السبت، 7 نوفمبر 2009

Dubai Part 3

ادري طولت عليكم بس يالله ما عليه نكمل الجزء الثالث من التقرير


في اليوم الثاني قعدنه من الصبح ورحنه تريقنه في امارات مول

بعدها رحت خذيتلي مانجو مجففه من The date & nut


يمييييي بس السنه الي طافت كانت احلى

هالمره شيره شوي انا احبها حامضه


وتسوقنه بالمول عقب ما خلصنا دشيت فيرجن لاني احب سوالف الخرابيط الي عندهم

جان اشوف هذا :(((((((((


هذا كرسي مادري لعبه المهم انه هزاز حق اليهال

سويت سالفه حق امي إلا ابي اخذه لوووووول

تقولي لو عندج بيبي جان شريته لج :(((

وااااااااااااه ابيييييييه

تهقون على ما اتزوج واييب بيبي بيكون موجود ولا خالص؟ :(((


وعقب ما خلصنه لويتنه الظهر خذينه عصير وريحنه شوي بعدها رحنا المترو


ركبنه المترو وكنه نبي نروح مجمع حده قديييييم صارلي دهر مو رايحتله

والي اهوا ديره سيتي سنتر

والحمدلله انه اكو محطه توصلنه عنده بالضبط ما نحتاج تاكسي

وهالمره ركبنه مكان مخصص للنساء والأطفال فقط


الطريج ما كان طويل


وكنت مستمتعه بالمناظر الخلابه هههه



ممنوع الأكل والشرب غرامه 100 درهم



المترو مثل ما قلت لكم يوصل للمطار مبنى 3 اتوقع مال الاماراتيه

وفي محطه ثانيه بس ليلحين ما افتحت

يالله وخروا عن الباب بنمشي


يالله بنوصل

لما يوصل المترو للمحطة الاولى او الاخيره يوقف يعقمونه ويمسحونه


واخيرا وصلنه



شخبااااااااااااااااااااااري

هذي اول كلمه قلتها لما دشيت المول ههههههه


طبعا احنا متعنين ويايين بس عشان هالمحل

وول ورتس

كنت ابي شغله منه بس للأسف ما لقيتها جان اخذ اشياء ثانيه


بعدها دشيت Vincci

وشريت جوتيين وبوت (وانتوا بكرامه)

استانست على طريقته لما اييب السايز الي ابيه

شوفوه قاعد يدور


لقااااااه


وجااااااااااااااااااان يصيييييده

ههههههههههههههه


طلعوا علي بـ 31 دينار فقط لا غير

جان ادق على زعفرانه واقولها اي لون محتاجه وخذيتلها نفسي

وبعدين تسوقنه وخمينه الدنيا وصار معانه جياس واااااايد مع الي كنه شايلينهم من امارات مول

ويالله نمشي مع هالجياس

فامي اقترحت انه ناخذ لنه عربانه بـ 1 درهم هههه


وهذي صوره حق جزء جزء من الأغراض العربانه طفحت ههههه


وطبعا ابتلشنه بالعربانه ما تدش المحلات فلازم وحده فينه توقف بره عندها

عقب ما تسوقنه رحنه نتغدى بس العربانه ما تدش صوب المطاعم

فوديناها مكان اسمه منطقة العربات خليناها عندهم على ما نخلص


رحنه صوب المطاعم كنت متوقعه انه ما تغير

بس يحليله كشخ وشالوا الالعاب القبليه وحطو بدالهم ماجيك بلانيت

عاد كنت احب الالعاب الي قبل كله نلعب فيهم





عقب ما تغدينه رحت انا واختي خذينه آيس كريم

من ماربل سلاب كريمري


شوقني الكيك الي عندهم كان ودي اخذ بس وين احطه لووووول



عندهم انواع وايد مو نفس الكويت


وشوفوا شكثر يسوون بسكوت


بالكويت اغلب المرات الي اروح لها كله البسكوت خالص


انا اخترت البسكوته الي على اليمين


هذا مال اختي


وهذا مالي



بعدها نزلنه الطابق الي تحت الي قبل كان مصافط سيارات

الحين فيه سيارات وفيه محلات ومقاهي وكشكات


دشينه محل Pink Panther


المحل يشوق بس في اشياء ما تسوى تشترونهم لان سعرهم مبالغ فيه








ما شريت لي شي

بس شريت حق زعفرانه


شفت اختي خذت جنطة ميك اب

جان اخذ وحده حق عفرانه شكلها يشوق



وفي كشك موجود باغلب المولات بدبي

يسوون لكم مجسم مادري لعبه او تمثال على ويهكم

تعطونهم الصوره ويسوونها لكم

عجبتني الفكره واستانست عليها بس لما سألته بجم

يطلع 45 دينار كويتي !!!

فقلت ما يسوه اشتريلي فيهم نفنوف ابرك هههههه


ورحت لكشك فيرجن ولقيت عندهم بوك على كوكيز

شكله جنه كوكيه صجيه

حبيته وخذيته حق زعفرانه


عشان تحط فيه خردتها ههههههه



وعقب ما خلصنه ردينه المترو


كنه حدنه تعبانين من الصبح لويه ما ريحنه


اول ما وصلنه امارات مول دشيت كارفور وشريت هالدلاقات بـ 9 درهم


وشريت فازلين مال اليهال

عشان ادهن ريولي والبس دلاق لان ريولي مسكينه ماتت :(


وشرينه بطاط وبيبسي حق العشا

وشرينه بعد عصير وسوالف الريوق



ردينه الفندق بليل وتعشينه وجابلت التلفزيون شوي

بعدها حطيت ريولي بماي حار وسويتلها مساج هههههه ونمت

ولما صار الصبح قعدت وتريقت

وهذي وجبتي المفضله


هالبسكوت احبه وايد

بالكويت يايبين لنه تقليد يابس وطعمه مو حلو ورسمات الحيوانات الي فيه مليقه حتى الفيل شكله مو ذاك الود :(

اول ما بطلته قعدت ادور على حبيبي!!! هههههههه


لقيت الأول


ولقيت الثاني

يهبلووووووووون


وبعد ما تريقت بدلت وقعدت انطرهم يخلصون لاني كنت قاعده انطر الرحله اليايه من زماااااان

وحدي متشوقه لها



البقية تأتي

هناك 12 تعليقًا:

رورو الشخبوطه يقول...

السلام..

يشوق تقريرج ماشاءالله..

متابعتج ..

ومشكوره..

شاي الضحى يقول...

هلا رورو

تسلمين حبيبتي :>


شكرا على المتابعه :)

DoDoq8 يقول...

wnasa dubuai tshw8 wlaaah esht8t lha abee aroooo7

shklha kant 5osh sfra

mtab3eeen

شاي الضحى يقول...

DoDoq8

اي والله وناااااسه والحلو انه كل مره تروحين لها فيها شي يديد واذا رحتي نفس المول لازم تلقين فاتحين فيه شي او موسعينه :))

الحمدلله استانسنه وايد وليلحين ودي اروح مره ثانيه هههههه :)


مشكوره :>

joe يقول...

ماعندي شي اقوله ;p
بس الصراحه تقرريرج يفتح النفس وشغلات حلوه والي يبي يغير خل يروح دبي لأنه صج حلوه
دائما كل سنه اروح دبي صرت ادلها اكثر من لكويت لوول خصوصا هالصيف رحت مرتين

يعطيج العافيه

Fishah يقول...

ياحبج حق الكيك .. حتى هناك .. اشوا انه عربانتكم انترست :)

شحلو بوك الكوكي شكله يشوق

تقريرج وااااااااايد حلووو وناطرين البقيه :)

والحمدالله على السلامه .. سامحيني على التأخير :*

شاي الضحى يقول...

المباركيه

الحمدلله انكم مستانسين على التقارير :)

انا بعد وايد اروحلها بس ليلحين ما ادلها لان اهناك كله تكاسي او اذا رحنه مع خالي اهوا يسوق وانا بس مجابله الكاميرا واصور ومادري عن الطريج هههههه

الله يعافيك :)

شاي الضحى يقول...

فشه

لو بالكويت جان خذيتها بس اهناك ما تنفع كلش ههههه

انشالله الجزء الرابع انزله بأقرب وقت :)

الله يسلمج .. مسموحه :)


حياج الله :>

Rawan يقول...

وناسة :)

تقرير ممتع بانتظار المزيد =)

شاي الضحى يقول...

green house

شكرا :)

sweetya يقول...

وناسه الله يتمم عليكم دوم الوناسه

بس صج شوقتيني اروح للامارات ولا مره رحتلها بس ان شاء الله قريب بروحلها لأن صج تشجعت بعد ماشفت رحلتكم :)


وبانتظار التكمله

شاي الضحى يقول...

sweetya

تسلمين حبيبتي :)


لازم تروحينلها لان صج وناسه حتى مولاتهم تشرح الصدر مو نفس الكويت وتمشين على راحتج محد يخز ويغثج :)))


مشكوره :>