الثلاثاء، 18 مايو 2010

كواليس Salad Boutique!

بعد ما حطيت البوست قبل جم اسبوع عن سالد بوتيك

كنت صج وايد متضايقه من الي صار بهالمطعم لانه مطعمي المفضل

خاصه وانه وجبتي المفضله اهيا السلطات بأنواعها

وكنه دايما نطلب منهم

وبعدها قلت ماراح اكل منهم لان اهم شي عندي نظافة المطعم

عقبها بجم يوم وصلني ايميل من إدارة المطعم واطلبوا مني تفاصيل الطلب

وتأسفوا على الي صار لأن "هدفهم هو خدمة العملاء بشكل يرضيهم دائما"

عقب ما دزيت لهم الايميل دقوا علي وتأسفوا مره ثانيه

وكان تعاملهم وايد حلو معاي ووايد هامهم اني ارد اكل من المطعم مره ثانيه

واتفقوا معاي اني ايي المطعم واشوف المطبخ

ولسبب ظروف عديده تم تأجيل الموعد

وقبل جم يوم دقوا علي واتفقنه على الموعد الي اهوا يوم الجمعه الي طاف

ورحنه سالد بوتيك - فرع الجابرية

وهذي صورته من بره بعد النيولوك


واهني من داخل

حبيت الديكورات وايد خاصة الألوان بس عيبه وايد صغير

الطاوله الي فيها عفسه كانت طاولتنه ههههه


وهذا المطبخ


واهني بعد ما طلعتهم لان زحمه داخل ما اقدر ادش


واهم شي كنت بشوفه شلون يغسلون الخضرا

بس المكينة الي تغسل موجوده في فرع الشعب

يغسلون لهم وايبونه الجابريه يكون مغسول ونظيف

ويحطونه بشي (مادري شسمه) ويغطونه


كاهم واضحين بالصوره مغطيين عشان ما يدش فيهم شي


وهذا كان توه يايبينه من الشعب فرييييييييييش


المواعين نظيفه على الأرفف


الصلصات


وفي صور صورت الأكل كان كله مغطى وشكله نظيف ماكو شي بره

بس قميضه مو واضحين فما حطيتهم


وطبعا خلوني على راحتي اصور الي ابيه واشوف الي ابيه

بعد ما خلصت من التمشي

اعزموني على الغدا

وهذا المنيو


عصير ليمون


سلطه على ذوق الي عزمني


اول مره اجربها بس كانت لذييييييييذه

اسمها

New York Steak Salad


ميني برجر مو مالتي ومو انا مصورتها ههههههههه


الصراحه بعد الي شفته 100% راح ارد اطلب منهم

شكرا سالد بوتيك على تعاملكم الراقي معاي

وشكرا على العزيمه

ما قصرتوا

والي عنده اي اقتراح او واجهته مشكله مع المطعم يتصل على هالرقم

55746477

او يرسل لهم ايميل

crm@saladboutique.com

Thanks, Ali

Thanks, Ghadeer

هناك 28 تعليقًا:

رورو الشخبوطه يقول...

وايد مطعمهم صغير..

وجنه طريقتهم عباله اقصد التنظيف بمكان والشغل مكان 2..

عموما بالعافيه عليج يارب..

Her يقول...

tadreen 3ad ..ba3ad ma sheft ur post refeejaty galaw ela bero7oon w ana geltlehum laaa2! chay etha7a lagya 7ashara fi ..bs a9araw ela yroo7on maba3'eat aza3el a7ad chan aroo7 .. we7na ga3den 3ala el 6awla ely yamkum chan ye6la3le zeawy!!! w chan el waitress tgole ee hatha akeed yay mn barra! mu lazem yreshoon el mukan w enathfoona ?! la3at chabdy walla

غير معرف يقول...

هذا اشلون قاعد يجهز الاكل ويتكلم بالتلفون !!!!!

مخالفة واضحة لقواعد النظافة

Made n Q8 يقول...

اهوا كل شي اوكي لين وصلت للصوره الي قاعد يتكلم بالموبايل !!

لوول حده راهي الاخ

وعلييكم بالعافية

daloo3a يقول...

أهم شي العزيمه على حسابهم خخخخخخخخخ

aL-NooR . يقول...

تصدقين امر عليه
بس ولا مرة طلبت منه
بس مو جنه صغير ؟


هني و عافية :*

***********************

كوكتيل يقول...

عليج بالعافية حياتي :)

بس وايد صغير المطبخ :(

بس زين دقوا وأهتموا غيرهم يعطون طاف :)

Sn3a يقول...

اشوه تطمنتي و طمنتينا
خصوصا ان المطعم لذييذ و كويتي فاحسن من غيره بالف مرة

DoDoq8 يقول...

والله شي حلو منهم انهم يهتمون

اذكر مره اختي بفرايدز لقت ام علي بسلطه من سلطاتهم

لمه كلمت المانجر اهناك قالها انتو بتسون سالفه عشان ماتبون تدفعون الحساب !!

ShaymoOona يقول...

والله بعد هالبوست خلاص باجر حق ريوق الدوام بطلب لهم منه :)

غير معرف يقول...

حلو منهم إتصلوا عليج وخلوج تدخلين المطعم وتصورين هذي شجاعه منهم

وغيروا فكرتنا عنهم لأنه عقب البوست القديم قلت ماراح أطلبهم منهم بس إلحين تغير رايي عقب هالصور

يعطيج العافيه شايونه:)

mazyona يقول...

حلو الواحد لما يكون غلطان يعتذر
وأنا أشجع تصرفهم اللبق

مهرة سالم يقول...

السلام عليكم..
بالعافيه عليج وأن شاء الله يظل مستواهم دايم جذه ...
وأن شاء الله لو زرت الكويت
أكيد بتعزميني عندهم ..هههه
..
في حفظ الله

شاي الضحى يقول...

رورو

اي صغير واحتمال يفتحون فرع اكبر

التنظيف ويسوون الاكل بالشعب

والجابريه بس يسوون الاكل

لا مو عباله بالعكس انظف لانهم يغسلون بمكينه مو بيدهم

الله يعافيج

شاي الضحى يقول...

هير

تبين الصراحه في جم مطعم رحت لهم شفت زهاويه وصج يكونون يايين من بره

وحتى لو يرشون اييون بوقت ثاني

صرت خبيرة زهاويه هههههه كل يوم بليل يطلع لي واحد بنفس المكان الي ارش منه

شوفي انا ما ادافع عن المطعم ومادري اذا كانوا يرشون او لا

وبالنسبة لنظافة المكان لما رحت وشفته ماكان في شي وصخ كان عادي

شاي الضحى يقول...

غير معرف

قواعد النظافه؟! ما اعرفها !

بس اهوا كان ياخذ الطلب ويزهب العلبه

وكل شي جاهز عندهم بس يخلطون

يعني ما يبيله تفرغ وماكان ماسك التليفون

شاي الضحى يقول...

ميد

مثل الي قلته لي غير معرف :)



الله يعافيج

شاي الضحى يقول...

دلووعه

لا والله اهم شي اني تطمنت من نظافة المطعم :)

شاي الضحى يقول...

النور

اي صغير

انا كله اطلب يوصلون لي البيت ما اقعد فيه

الله يعافيج :)

شاي الضحى يقول...

كوكتيل

الله يعافيج

صح اهم شي انهم اهتموا :)

شاي الضحى يقول...

سنعه

عدل :)

شاي الضحى يقول...

دودو

اي والله :)

@@ من صجهم يعني قصدهم انتوا يايبينها وحاطينها

عاد تدرين والله ما الومهم تدرين ليش

يت فتره كانوا الناس يروحون فرايديز لما يبلعون وحده منهم تصرخ بطني تسممت ويخلونهم يطلعون وما يدفعون !

بس هم المفروض يعرفون شلون يتعاملون مع الزباين

شاي الضحى يقول...

شيمونه

عوافي :)

شاي الضحى يقول...

لوير

في مطاعم ما يهمهم بس اهما والله كان وايد هامهم الموضوع :)

الله يعافيج :)

شاي الضحى يقول...

مزيونه

وانا بعد اشجع

والله يوفقهم :)

شاي الضحى يقول...

نهار

الله يعافيج

حياج الله بالكويت واذا ييتي اصير لج دليل سياحي واعزمج بالمكان الي تبينه :q

Frankom يقول...

المشكلة تكمن في الحشرات اللي ترز يهها غصب
على كثر الحماية والنزافة المقدمة بهالمطاعم الا انكي لابد من ان تجدي شيئ ما غلط وهذا أمر طبيعي

شوقتيني والله وشكلي بطلب منهم
:)

شاي الضحى يقول...

فرانكوم

ههههههه شلون ترز ويها غصب؟ :q

شي اكيد محد يتعمد يحط الحشره بالاكل عشان سمعة المطعم

بس اعجبتني "الا انكي لابد من ان تجدي" هههههه :q


اطلبلي معاك :)