Caribou Coffee

امس اول مره اطلب من كاريبو عن طريق موقع طلبات

وكل مره لما اطلب منهم تيك اوي يسكرونه بالطريقه المعتاده

بس امس لما وصل الطلب استانست على طريقتهم اليديده بتسكير الفتحه

لما اطلب من سكند كب اييبونه لي ملزوق بلزاق عادي

هذي الطريقه شكلها وايد احلى

ولما سحبتها طلعت القفشه او العود الي يحوسون فيه هههههههه

بس والله فكرتها تونس

ماهو الحجم المناسب بالنسبة لكِ!

سيدتي آنستي

من فتره طويله هبوا بالـ clutch

وايد بنات حبوهم وقالوا انهم احلى واكشخ واخف بالشيل

وفي بنات ماحبوهم لأسباب عديده

وانا حبيتها وما حبيتها !!

يعني اشوفها مو عمليه ما احب امسك شي بايدي عادي انساها وامشي هههههه

وغير هذا ما تكفي قشي

والي خلاني ما احبها مره كنت رايحه الجامعه وشايلتها من قرادتي

وحاطه فيها قلم وكلينكس واحد والليسن والموبايل ومفتاح السيارة

وكنت قاعده بالقسم واحل الهوم وورك جان ابطلها واطلع المفتاح عشان اقدر اطلع القلم

وعقب ما خلصت رحت محاظرتي ولما طلعت بروح سيارتي ادور المفتاح ما لقيته!

رديت الكلاس ما لقيته وقعدت احوس اكثر من نص ساعه اخر شي تذكرت اني كنت بالقسم

ورحت ادور بنفس المكان لقيت شباب قاعدين سألتهم قالوا ما شافوا شي

ورفيجتي تقولي خلاص انا اوصلج البيت

وانا احاتي شلون بدخل البيت ماعندي مفتاح البيت

جان اشوف الهندي الي يشتغل بالقسم وسألته قالي ما شاف شي وبعدين يابلي ثاني

ولما سألته قال ان في واحد هندي شاف المفتاح وخشه عنده

قلت له وين راح جان يقول خلص دوامه!!!

طبعا انا مادري شسوي فقلت خلاص برد مع رفيجتي وباجر انطره ايي

شوي جان يقولي الباص ما مشه ويروح ركضضضضضضض

وينزله من الباص واييب الهندي ههههههههههههه

قلت له ليش نزلته خلاص اخذ المفتاح وخله يروح قال ما يصير اهوا الي لقاه

المهم خذيت المفتاح ورديت بالبيت عقب ساعه ونص من البحث والانتظار

عقبها صج كرهت هالجنطه

نادر ما يضيع مني شي وهالمره ضاع مفتاح السياره

وحرمت اشيلها بالجامعه

وقمت استخدمها للطلعات السريعه يعني اذا بروح بس سينما او بس غدا او بس عشا

او حق عرس / عزيمه / استقبال

اما اذا تسوق لاااااا كلش ما تنفع

لما اشيلها احس اني ضايعه لازم قشي معاي

واشوف الجنطه الكبيره اهيا الي تناسبني

عاد انا ما يبقى شي ما احطه بجنطتي

بوك - نظاره شمسية - علوج - عطر - بلاستر - لزاق شفاف مال الاوراق

قلم - موبايل - كريم لليد - ديتول - منظره - نوت - أدوات للأظافر

بخاخ للربو - كاميرا - باندول ... الخ

وايام البرد احط بلوزه وسكارف هههههه

عشان جذي احب الجنطه الكبيره يالله تكفي

حتى لو بروح الجمعيه اخذ كل هالقش ليش مادري !

بس الشي الوحيد اذا نسيته وارد البيت اخذه واكمل الطلعه اهيا

الكاميرا عندي اهم من الموبايل

سيدتي آنستي

أي جنطه تفضلين؟ مع ذكر السبب

وأي جنطه تشوفينها مناسبة للسفر؟

------------------------

سؤال للشباب

أي جنطه تفضلون الكبيره ام الصغيره؟!

ولا ما تهتمون؟

رايكم يهمنا

ZOYA

من شهر او اكثر اختي شرت اصباغ زويا

وقبل جم يوم قلت بجربهم

الأول لونه احمر مات (بدون لمعة)

جربته على ايد وحده ومسحته مع ان لونه وايد حلو

بس يبيله احد يعرف يصبغ وايد صعب مادري ليش

مكان يصير غامج ومكان فاتح ومكان الصبغ متكود

ماعرفت له كلش
--------------------

والثاني اسمه ADINA

لونه غريب (يقط الوان)

حطيته شويه كان حلو يونس

عيبه يسمر الايد

وبعدها مسحته ما احب هالألوان بس حطيته عن خاطري

احب احط بس الاحمر ودرجاته والوردي ودرجاته

ملاحظه: الصور من google

شنو احسن ماركة للأصباغ؟

الي احبهم 2

essie + layla

صاروخ كويتي

يا كثر ما كليت هالبرد

بس ولا مره لاحظت ان اسمه

صاروخ كويتي

عبالي اسمه بس صاروخ

وصج ضحكني اسمه

يالله زين صار عندنه صاروخ وباسم الكويت بعد

وانتوا لاحظتوا ان اسمه صاروخ كويتي من قبل ولا لا؟!

Ansam's Icy Yoghurt

أخيرا امس جربت Ansam's Icy Yoghurt

في Napket الأفنيوز

كان بخاطري اجربه من زمان بعد ما سمعت عنه والكل امدحه ويقولون انه لذيذ

ماشاءالله واحنا قاعدين وايد ناس طالبينه وغير الي اطلبوا تيك اوي

وطلبنه انا وامي واختي

رايي:

كلش ما عجبني

توقعت طعمه شي ثاني بس صج لاعت جبدي كليت علج عقبه هههههه

وامي واختي بعد ما عجبهم

مره ثانيه ما افكر اطلبه

حبيت يوقرت lakoocha احلى بوايد

----------------

بعد ما طلعت منه جان اشوف محل ديزل فتح نفسي

شوفوا الفترينه

ياحلوه الي فاقص الاوادم

Plate Spacers

احب السوالف الغريبه حق المطبخ

ذاك اليوم وانا احوس في A2Z جان اشوف شي اسمه

Plate Spacers

تحطونه بين الصحون يثبتهم ويصيرون فوق بعض

عشان اذا بتسخنون الاكل بالمايكرويف تدخلونهم مع بعض

ماله داعي تنطرون صحن صحن

او تحطونه بالفرن وتطبخون الأكل

او تدخلونهم بالثلاجه وما ياخذ مساحة كبيرة

ونسيت جم سعره

وهذا موقعهم

Link

شخباري!

هالأيام كل ما احط على تلفزيون الكويت بليل مادري جم الساعه

اشوفهم حاطين أغاني سينمائية

شخباري!!!

شطاري عليهم

اذكر قبل لما كنه صغار نستانس اذا حطوه بس نشوف المقدمة والنهاية

لما الصور تتحرك وتكون بالألوان

ولما يبدي ما نشوفه لان يحطون اغاني الافلام ما نحبها

الصراحه مادري اقول شخباري على البرنامج او على

تلفزيون الكويت !!

Farm Fresh

احلى اكله بالنسبة لي اهيا السلطات بأنواعها

واحب اجرب انواع وايد خاصه الجاهزه الي موجوده بالجمعيات

لان ما يبيلها عباله وتقصص وعفسه

كنت رايحه جمعية كيفان وشفت هالسلطه

اهيا قديمه كل مره اشوفها ما اشتريها

هالمره قلت اجربها

اسمها فارم فريش سالد

المكونات:

خس مدور - خس عادي - ملفوف بنفسجي - جزر


معاها 3 صلصات

طعم الصلصه ما عجبني

فالي سويته ضفت فوقها الصلصة الفرنسية

وصارت وايد لذيذه

انا ما شفتها الا بجمعية كيفان دورتها بجم مكان ما لقيتها

اذا كنتوا شايفينها بمكان قولولي

وصلوا :>

استلمت الكوابه من كلر مي ماين

والحمدلله امي عجبها كوبها واليوم شربت فيه


وهذا هامستر زعفرانه

كنت احاتي يكون كوب امي مو حلو وما يعجبها

بس اشوه كلهم صاروا حلوين بالصج احلى من قبل

lakoocha

اخيرا امس جربت lakoocha

قريت عنه ببلوق HiKuwait وبلوق رورو

وشوقوني عاد انا ما جربت بينك بيري

وسمعت ان هذا احلى منه بوايد فقلت اجرب الأحلى

اول ما رحنه خلانه نجرب انواع وايد

اوريجينال: كان طعمه اووووووع اااااااع اييييييييييييع

استغفر الله كنت برجع جربت طرف القفشه ما قدرت ابلعه

المانجو: طعمه عادي مو وايد حبيته

جيز كيك: هم عادي ما عجبني وايد

البيري: اهوا الي عجبني وطلبته

وحطيت معاه 5 اضافات

3 انواع توت + رمان + مانجو

حبيته طعمه خفيف وفريش

مكانه في مجمع جاليريا 2000

عيبه ان مكانه بهالمجمع الي كله رياييل يخزون !

وماكو مصافط

هدف جنوب أفريقيا

ما اشجعهم بس استانست على الرقصة

شوفوا في الثانية 0:17

وهذي كانت اول مباراة في المونديال


----------------

الي اسألوني منو اشجع ان شاءالله برد عليكم بالتعليقات

فوتبول دونات

امس بالصدفة كنت رايحه الجمعية وشفت اعلان

كرسبي كريم

عاد كل مره اشوفه ما امر صوبه لاني مااااااا احبه

احلى دونت بالنسبة لي دانكن دونتس

امس قلت بجرب اليديده والي منزلينها عشان كأس العالم

واهيا فوتبول دونات

وهذا شكلها بالصج

داخلها كاسترد ومغطية بكاكاو واوريو وشكر بودره

طعمها ما عجبني وايد خاصة الكاسترد مو حلو

او يمكن لاني ما احب كرسبي كريم

وطبعا ما تكمل حلاوة مشاهدة المباراة بدون

كوكاكولا

مشاهدة ممتعة

World Cup 2010

الي مو يمه تلفزيون ويبي يتابع المباراة

او الي ما عنده اشتراك الجزيرة (امس مجانا اليوم مادري)

تحديث: اليوم بعد مجانا .. مشاهدة ممتعة

احسن حل يتابع بالنت او بالآي فون

ويفتك من التشويييييييش المتعمد !!!

برنامج اسمه netTV

سعره 2.99$

وفي اغلب القنواة العربية والعالمية

وتقدرون تشوفون المباراة مباشرة

برنامج ثاني اسمه TVUPlayer

سعره 4.99$

هذا احبه اكثر من الأول لان القنوات الي فيه أكثر

والقناة الي تتابعونهم تضيفونها في الـ Favorites

يعني ما له داعي كل مره تدورون القناة الي تبونها

وهذي قناة للمباراة

----------------

والي ماله خلق يتابع بس يبي يعرف النتيجة أول بأول

ينزل برنامج اسمه

South Africa

مجانا من الـ appstore

وهالبرنامج فيه ميزه اذا كنتوا تشجعون منتخب معين

تختارونه ويطلع لكم موعد المباراة والنتيجة للمنتخب الي تشجعونه

ما يطلع باجي المنتخبات

ويطلع لكم كل الملاعب وكل منتخب وين بيلعب

وهذا برنامج ثاني باللغة العربية اسمه

كأس 2010

مجانا

بس ما فيه مميزات وايد ما عجبني

الا صج تتابعون الكره؟!

NEUTROGENA Wave

قبل شهر او اكثر شفت بالجمعيات منزلين مكينة لتنظيف الوجه

اسمها NEUTROGENA Wave

وما شريتها

واهوا عبارة عن منظف كهربائي ورغوه باردة تحدث وخزاً وتتغلغل عميقاً في المسامات

تفتح المسامات لتزيل الأوساخ والدهون والمكياج، تزيل خلايا البشرة القديمة

فتصبح البشرة اكثر ليونة ونعومة بعد مجرد الاستعمال الأول

من يومين زعفرانة شرتها وجربتها

وانا خذيتها منها وجربتها

العلبة فيها المكينة + 14 قطنة + بطارية + رأس ملحق

ملاحظة: يبيعون 30 قطنة بروحهم يكفون لشهر


طريقة الاستعمال جدا سهلة:

1- ركبي القطنة على راس المكينة
2- حطي المكينة تحت ماي الحنفية
3- شغلي الزر ودلكي الوجه

تستخدم مره واحده باليوم

النتيجة:

جيده جدا بعد ما استخدمتها حسيت جني مسويه فيشل لويهي

والي مو على طول يستخدمون غسول للوجه راح يحسون بنتيجة افضل

انا فرق معاي شويه لاني دايما استخدم غسول للوجه

وهذا الإعلان

الفيديو يوضح

محتويات العلبة + شرح لطريقة الاستخدام

وشكرا

راسي بينبط من كثر التيجان!

وصلني تاج من الزميلة العزيزة نهـــــار

وابلشتني فيه ههههه

ماذا ستكتب لنا لتعبر عن حياتك التي عشتها إلى الآن في كلمات قليلة؟

حياتي حلوه ومليئة بالمفاجآة

والحين حياتي ملخبطه!

من ستختار ليمسح دموعك؟

الكلينكس!

لو خيروك بين حبيبك وبين اعز صديق فمن تختار؟

بالنسبة لي الحبيب اهوا الصديق والاخ الزوج والاب

فأختار الحبيب

من يسكن قلبك؟

القلب دكان وكل من له مكان

وامي بالفترينه !!

هل تعتقد أن حظك سيء؟

لا ولله الحمد

هل هزمك حزنك في يوما من الأيام؟

لا كله انا اهزمه 2 - 0

((مستحيل أنساك)) لمن تقولها؟

يدتي الله يرحمها

((الي راح راح وما تفيد كلمة ياريت))
إذا أردت أن توجه هذه العبارة لنفسك، فماذا تقصد بها؟

جان ما شريت معجنات من امبرس!

((أنت كل شيء بحياتي)) لمن تقولها؟

أمــــي

متى آخر مره بكيت؟

الحمدلله ماكو شي يبجي

أي الدول تتمنى أن تزورها؟

كينيا

هل لديك الجرأة أن تقول عمرك أمامنا؟

22

هل أنت راضي عن نفسك؟

الحمدلله اي

هل تؤيد الزواج العاطفي ام الزواج التقليدي؟ ولماذا؟

الزواج العاطفي

احتفظ بالأسباب لنفسي

ايهما أهم شهادتك الجامعية أم الزواج ممن تحب؟

الشهادة الجامعية

مع انها هالأيام ما تسوي شي

لا تنفع ولا تضر

هل تعترف بشيء اسمه الصداقة بين الرجل والمرأة؟

اعترف بالزماله

هل أنت مدمن تفكير؟

جـــدا

من هو أكثر شخص تفكر فيه؟

ســـر

إذا تم تعيينك ملكا لجميع البلاد العربية فما أول قرار ستتخذه؟

افرض زرع البطاطس في كل الدول العربية

"اجباري"

هل تكره شخص بشده في حياتك؟

صدام حسين

هل ملابس الشخص أمامك تؤثر فيك لتأخذ عنه انطباع؟

نعم

ما الذي يلفت انتباهك بسرعة في الشخص لكي تعجب به؟

اخلاقه

إذا احببت شخصا في الوقت الخطأ وفي المكان الخطأ فماذا تفعل؟

اصلحه !!!

حكمة تؤمن بها جدا؟

يوجد دائماً من هو أشقى منك، فابتسم

عادة تفعلها دائما تتمنى أن تتركها؟

العناد

ما هو أجمل اسم لولد وأجمل اسم لبنت من وجهة نظرك؟

محمد

اسم يدتي الله يرحمها

ماذا تفعل أول شيء إذا ربحت مليون؟

بشتري فيول صجي

هل أنت من لديهم رغبة حب التملك وإذا تملك الشيء أصابه الملل منه؟

عندي رغبة حب التملك بس ما امل

اعتذار تريد أن تقدمه لمن؟

مـحـد

لمن تهدي هذا التاج من بعدك؟

الصراحه مابي ابلش احد

بس الي يبي يحله على راحته

كل الشكر للأخت نهــــار

Again: Color Me Mine

زعفرانه من شافت بوست طلعتي مع رورو

لكافيه كلر مي ماين

اضغط هنا

واهيا تحن علي اول ما ارد الكويت وديني

السبت الي طاف رحت معاها

قلنه نبي ديسكفري عن الزحمه ويكون هادي

لما رحنه ولا حده مقمووووت يلوع الجبد وتحفهم شويه

وكل ما نقولهم نبي شي كله خالص!

وفوق هذا ازعاج العاب اليهال وصراخهم

فطلعنه ورحنه مرينا كريسنت

وانا ما كان بخاطري اسويلي شي

فأمي وصتني اسوي لها كوب

عاد توهقت حسيت المهمة صعبة لاني ما اعرف ارسم

بس اعرف ألطخ ههههههه

امي قالت تبي الوان صباحيه

لقيت كوب مكتوب عليه I LOVE MOM بشكل بارز

بس ما خذيته لانه صغير

وخذيت هذا فيه قلب بارز قلت بس الون اسهل لي

وهذا الي طلع معاي

وزعفرانه بعد خذت كوب

وكان بخاطرها تسوي لها كوب احمر وتكتب اسمها نفس طريقة

نسكافيه

وبنفس الوقت بخاطرها ترسم هامستر

فقسمته بالنص من جدام الهامستر والي وره اسمها نفس طريقة كتابة نسكافيه

وصار شكله حلو ويونس

صج وناسه تغيير عن الكافيهات العادية

ننطر لي الاسبوع الياي ونشوف النتيجة

الحين امي تبي تروح تلون هههههههه

هالمره جنها تبي قوري !!!