم القديمه وحطوهم مكان سونيا

والاشياء الي بقت تلوع الجبد

عاد شفت دلاغ عجبني وخذيته نفس البلوزه والنفنوف ههههههههه

ما شاءالله خلصوا بساعه بس من اول ما فتح

والي وصلوا على الساعه 11 ما حصلوا شي

هم في شي ضحكني في بنات يايين شعورهم مدهنه وهدومهم معفسه وشكلهم قاموا من النوم ويو ركض

وفي جم وحده يايين شكلهم تعبانين طلعوا مواصلين مو نايمين ليلحين لما خلصوا قالوا بنرد انام ههههههه

يحليلنه جنه اول مره نشوف هدوم او الي يشوفنه يقول مفصخين ماعندهم هدوم

لوووول

والحمدلله بالنهايه خذيت كل الي بخاطري

والأهم ان خطتي انجحت وكسبت المعركه ههههههههههه

كل هذا في سبيل النفانيف :q

الي شروا عليهم بالعافيه

هارد لك للي ما حصلوا شي

هناك 42 تعليقًا:

Frankom يقول...

شدعوة كل هذا !!! مو من زين هالمحل
عنده أشياء تسوى بس مو مخامط

رورو الشخبوطه يقول...

خخخخ جايونه ..

مابي اعلق انتي عارف رايي..

بس اهم شي حصلتي الل تبينه وطلعتي صاغ سليم..

وملبوس العافيه يارب..

وتتهنين فيهم ان شاءالله..

Engineer A يقول...

لووووووووووووول


كل هذا يصير بالكويت؟!! اوه لا لا ! :))

والله عساني ماخذيته ولا هالذبحة واللوية ، انتي لو فاكه عمرج وطالبته بالانترنت ابرك من هالمعركة :/


أهم شي ان خططج ماراحت على الفاضي وكسبتي المعركة وحصلتي كل اللي تبينه :)

تقطعينهم بالعافية :::)

Hope يقول...

OMG !!!!
ماصدقO.o !!
كل هذا يصير بالكويت
مو قادره اتخيل الوضع،احس حده مو لايق ..
شدعوه .. عاد يسوى؟

chandal/danchal!! يقول...

لوووووووووووووووول


ذكرتيني بالضفادع البشرية... احس بس يبيلكم تصبغون ويوهكم جيشي وتدشون المعركة!


يعطيج العافية على النقل الحي وملبوس العافية

:)

شاي الضحى يقول...

فرانكوم

واكثر بعد

لو تشوف شلون يخمطون ههههههه

بس تصدق وناسه :q

شاي الضحى يقول...

رورو

لا لاتعلقين ... باجي السوالف بيني وبينج هههههههههههه

اي هذا اهم شي

الله يعافيج

مشكوره :>

شاي الضحى يقول...

ENG

اي اي كل شي يصير عندنه :)

لا ليش افك عمري ما يصير كل شي مخصص حق فئه معينه من الناس

اي مو قلت لكم انا ام الخطط والدوابير :q

الله يعافيج :>

شاي الضحى يقول...

هوب

شوفي الاجانب وقت السيل شلون يخمطون جذي الوضع

والله الصراحه يسوى واااايد حلو :>

شاي الضحى يقول...

جندل

همممممم ما اعرفهم !

وين شايفتهم؟

اي كان المفروض كل وحده تلبس لبس الجيش وتمسك بيدها سلاح

الله يعافيج :>

chandal/danchal!! يقول...

الضفادع البشرية (القوة الضاربه تحت الماء)

وتتميز هذه الوحدات بالجاهزية ( 24 ساعة × 7 ايام )
والروح الهجومية العالية
وارتفاع مستوي تدربيها القتالي والتقني
وامكانية نقلها عن طريق البحر والجو
وقدرتها علي الاستنفار والاستعداد لتفيذ المهام خلال 6 ساعات

الامر الذي يضعها في طليعة القوات الخاصة ؛ ويدفع القيادة الي اعتبارها رأس الحربة في عمليات التدخل الخارجي ومد القوة وراء البحار

chandal/danchal!! يقول...

it was just a mere joke, dont get me wrong dear

:)

شاي الضحى يقول...

جندل

كل هذا يطلع من الضفادع البشريه؟

وينهم عن اسرائيل ههههههههه :q

ما يصير نستنسخ منهم؟

واخذي راحتج حبيبتي :*

Super Sara يقول...

اهاااا
السالفة طلعت جذيييي !!
و انا اقووول ليش كل ما ادخل ما القى شي حلو .. او ذرب
الا بعد جهد جهيد .!! لان كل شي مخلص سلفاً @@

شوقتيني اشوف هالنفنوفيين :9
تتهنين فيهم انشالله :)

تحية

:

mazyona يقول...

كل هذا علشان نفنوف وملابس
ما يسوى عليكم

شاي الضحى يقول...

سوبر ساره

اي ينادون ربعهم اول ياخذون الزين ويخلون الي طايح بجبدهم ويقصون علينه

مشكوره :)

شاي الضحى يقول...

مزيونه

شنسوي بعد فاضين ما عندنه شي نفكر فيه ونشيل همه :q

OpTiMiStiC Ra'3m El'6rooF يقول...

من صجج ؟! امبيه موقاعده اتخيل الوضع

مومصدقه للحيين كككككك


" شوفي الاجانب وقت السيل شلون يخمطون "

عاد من زين الاجانب

حساافه بس طافني المنظر ,, لاصار مره ثانيه وبتروحون دزيلي خبر لوول

ونفسي اشووف النفنووف ممكن اتحطيينه D:

غير معرف يقول...

للحين هالجاكيت المخطط موجود اقصد مكود اهو والنفنوف ماله والدلاقات بعد موجودين والجاكيتات الورديه والنفانيف الوردي الفاتح المكشكشه ولا يزالون بنات الكويت ينبشون زين ما شالوا الزوليه معاهم بعد :\
اكثر شي قاعد اشوف البنات يتخامطونه جينزات سونيا مع ان الموديل زباله :\
حتى شباب الكويت هدوا الافنيوز وجابلوا h&m وستار بكس مالج مغز ابره قيها صارت السالفه طماشه !

شاي الضحى يقول...

OpTiMiStiC

والله الأجانب اطلعوا احسن منه اليوم اختي راحت متأخر توقعت ماكو شي لان اهما يوقفون دور من الفير بس هالمره راحت ولا صخه وكل شي موجود محد يخمط

اذا بروح مره ثانيه اناديج تصورين وتكتبين فينه تقرير :q

لا مو ممكن

شاي الضحى يقول...

غير معرف

الجاكيتات المخططه والورديه محد يبيهم لان حر منو بيلبسهم عشان جذي مكودين محد خذاهم والنفنوف المخطط اذا قصدج الحفر مكود لان موديله خايس وخامه مادري شلون صاير

الدلاغات لو طوال او هيلاهوب جان خلصوا نفس ملوت اليهال

والوردي الفاتح الكشكش يلوع الجبد ووايد محلات يابوا احلى منه ومن الصبح محد قرب صوبه

ما قربت صوب الجينزات لاني ما البسهم ولا احبهم

بس ما شاءالله عليج حافظه الي بقى اكيد نبشتي معاهم

والله قلت نفسج خذوا الزوليه ولا بعد؟ هههههههههه

وبمرينا مول بعد بس باقي الزوليه والي بالفترينه وكل شي خلص

هذا متى بليل؟؟؟ لان الصبح المجمع هدوء وستاربكس فاضي محد قاعد يتطمش ... والصراحه الشباب الي يتطمشون فاضين وسخيفين وماعندهم شي يسوونه ويموتون على الخز والحش اكثر من البنات بـ 1000000 مره

Reem يقول...

لوووول جاي انتي فضيعه.. اهم شي انج خذتي اللي خاطرج فيه وكل شي يهون في سبيل النفنوفين, تتهنين فيهم ان شاءالله

Reem يقول...

لوووول جاي انتي فضيعه, اهم شي انج خذتي اللي خاطرج فيه وكل شي يهون في سبيل النفنوفين, تتهنين فيهم ان شاءالله

كوكتيل يقول...

أبي ما صدق أنا لو هناك كان مصورة وبايعة الصور على الجرايد عشا ن ما أراح أقدر أدش أخامط فلازم أطلع كسبانه بشيء على الأقل

وملبوس العافية

ميمة السبيت يقول...

** ويه طفى بجاه المصطفى يعلي ما لبست و لا شريت يوم اني بصف دور قبل ما يفتح المحل

شاي الضحى يقول...

ريم

هههههههه اي بعد ما يصير اخلي بخاطري شي :q

مشكوره

شاي الضحى يقول...

كوكتيل

ما اتوقع بيشترونهم لان الصحافه كلها موجوده وقاعدين يصورون :q


الله يعافيج

شاي الضحى يقول...

ميمه

لا محد صاف دور

كانوا واقفين شويه بعد مو وايد ولا كان زحمه

بس لان المكان صغير وخموا الدنيا كلها وصار عفسه :)

Crazy Girl in aGood Way يقول...

لووووووول شاي ضحكتيني

هني هالكوليكشن مكود .. تهقين اييب بضاعه منه ؟؟ تمشي ؟؟؟؟

عليج بالعافيه ... بروح باجر بشتري منه دام هابين فيه بالكويت :)

شكرا

شاي الضحى يقول...

كريزي

اختي بعد تقول عندهم مكود وماكو لويه بالمحل يعني الوضع طبيعي :)

اي تمشي ههههههه


الله يعافيج


عفوا :)

Yousefiya يقول...

لووووووول
طماشة إحنا ، بس أشوة إنج لحقتي على شي.

Sn3a يقول...

لووول وانا عبالي شهر 3
زين عاد حطيلنا صور النفانيف شوقيني
تصدقين ماعمري شريت من كلكش الديزاينرز حق اتش اند ام
من زمااان مو داشته

عليج بالف عافيه

انا اخر مره شفت هوشه كانت بسيل فيلا مودا قبل سنتين
جان احط كرسي واطالعهم لووول

شاي الضحى يقول...

يوسفيه

لووووووول

اي الحمدلله :q

شاي الضحى يقول...

سنعه

اتوقع في كوليكشين من ديزاينر ثاني شهر 3 جيكي بالسايت

ولا انا كل ما اروح كل شي خالص وما احصل ولا شي والي يبقه اشياء خايسه

الله يعافيج :)

هههههههه ولا مره فكرت اروح سيل فيلا مودا لان ادري تصير صكه

وكل رفيجاتي الي راحوا قالولي صارت هوشه

Made n Q8 يقول...

loooooooool
من صجج!!
مشالله عليج والله لو انا اعوف الدنيا مو النفنوف طفارتي الزحمه خخخخ

بس زين بالاخير سويتي الي تبينه وخذيتي النفنوف وملبوس العافية :d

شاي الضحى يقول...

Made

اي من صجي ههههههه :q

انا بعد طفارتي الزحمه بس ما يصير احنه كله اخر من يعلم وكله حق غيرنه :q

الله يعافيج

NOIR يقول...

تكفا شاي تكفاا!طلبتج

ابي اشوف هالنفنوفين الي خلوج تدخلين هالحرب الداميه

و علييج بالعافيه :*

شاي الضحى يقول...

NOIR

مو مهم تشوفينهم المهم اني كسبت المعركه ههههههه :q


الله يعافيج

جاردينيا 2000 يقول...

امبيه مووتيني من الضحك ..ودي كنت اكون هناك واشوف وناسه =)
عاد النفانيف تسوى هل الركضه
ومثل ماقالو دايما ادشه والقاه فاضي ولا احصل شي حلو ..عرفت السر
شكرا

شاي الضحى يقول...

جاردينيا

ههههه دوم تضحكين :)

والله كانت في اشياء حلوه ... وفي اشياء شفتهم بالسايت ما اعجبوني بس باللبس طلعوا وايد حلوين

اي انا جذي كله ادش القى اشياء خايسه

هالمره قلت لا لازم اخوض المعركه هههههه


شكرا :>

ماتريوشكا يقول...

و الله نفس الشي صار عندنا في دبي!
بس مب على سونيا راكيل... على جيمي تشوو!!! الحريم اتخبلوا هاك اليوم!!
هالعروض اتصير في فرعين من فروع اتش &ام... مول دبي و بن بطوطة مول..:)
انا بصراحة ... ما بتجرأ... و لا بضارب الحريم...!
بس مثلج.. بخطط و بسوي خطط استراتيجية و مؤشرات أداء قياسية و بقيس الاداء!!! تأثير الدوام!

شاي الضحى يقول...

ماتريوشكا

انا ما لحقت على جيمي تشو كل شي كان خالص

يبيله خطه حق الي بينزل هههههههههههه


:q