الثلاثاء، 9 فبراير 2010

Oreo Cheesecake

بمناسبة عودة زعفرانه من السفر قبل اسبوعين سويت لها اوريو جيز كيك

لانها تحبها وكل مره تقولي سويها

المقادير
1 قالب زبده
1 علبة دايجيستيف
1/4 كوب حليب سائل
1 كوب سكر
24 قطعة كيري
3 ملاعق كبيره طحين
1 ملعقة صغيره فانيلا
4 بيضات
1 علبة ساور كريم
3 اكياس صغيره اوريو
كريمه بنكهة الشوكولاته بالحليب
كريمه للتزيين



الأدوات:
قالب جيز كيك المتحرك
خلاط كهربائي

الطريقه:

نذوب قالب الزبده


نطحن الزبده مع الدايجيستيف

ملاحظه: تقدرون تستبدلون الدايجيستيف وتحطون بداله اوريو


نرصهم في صحن الجيز كيك


في الخلاط الكهربائي نحط 4/1 كوب حليب سائل

وكوب سكر

و24 قطعة كيري


نخلطهم عدل لما يصيرون كريمه


نضيف عليهم 3 ملاعق طحين + 1 ملعقة صغيره فانيلا

ونخلطهم


ونضيف عليهم بيضه واحده وبعدها بـ 30 ثانيه نضيف البيضه الثانيه

وكل 30 ثانيه نضيف بيضه لما يخلصون الأربع بيضات

يعني مو كلهم مع بعض


عقب ما يختلط عدل نضيف عليهم الساور كريم

ونخلطه الى ان يتجانس


نكسر الاوريو ونضيفه على الخليط ونخلطه بالـيـد


بعد ما نخلص نصب الخليط في صحن الجيز كيك

ونسوي حمام مائي ونلف الصحن بالقصدير

ندخلها الفرن لمدة ساعة ونص

ملاحظه:

1- الفرن لازم يكون حار

2- ما نفتح الفرن خلال الساعه ونص

3- اول ما تخلص الساعه ونص نسكر الفرن بس لا تبطلون الباب خلوه مسكر نص ساعه

لما تبرد شوي


خلوها بره تبرد بعدها دخلوها الثلاجه اكثر من 8 ساعات

(مادري شفيها الصوره تكوكست)

لما تنتهي فترة اقامتها بالثلاجه طلعوها وفجوا الصحن عنها


الحين دور كريمة الكاكاو

ملاحظه: لازم ما تدخلون الكريمه داخل الثلاجه خلوها بره


ونبدي نغطي الكيكه

(هذي بعد سوت شقلبه)

ولا تنسون تغطون الجوانب

ملاحظه: هذي الخطوه مو ضروريه تقدرون ما تغطونها بالكاكاو

وتخلونها مثل ما اهيا وتضيفون عليها بس كريمه او اوريو للتزيين


بعدها زينوها بالطريقه الي تحبون

عقبها دخلوها الثلاجه ساعه او ساعتين او إلى وقت التقديم


ولما تطلعونها من الثلاجه ضيفوا عليها الكريمه


وبجذي نخلص من التزيين واللويه ما يبقى غير ان ناكلها


وطبعا كانت مفاجأه حق زعفرانه ووايد استانست عليها :)

ومن قبل كنت مسويتها بشكل آخر

وهذي صورتها

خذيت الطريقه من منتدى كويتيات بس نسيت من منو ضاع اللنك

هناك 42 تعليقًا:

مُـجـرد أُنـثى ،، يقول...

صراحة تفكيرج بالتزيين مينوون

الكيكة شكلها موووصج

بجربها ان شالله


: )

LO NAN JO يقول...

شكلهـــا يمييييي

باالعافيه على اختك , وتزيينك خطييير

DoDoq8 يقول...

تسلم ايييدج


بس شمعنه السماعه والابره اكيد اختج تدرس طب


بالعااافيه

Unknown يقول...

تسلم ايدج

شكلها لايت خفيفه :-p

رورو الشخبوطه يقول...

السلام..

وناسه ماشاءالله رديت تسوين كيك..

بالعافيه عليكم يارب..

وتسلم ايدج ..

ماشاءالله شكلها مضبوط..

ومشكوره..

خخ ع طاري زعفرانه حلمانه انج منزله بوست انج ضفتي اختج الكبيره معاكم بالبلوق :)

حتى احلامي بالبلوق :\

نمووول يقول...

اقعد حركات التزيين
والله شهيتيني
بس هم فيه خلط وخبص مالي بهاذي السوالف ..

الحين دامج خبرة بالطبخ وتحبينه شحقة ما تشتغلين فيه انت تتربحين وتتسلين واحنا نترس بطوننا ؟

تحياتي
وتسلم ايدج

شاي الضحى يقول...

مجرد أنثى

جربيها طعمها لذييييذ :)

وكل ما تقعد بالثلاجه اكثر تصير احلى ما تخترب

شكرا :>

شاي الضحى يقول...

لو نان جو

الله يعافيج حبيبتي :)

التزيين كنت مفكره فيه قبل لا ترد اختي بشهر وناطرتها ترد عشان اسويها لها :)

شكرا

شاي الضحى يقول...

دودو

الله يسلمج

:)

الله يعافيج

مشكوره :)

شاي الضحى يقول...

ابو فلان

الله يسلمك

مو خفيفه وايد ولا ثقيله ولا تغث

قول حق ام فلان تسويها

وانصحك تجربها احلى من الجاهز :)

حياك الله :>

شاي الضحى يقول...

رورو

اي شفتي شلون عادت حليمه لعادتها القديمه هههههه


الله يعافيج ويسلمج حبيبتي :)


بعد معاناة من الفشل الحين تعلمت لوووول :q

لوووووووووول لا اختي بس متابعه من بعيد لي بعيد

العفو وحياج الله :>

شاي الضحى يقول...

نمووول

تطورت ههههههه

انا مو معطيتك الطريقه من قبل؟ ليش ما سويتها؟

لووووول لا ما افكر بهالمشروع ... بس احب اسوي حق بيتنه واذا احد يانه البيت وحق رفيجاتي :)

الله يسلمك

مشكور :>

Engineer A يقول...

صورة الثانية أحلى :)

تسلم ايدج ان شاءالله اجرب اسويها "اذا فضيت" :)

يعطيج العافية

chandal/danchal!! يقول...

يعطيج العافية... مو وايد ناس يضيفون الساور كريم... الا اللي خبرة بالجيز كيك

عليكم بالعافية

:)


بس شموديل السماعة والابرة؟... مسويتها حق مستوصف الصقر؟

سمو الأميرهـ ..ツ يقول...

واااااو

حلووو


ما شاء الله عليج ..فعلاً عليج أفكاار عجييبة

:)


إن شاء الله بجربها جريب ..

شاي الضحى يقول...

ENG

الله يسلمج ويعافيج

مشكوره :)

شاي الضحى يقول...

جندل

الله يعافيج ... الساور كريم يخلي طعمها يصير الذ

الله يعافيج

لا ونتي الصاجه حق عبدالمغني :q

حياج الله :>

شاي الضحى يقول...

سمو الأميره

جربيها وزينيها بطريقتج اكيد بتصير احلى :)


شكرا :>

mazyona يقول...

شكلها واو
لازم أجربها مشكوره

شاي الضحى يقول...

مزيونه

العفو

حياج الله :>

قارئه فـ حسب,, يقول...

يمييي

بالعافية عليكم..

Slashy يقول...

looks YUMMY
3alaikom bil 3afya sweetness ;)

Made n Q8 يقول...

شكلها يشوق مشالله

علييكم بالعافية

ميمة السبيت يقول...

** عليكم بالعافية و عسى الله يوفقكم انتي و زعفرانة و يخليكم حق اميمتكم :)

شاي الضحى يقول...

سارونه


الله يعافيج .. مشكوره :)

شاي الضحى يقول...

5/4

الله يعافيج

شكرا :)

شاي الضحى يقول...

ميد

طعمها احلى من شكلها :)

الله يعافيج .. مشكوره :)

شاي الضحى يقول...

ميمه

الله يعافيج

اجمعين ... آمين الله يسلمج يارب :)


مشكوره :)

ba6alah يقول...

lol bel 3afya

Fishah يقول...

واو ماشاء الله شكلها يشوق :)

تسلم اييييييييييييييدج حبوبه :>

مشكوره :*

شاي الضحى يقول...

ba6alah

الله يعافيك :)

شاي الضحى يقول...

فشه

الله يسلمج

العفو .. حياج الله :>

غير معرف يقول...

عليكم بالعافية و الله يعطيج العافية :)
وايد تاخذ وقت و أحسها صعبة .. بس فكؤة التزيين حلوة.

Sn3a يقول...

olllaaaa 24 kiri
اشوه اني ماسوي تشيز كيك

عليكم بالعاافيه
تشوق
بس انا جبانه ماراح اسويها عشان لا اكلها كلها;p

شاي الضحى يقول...

حنان

الله يعافيج :)

لا مو صعبه بالعكس اذا زهبتي المقادير ومشيتي خطوه بخطوه بتصير وايد سهله :)


شكرا

شاي الضحى يقول...

سنعه

اي 24 .. في طرق ثانيه مافيها كيري تحطين بداله فيلاديلفيا او اي كريمه جبن بس ما يصير طعمها حلو نفس الكيري

الله يعافيج

ليش تاكلينها كلها؟! هههههه

اكلي شويه بس

شكرا :)

Crazy Girl in aGood Way يقول...

تسسسسسلم ايييييدج

اللي صج عجبني فكره التزيين ...

ببوقها منج وبسويها حق ريلي :)

بس بسالج الابرة والسماعه ينوكلون والا العاب ؟؟؟؟؟ ومن وين شاريتهم ؟؟

عليكم بالعافيه وشكراا :)

شاي الضحى يقول...

كريزي

الله يسسسسسسسسسسسسلمج :)

الفكره حلوه حق الدكاتره

لا الابره والسماعه العاب .. شريتهم من محلات الألعاب عندهم انواع وايد انا خذيت جنطه داخلها اغراض الطبيب

وحطيت بس السماعه والابره

واخترت قالب على قلب لايق مع السماعه

الله يعافيج .. العفو

مشكوره :>

6umasha يقول...

ya salammm :P 6abakhtnaa :P
mashalla ana ma3rf mu fal7a eb shay :P

شاي الضحى يقول...

طماشه

انا ما كنت اعرف شي ولا افكر اني اسوي شي

بس تعلمت بعد محاولات عديده من الفشل

انتي لا تقولين ما اعرف حاولي وراح يطلع منج :)

حياج الله :>

الهام بخور يقول...

بصراحة شهية ..
عملتها لكن استبدلت السارو كريم
بجبنة فلادلفيا وطلعت ثقيلة
المرة الثانية رح اضيف الكريمة المخفوقة بدالها
لانه ما بيتوفر عندنا بجدة السارو كريم دايم
بكل الاحوال تسلم الايداي :)

شاي الضحى يقول...

الهام

يعني حطيتي نوعين من الجبن؟!

اكيد بتطلع ثقيله

اذا ماعندكم ساور كريم في وصفات ثانيه تكون بدون الساور كريم والكيري تحطين فيلاديلفيا

بس هذي طعمها احلى بوايد

الله يسلمج :)

مشكوره